വാഷിങ്ടൺ: ഇറാൻ യുദ്ധത്തെ തുടർന്ന് എണ്ണവില ഉയർന്ന സാഹചര്യത്തിൽ വൻലാഭം നേടിയ അമേരിക്കൻ എണ്ണക്കമ്പനികൾ പെട്രോൾ വില കുറയ്ക്കാൻ നടപടി സ്വീകരിക്കണമെന്ന് പ്രസിഡന്റ് ഡൊണാൾഡ് ട്രംപ് ആവശ്യപ്പെട്ടു. യുദ്ധസാഹചര്യം മുതലെടുത്ത് കമ്പനികൾ “അമിതലാഭം” നേടിയെന്നാണ് ട്രംപിന്റെ വിമർശനം. വൈറ്റ് ഹൗസിൽ എക്സിക്യൂട്ടീവ് ഉത്തരവിൽ ഒപ്പുവെച്ചതിന് പിന്നാലെ നടത്തിയ പ്രസംഗത്തിൽ, ഷെവ്രോൺ, എക്സോൺമൊബിൽ തുടങ്ങിയ കമ്പനികളെ ട്രംപ് പേരെടുത്ത് വിമർശിച്ചു.
“അവർ ആവശ്യത്തിലധികം പണം സമ്പാദിച്ചു. ഷെവ്രോൺ അമിതലാഭം നേടി. എക്സോൺമൊബിലും അതുപോലെ. അവർ വളരെ അധികം പണം സമ്പാദിച്ചു,” എന്ന് ട്രംപ് പറഞ്ഞു. ഇറാൻ യുദ്ധത്തെ തുടർന്ന് ഹോർമുസ് കടലിടുക്കിലൂടെയുള്ള ക്രൂഡ് ഓയിൽ ഗതാഗതം കാര്യമായി തടസ്സപ്പെട്ടതോടെയാണ് ആഗോള എണ്ണവില കുത്തനെ ഉയർന്നത്. ഇതാണ് എണ്ണക്കമ്പനികൾക്ക് വലിയ സാമ്പത്തിക നേട്ടമുണ്ടാക്കിയത്.
ഇറാൻ സംഘർഷം അവസാനിക്കുന്നതോടെ എണ്ണവില കുത്തനെ ഇടിയും എന്നും ട്രംപ് പ്രവചിച്ചു. എന്നാൽ, ട്രംപിന്റെ പരാമർശത്തോട് എക്സോൺമൊബിൽ പ്രതികരിക്കാൻ തയ്യാറായില്ല. ഷെവ്രോണും ഇതുസംബന്ധിച്ച മാധ്യമങ്ങളുടെ ചോദ്യങ്ങൾക്ക് മറുപടി നൽകിയില്ല.
അതേസമയം, ഇറാനെതിരായ ഉപരോധ നടപടിയുടെ ഭാഗമായി 44 വാണിജ്യ കപ്പലുകളുടെ യാത്ര അമേരിക്കൻ സൈന്യം വഴിതിരിച്ചുവിട്ടതായി യു.എസ്. സൈന്യം അറിയിച്ചു. രണ്ട് കപ്പലുകൾ പ്രവർത്തനരഹിതമാക്കിയതായും മറ്റ് രണ്ട് കപ്പലുകളിൽ കയറി പരിശോധന നടത്തിയതായും യു.എസ്. സെൻട്രൽ കമാൻഡ് (CENTCOM) വ്യക്തമാക്കി. ട്രൂത്ത് സോഷ്യലിലെ പോസ്റ്റിൽ, “ധാരണയിലോ പൂർണ കീഴടങ്ങലിലോ എത്തുന്നതുവരെ ഇറാനിലേക്ക് ഒന്നും കടന്നുപോകില്ല,” എന്ന് ട്രംപ് മുന്നറിയിപ്പ് നൽകിയിരുന്നു.
Trump says oil companies should cut gas prices after making “too much money” from Iran war
