വാഷിംഗ്ടൺ: ഹോർമൂസ് കടലിടുക്കിന് സമീപമുള്ള ഇറാൻ്റെ റോക്കറ്റ് വിക്ഷേപണ കേന്ദ്രങ്ങൾക്ക് നേരെ അമേരിക്കൻ സൈന്യം ശക്തമായ ആക്രമണം നടത്തിയതോടെ ആഗോള വിപണിയിലും ആശങ്ക. ഒരു മാസത്തെ ഇടവേളയ്ക്ക് ശേഷം ഇരുരാജ്യങ്ങളും തമ്മിലുണ്ടാകുന്ന ആദ്യ നേരിട്ടുള്ള സൈനിക നടപടിയാണിത്. ഇതേത്തുടർന്ന് ആഗോള സാമ്പത്തിക വിപണിയിൽ വൻ ചലനങ്ങളാണ് രേഖപ്പെടുത്തിയത്. രാജ്യാന്തര വിപണിയിൽ ക്രൂഡ് ഓയിൽ വില കുതിച്ചുയർന്നപ്പോൾ, അമേരിക്കൻ ഓഹരി വിപണി തകർച്ച നേരിട്ടു.
ആക്രമണ വാർത്ത പുറത്തുവന്നതോടെ രാജ്യാന്തര എണ്ണവിലയുടെ മാനദണ്ഡമായ ബ്രെൻ്റ് ക്രൂഡ് ഓയിൽ വില 2.7 ശതമാനം വർദ്ധിച്ചു. നവംബർ മാസത്തെ വിതരണത്തിനുള്ള എണ്ണവില ബാരലിന് 90 ഡോളറിന് മുകളിലാണ് തിങ്കളാഴ്ച വ്യാപാരം അവസാനിപ്പിച്ചത്. കഴിഞ്ഞ ഏപ്രിൽ മാസത്തിൽ എണ്ണവില ബാരലിന് 100 ഡോളറിന് മുകളിലായിരുന്നു. ഓഗസ്റ്റ് ആദ്യവാരം ഇത് 80 ഡോളറിലേക്ക് താഴ്ന്നിരുന്നെങ്കിലും പുതിയ യുദ്ധസാഹചര്യം വില വീണ്ടും ഉയർത്തിയിരിക്കുകയാണ്.
സൈനിക നീക്കം അമേരിക്കൻ ഓഹരി വിപണിയെ ദോഷകരമായി ബാധിച്ചു. പ്രമുഖ സൂചികയായ എസ് ആൻഡ് പി 500 0.3 ശതമാനവും, നാസ്ഡാക് 0.1 ശതമാനവും ഇടിവ് രേഖപ്പെടുത്തി. ഡൗ ജോൺസ് ഇൻഡസ്ട്രിയൽ ആവറേജ് 374 പോയിൻ്റുകളാണ് (0.7%) ഒറ്റയടിക്ക് താഴ്ന്നത്. എന്നാൽ, ഈ ഇടിവുകൾക്കിടയിലും ഓഗസ്റ്റ് മാസത്തെ മൊത്തം കണക്കിൽ മൂന്ന് സൂചികകളും ലാഭത്തിലാണ് വ്യാപാരം അവസാനിപ്പിച്ചത്.
അമേരിക്കയുടെ 10 വർഷത്തെ ട്രഷറി ബോണ്ട് യീൽഡ് 4.75 ശതമാനമായി ഉയർന്നു. ബോണ്ട് മാർക്കറ്റിൽ ഇടപെടുമെന്ന് ട്രംപ് ഭരണകൂടം അസാധാരണ പ്രഖ്യാപനം നടത്തിയ രണ്ടാഴ്ച മുൻപത്തെ അതേ നിരക്കിലേക്കാണ് നിലവിൽ ബോണ്ട് വിപണി എത്തിയിരിക്കുന്നത്. വരും ദിവസങ്ങളിലും മിഡിൽ ഈസ്റ്റിലെ സംഘർഷാവസ്ഥ തുടർന്നാൽ ആഗോള വിപണിയിൽ കൂടുതൽ പ്രതിസന്ധിയുണ്ടാകുമെന്നാണ് സാമ്പത്തിക വിദഗ്ദ്ധരുടെ വിലയിരുത്തൽ.
US-Iran conflict: Concerns in global markets; Oil prices rise, stock markets fall
