ഇസ്ലാമാബാദ്: ഇറാനും അമേരിക്കയും തമ്മിൽ വർദ്ധിച്ചുവരുന്ന സംഘർഷങ്ങളിൽ ആഴത്തിലുള്ള ആശങ്ക രേഖപ്പെടുത്തി പാകിസ്താൻ പ്രധാനമന്ത്രി ഷെഹ്ബാസ് ഷെരീഫ്. ഇറാൻ പ്രസിഡൻ്റ് മസൂദ് പെസെഷ്കിയാനുമായി നടത്തിയ ഫോൺ സംഭാഷണത്തിലാണ് അദ്ദേഹം ഇക്കാര്യം വ്യക്തമാക്കിയത്. പശ്ചിമേഷ്യയിൽ സമാധാനവും സ്ഥിരതയും അടിയന്തിരമായി പുനഃസ്ഥാപിക്കേണ്ടതുണ്ടെന്ന് ഷെരീഫ് ഊന്നിപ്പറഞ്ഞു. കഴിഞ്ഞ മാസം യുഎസും ഇറാനും ഒപ്പുവെച്ച ധാരണാപത്രത്തിലെ വ്യവസ്ഥകൾ ഇരുരാജ്യങ്ങളും പൂർണ്ണമായി പാലിക്കണമെന്നും അദ്ദേഹം ആവശ്യപ്പെട്ടു. വാഷിംഗ്ടണും ടെഹ്റാനും തമ്മിലുള്ള നയതന്ത്ര ചർച്ചകൾക്ക് പ്രധാന മധ്യസ്ഥത വഹിക്കുന്നത് പാകിസ്താനാണ്.
അതേസമയം, യുഎസുമായുള്ള സംഘർഷം ലഘൂകരിക്കുന്നതിനുള്ള ചർച്ചകൾക്കായി ഇറാൻ വിദേശകാര്യ മന്ത്രി അബ്ബാസ് അരാഘ്ചി ഒമാൻ തലസ്ഥാനമായ മസ്കറ്റിൽ എത്തി. മേഖലയിലെ സമാധാന ചർച്ചകളിൽ നിർണ്ണായക പങ്കുവഹിക്കുന്ന ഒമാൻ ഭരണകൂടവുമായി അദ്ദേഹം കൂടിക്കാഴ്ച നടത്തുമെന്ന് അർദ്ധ ഔദ്യോഗിക വാർത്താ ഏജൻസിയായ തസ്നിം റിപ്പോർട്ട് ചെയ്തു.
US-Iran dispute: Pakistan demands compliance with settlement terms; Iranian minister in Oman for talks
