വാഷിങ്ടൺ: അമേരിക്കയിലെ വാഷിങ്ടൺ സംസ്ഥാനത്തെ സ്പോക്കെയ്ൻ മേഖലയിൽ കാട്ടുതീ അതിവേഗം വ്യാപിച്ച് വൻ നാശനഷ്ടം. മൂന്ന് കാട്ടുതീകൾ ഒന്നിച്ചുചേർന്ന ‘സ്പോക്കെയ്ൻ കോംപ്ലക്സ് ഫയർ’ ഇതിനകം 5,400 ഏക്കറിലധികം വനഭൂമി കത്തിനശിപ്പിച്ചതായി അധികൃതർ അറിയിച്ചു. ഓൾഡ് ട്രെയിൽസ് ഫയർ, ഫെയർവ്യൂ ഫയർ, ഓട്ടം ലെയ്ൻ ഫയർ എന്നിവയാണ് ഒന്നിച്ചുചേർന്ന് സ്പോക്കെയ്ൻ കോംപ്ലക്സ് ഫയറായി മാറിയത്. ശനിയാഴ്ച ഉച്ചയ്ക്കാണ് മൂന്ന് തീപിടിത്തങ്ങളും ആരംഭിച്ചത്.
തീപിടിത്തത്തിൽ 600ഓളം കെട്ടിടങ്ങൾ, അതിൽ നിരവധി വീടുകൾ ഉൾപ്പെടെ, നശിക്കുകയോ ഗുരുതരമായി കേടുപാടുകൾ സംഭവിക്കുകയോ ചെയ്തിട്ടുണ്ട്. 4,000ത്തോളം കെട്ടിടങ്ങൾ ഇപ്പോഴും തീപിടിത്ത ഭീഷണിയിലാണെന്ന് സംസ്ഥാന അധികൃതർ അറിയിച്ചു. നൂറുകണക്കിന് ആളുകളെ സുരക്ഷിത കേന്ദ്രങ്ങളിലേക്ക് മാറ്റിപ്പാർപ്പിച്ചു.സ്ഥിതിഗതികൾ വിലയിരുത്താൻ ഗവർണർ ബോബ് ഫെർഗൂസൺ സ്പോക്കെയ്ൻ സന്ദർശിക്കുമെന്ന് അറിയിച്ചു. സമൂഹമാധ്യമങ്ങളിൽ കത്തുന്ന വീടുകളുടെ ദൃശ്യങ്ങൾ കണ്ടതായും, “വാഷിങ്ടൺ നിവാസികൾക്ക് അതീവ ദുഷ്കരമായ സാഹചര്യമാണ് നിലവിലുള്ളത്” എന്നും അദ്ദേഹം പറഞ്ഞു.
അമേരിക്കൻ ദേശീയ കാലാവസ്ഥാ സേവനം (NWS) കിഴക്കൻ വാഷിങ്ടണിന്റെയും ഒറിഗണിന്റെയും ചില ഭാഗങ്ങളിൽ ഏറ്റവും ഉയർന്ന കാട്ടുതീ മുന്നറിയിപ്പായ ‘പാർട്ടികുലർലി ഡേഞ്ചറസ് സിറ്റുവേഷൻ റെഡ് ഫ്ലാഗ് വാർണിംഗ്’ പ്രഖ്യാപിച്ചിട്ടുണ്ട്. ശക്തമായ കാറ്റും അതിവരണ്ട കാലാവസ്ഥയും തീ അതിവേഗം പടരാൻ കാരണമായതായി അധികൃതർ വ്യക്തമാക്കി. തീ മരങ്ങളുടെ മുകൾഭാഗങ്ങളിലൂടെ വ്യാപിക്കുന്നതിനാൽ അഗ്നിശമന പ്രവർത്തനങ്ങൾ കൂടുതൽ വെല്ലുവിളിയായിരിക്കുകയാണ്. വരൾച്ച രൂക്ഷമായ സാഹചര്യത്തിൽ സംസ്ഥാനത്ത് അടിയന്തരാവസ്ഥ പ്രഖ്യാപിച്ച ഗവർണർ സെപ്റ്റംബർ അവസാനം വരെ തുറസ്സായ സ്ഥലങ്ങളിൽ തീ ഉപയോഗിക്കുന്നതിന് നിരോധനവും ഏർപ്പെടുത്തി.
അതേസമയം, ഒറിഗണിലും വാഷിങ്ടണിലും നിരവധി വലിയ കാട്ടുതീകൾ ഇപ്പോഴും കത്തിക്കൊണ്ടിരിക്കുകയാണ്. ഈ വർഷം മാത്രം ഒറിഗണിൽ 17 ലക്ഷം ഏക്കറിലധികം വനഭൂമി കത്തിനശിച്ചു. സംസ്ഥാനത്ത് നിലവിൽ 30 വലിയ കാട്ടുതീകൾ ഇതുവരെ നിയന്ത്രണവിധേയമായിട്ടില്ല. അമേരിക്കയുടെ പടിഞ്ഞാറൻ മേഖലയിൽ തുടരുന്ന അതിതീവ്ര ചൂടും കാട്ടുതീ സാഹചര്യം കൂടുതൽ വഷളാക്കിയിട്ടുണ്ട്. കാലിഫോർണിയ മുതൽ ഡക്കോട്ടാസ് വരെ 4.5 കോടിയിലധികം ആളുകൾക്ക് ചൂട് മുന്നറിയിപ്പ് തുടരുകയാണ്. ഫീനിക്സിൽ താപനില 116 ഡിഗ്രി ഫാരൻഹീറ്റ് (46.7°C) വരെ ഉയരുമെന്നാണ് കാലാവസ്ഥാ പ്രവചനം.
Washington wildfires spread to 5,000-plus acres, 600 structures damaged or destroyed
