അമേരിക്കയിൽ വാഹനങ്ങളെ കേന്ദ്രീകരിച്ച് വികസിച്ച നഗരങ്ങളിൽ നിന്ന് വ്യത്യസ്തമായി, വാഹനങ്ങളില്ലാതെ ജീവിക്കാൻ കഴിയുന്ന ഒരു നഗരമാതൃക ശ്രദ്ധ നേടുന്നു. അരിസോണയിലെ ടെംപെയിൽ, ഫീനിക്സിന് സമീപമുള്ള ‘കുൾഡെസാക്’ എന്ന സമുച്ചയമാണ് ഇതിന് ഉദാഹരണം.സാധാരണ നഗര വികസന പദ്ധതികളെപ്പോലെ തോന്നുന്ന ഈ പ്രദേശം പൂർണ്ണമായും വാഹനരഹിതമായി രൂപകൽപ്പന ചെയ്തതാണ്. ഇവിടെ താമസിക്കുന്നവർ പ്രധാനമായും നടക്കുകയോ സൈക്കിൾ ഉപയോഗിക്കുകയോ ചെയ്യുന്നു. ഇതിലൂടെ സമൂഹബന്ധം കൂടുതൽ ശക്തമാകുന്നതായാണ് താമസക്കാരുടെ പ്രതികരണം.
നഗരത്തിനുള്ളിൽ തന്നെ കടകൾ, റെസ്റ്റോറന്റുകൾ, കർഷക വിപണി, സസ്യശാലകൾ എന്നിവ ഒരുക്കിയതിനാൽ, പുറത്തേക്ക് വാഹനത്തിൽ യാത്ര ചെയ്യേണ്ട ആവശ്യം കുറവാണ്. കൂടാതെ, തുറസ്സായ ഇടങ്ങൾ സമൂഹ ഇടപെടലുകൾക്ക് വഴിയൊരുക്കുന്നു.വാഹന ഗതാഗതം ഇല്ലാത്തത് സുരക്ഷിതത്വം വർധിപ്പിക്കുന്നതായും താമസക്കാർ പറയുന്നു. പ്രത്യേകിച്ച് കാഴ്ചപ്രശ്നമുള്ളവർക്കും ഇത് സഹായകരമാണെന്ന് വിലയിരുത്തുന്നു.
ചൂടേറിയ പ്രദേശമായിട്ടും, നഗരത്തിന്റെ ഏകദേശം 55 ശതമാനം ഭാഗം ഹരിതമേഖലയായതിനാൽ, സമീപ പ്രദേശങ്ങളെ അപേക്ഷിച്ച് ഇവിടെ താപനില കുറവാണ്. മരങ്ങളും നിഴലും കൂടുതലുള്ളതിനാൽ ചൂട് കുറയ്ക്കാൻ ഇത് സഹായിക്കുന്നു.ലോകവ്യാപകമായി ഗതാഗത മേഖലയാണ് കാർബൺ പുറന്തള്ളലിന്റെ വലിയൊരു വിഹിതത്തിന് കാരണമാകുന്നത്. ഈ സാഹചര്യത്തിൽ, വാഹനരഹിത നഗരമാതൃക പരിസ്ഥിതി സൗഹൃദമായൊരു പരിഹാരമായി വിലയിരുത്തപ്പെടുന്നു.
ലൈറ്റ് റെയിലും ബസ് സൗകര്യങ്ങളും ലഭ്യമാക്കിയതോടെ നഗരത്തിലെ ആളുകൾക്ക് മറ്റ് പ്രദേശങ്ങളുമായി ബന്ധപ്പെടാനും സൗകര്യമുണ്ട്. ഇന്ധനവില വർധനയുടെ ബാധ്യതയില്ലാത്തതും ഈ ജീവിതശൈലിയെ കൂടുതൽ ആകർഷകമാക്കുന്നു.സൈക്കിൾ, ഇലക്ട്രിക് സ്കൂട്ടർ എന്നിവ ഉപയോഗിച്ച് യാത്ര ചെയ്യുന്നതിനാൽ ചെലവ് ലാഭിക്കാനും കഴിയുന്നുവെന്നാണ് താമസക്കാരുടെ അനുഭവം.
What it’s like to live in a car-free town in America
