യുഎൻ: പലസ്തീനിന് സമ്പൂർണ്ണ അംഗത്വം ഉറപ്പാക്കുന്ന പ്രമേയം പാസാക്കിയതിൽ പ്രതിഷേധിച്ച് പൊതുസഭയില് യുഎന് ചാര്ട്ടറിന്റെ പകര്പ്പ് കീറി ഇസ്രയേല് അംബാസഡര് ഗിലാഡ് എര്ദാന്. ഐക്യരാഷ്ട്രസഭയുടെ അടിസ്ഥാന ഉടമ്പടിയായ ചാര്ട്ടറിന്റെ പകര്പ്പ് മിനിയേച്ചര് ഷ്രെഡര് ഉപയോഗിച്ച് കീറുന്നതിന്റെ വീഡിയോയും പുറത്ത് വന്നിട്ടുണ്ട്.
പ്രമേയത്തെ യുഎൻ ചാർട്ടറിൻ്റെ “വ്യക്തമായ ലംഘനം” എന്ന് വിളിച്ച എർദാൻ, കഴിഞ്ഞ മാസം സെക്യൂരിറ്റി കൗൺസിലിൽ യുഎസ് വീറ്റോ അട്ടിമറിച്ചതായി പറഞ്ഞു. യുഎൻ ചാർട്ടർ കീറിമുറിക്കുന്നതിനിടയിൽ അംഗരാജ്യങ്ങൾക്കായി താൻ കണ്ണാടി ഉയർത്തിപ്പിടിക്കുകയാണെന്നും അദ്ദേഹം പറഞ്ഞു.
“ഈ ദിവസം കുപ്രസിദ്ധമായി മാറും. ലോകം മുഴുവൻ ഈ നിമിഷം, ഈ അധാർമിക പ്രവൃത്തി ഓർക്കണമെന്ന് ഞാൻ ആഗ്രഹിക്കുന്നു… ഇന്ന് ഞാൻ നിങ്ങൾക്കായി ഒരു കണ്ണാടി ഉയർത്തി പിടിക്കാൻ ആഗ്രഹിക്കുന്നു, അതിനാൽ നിങ്ങൾ യുഎൻ ചാർട്ടറിൽ എന്താണ് അടിച്ചേൽപ്പിക്കുന്നതെന്ന് നിങ്ങൾക്ക് കൃത്യമായി കാണാൻ കഴിയും. ഈ വിനാശകരമായ വോട്ടിലൂടെ നിങ്ങൾ സ്വന്തം കൈകൊണ്ട് യുഎൻ ചാർട്ടർ തകർക്കുകയാണ്,” അദ്ദേഹം പറഞ്ഞു.
ഐക്യരാഷ്ട്ര സഭയില് നിരീക്ഷക പദവിയുള്ള പലസ്തീന് പൂര്ണ അംഗത്വം നല്കാന് ആവശ്യപ്പെടുന്ന പ്രമേയത്തിന് യുഎന് ജനറല് അസംബ്ലിയില് ഭൂരിപക്ഷം രാജ്യങ്ങളും വോട്ട് ചെയ്തു. ഇന്ത്യയുള്പ്പെടെ 143 വോട്ടുകളുടെ ഭൂരിപക്ഷത്തില് പ്രമേയം പാസായപ്പോള് 25 രാജ്യങ്ങള് വിട്ടുനില്ക്കുകയും അമേരിക്കയും ഇസ്രയേലും ഉള്പ്പെടെ ഒമ്പത് രാജ്യങ്ങള് എതിര്ക്കുകയും ചെയ്തു.
