അടുത്തിടെ യുഎസ് പ്രസിഡൻ്റ് ജോ ബൈഡനെ അഭിമുഖം നടത്തുകയും പ്രസിഡൻ്റിനോട് ചോദിച്ച ചോദ്യങ്ങൾ മുൻകൂട്ടി നൽകിയതാണെന്ന് അവകാശപ്പെടുകയും ചെയ്ത റേഡിയോ ഹോസ്റ്റ് ആൻഡ്രിയ ലോഫുൾ-സാൻഡേഴ്സ് WURD റേഡിയോയിൽ നിന്ന് രാജിവച്ചതായി സിഎൻഎൻ റിപ്പോർട്ട് ചെയ്തു.
“വൈറ്റ് ഹൗസ് മുൻകൂട്ടി തയ്യാറാക്കി നൽകിയ ചോദ്യങ്ങൾ അഭിമുഖത്തിൽ ഉൾപ്പെടുത്തിയിട്ടുണ്ട്. ഒരു സ്വതന്ത്രമാധ്യമ സ്ഥാപനമായി തുടരുക എന്ന ഞങ്ങളുടെ ശ്രോതാക്കളോട് ഉത്തരവാദിത്തം ഇത് ലംഘിച്ചു. ഇതിന്റെ ഫലമായി മിസ്. ലോഫുൾ-സാൻഡേഴ്സും WURD റേഡിയോയും വേർപിരിയാൻ തീരുമാനിച്ചു,” ഫിലാഡൽഫിയ ആസ്ഥാനമായുള്ള സ്റ്റേഷൻ പ്രസിഡൻ്റും സിഇഒയുമായ സാറ ലോമാക്സ് ഞായറാഴ്ച വെബ്സൈറ്റിൽ പോസ്റ്റ് ചെയ്ത പ്രസ്താവനയിൽ പറഞ്ഞു.
പെൻസിൽവാനിയയിലെ കറുത്തവർഗക്കാരുടെ ഉടമസ്ഥതയിലുള്ള ഏക ടോക്ക് റേഡിയോ സ്റ്റേഷനാണ് WURD. ബ്ലാക്ക് ഫിലാഡൽഫിയൻസിലെ പ്രധാന പ്രേക്ഷകർക്കായി സ്വതന്ത്രവും വിശ്വസനീയവുമായ ശബ്ദമായി നിലകൊള്ളുന്നതിൽ സ്റ്റേഷൻ അഭിമാനിക്കുന്നുവെന്ന് ലോമാക്സ് ഊന്നിപ്പറഞ്ഞു. മുൻകൂട്ടി നൽകിയ ചോദ്യങ്ങൾ ഉപയോഗിക്കുന്നത് ആ വിശ്വാസത്തെ അപകടപ്പെടുത്തുന്നു. ഇത്തരം കീഴ്വഴക്കങ്ങൾ WURD റേഡിയോയുടെ ഭാഗമല്ല” എന്ന് അവർ പ്രസ്താവനയിൽ പറഞ്ഞു.
“WURD റേഡിയോ ബൈഡൻ്റെയോ മറ്റേതെങ്കിലും അഡ്മിനിസ്ട്രേഷൻ്റെയോ മുഖപത്രമല്ല,” അവർ കൂട്ടിച്ചേർത്തു.
“ദി സോഴ്സ്” എന്ന പരിപാടിയുടെ അവതാരക ലോഫുൾ-സാൻഡേഴ്സ് കഴിഞ്ഞ ആഴ്ചയാണ് ബൈഡന്റെ അഭിമുഖം നടത്തിയത്. തിരഞ്ഞെടുപ്പിൻ്റെ നേട്ടങ്ങൾ, സംവാദ പ്രകടനം, ഇതുവരെ ആർക്ക് വോട്ട് ചെയ്യണം എന്ന് തീരുമാനിക്കാത്ത വോട്ടർമാർക്കുള്ള സന്ദേശം എന്നിവയെക്കുറിച്ച് അഭിമുഖത്തിൽ ചോദ്യങ്ങൾ ചോദിച്ചിരുന്നു. സിഎൻഎൻ്റെ വിക്ടർ ബ്ലാക്ക്വെല്ലിന് ലോഫുൾ ശനിയാഴ്ച നൽകിയ അഭിമുഖത്തിൽ, ബൈഡൻ്റെ സഹായികൾ തന്നോട് ശുപാർശ ചെയ്ത എട്ട് ചോദ്യങ്ങളിൽ ഈ ചോദ്യങ്ങളുണ്ടായിരുന്നുവെന്ന് അവർ വെളിപ്പെടുത്തിയിരുന്നു.
