അമേരിക്കയിൽ ഇനി ഡ്രൈവിങ് ലൈസൻസ് ഐഫോണിലും സൂക്ഷിക്കാം. ഇതിനായി അമേരിക്കൻ ഐക്യനാടുകളിലെ ചില സംസ്ഥാനങ്ങളിൽ ഡ്രൈവിങ് ലൈസൻസുകളും സ്റ്റേറ്റ് ഐഡികളും ഐഫോണിൽ സൂക്ഷിക്കാൻ സാധിക്കുന്ന പുതിയ സംവിധാനം നിലവിൽ വന്നു. ആപ്പിളിന്റെ ‘വാലറ്റ്’ ആപ്ലിക്കേഷനിൽ ഇനി ഡിജിറ്റൽ ലൈസൻസ് സുരക്ഷിതമായി സൂക്ഷിക്കാൻ സാധിക്കും.
അരിസോന, കൊളറാഡോ, ജോർജിയ, മേരിലാൻഡ്, കലിഫോർണിയ ഉൾപ്പെടെയുള്ള പല സംസ്ഥാനങ്ങളും ഈ ഡിജിറ്റൽ ഐഡി സംവിധാനം ഇപ്പോൾ നടപ്പിലാക്കി. വിമാനത്താവളങ്ങളിലെ സുരക്ഷാ പരിശോധന നടത്തുന്ന ട്രാൻസ്പോർട്ടേഷൻ സെക്യൂരിറ്റി അഡ്മിനിസ്ട്രേഷൻ ഈ ഡിജിറ്റൽ ഐഡികൾ ഔദ്യോഗികമായി അംഗീകരിച്ചു തുടങ്ങിയിട്ടുണ്ട്.
സുരക്ഷാ പരിശോധനാ കേന്ദ്രങ്ങളിലെ പ്രത്യേക റീഡറുകൾക്ക് മുന്നിൽ ഐഫോൺ കാണിച്ചാണ് ഡിജിറ്റൽ ലൈസൻസ് ഉപയോഗിക്കേണ്ടത്. ഫേസ് ഐഡി അല്ലെങ്കിൽ ടച്ച് ഐഡി ഉപയോഗിച്ച് ഉറപ്പുവരുത്തിയാൽ മാത്രമേ വിവരങ്ങൾ കൈമാറ്റം ചെയ്യപ്പെടുക. അതിനാൽ, ഫോൺ മറ്റൊരാൾക്ക് കൈമാറാതെ തന്നെ സുരക്ഷിതമായി ഐഡി വെരിഫിക്കേഷൻ പൂർത്തിയാക്കാം. ഇത് സുരക്ഷ വർധിപ്പിക്കുകയും സ്വകാര്യത ഉറപ്പുവരുത്തുകയും ചെയ്യുന്നു. ഡിജിറ്റൽ ലോകത്തേക്കുള്ള ഒരു സുപ്രധാന ചുവടുവയ്പ്പായ ഇത് കൂടുതൽ സംസ്ഥാനങ്ങളിലേക്കും മറ്റ് തിരിച്ചറിയൽ രേഖകളിലേക്കും വൈകാതെ എത്തുമെന്നാണ് റിപ്പോർട്ടുകൾ.
