ന്യൂയോർക്ക്: ഓപ്പൺഎഐയെ പ്രതിനിധീകരിച്ച് ഇലോൺ മസ്കിനെതിരായ നിയമപോരാട്ടത്തിൽ ശ്രദ്ധ നേടിയ അമേരിക്കൻ അഭിഭാഷകൻ നാഥാനിയൽ കുള്ളർട്ടൺ (45) സഹപ്രവർത്തകയോടൊപ്പമുള്ള സ്വകാര്യ ദൃശ്യം വൈറലായതിനെ തുടർന്ന് കോടികളുടെ തൊഴിൽ അവസരം നഷ്ടമായതായി റിപ്പോർട്ട്.
ഫിനാൻഷ്യൽ ടൈംസ് റിപ്പോർട്ട് പ്രകാരം, ന്യൂയോർക്കിലെ പ്രമുഖ നിയമ സ്ഥാപനമായ വാച്ചെൽ, ലിപ്ടൺ, റോസൻ ആൻഡ് കാറ്റ്സ്-ലെ പങ്കാളിയായ കുള്ളർട്ടണെ അന്വേഷണം പൂർത്തിയാകുന്നതുവരെ അവധിയിൽ പ്രവേശിപ്പിച്ചു.
സെൻട്രൽ പാർക്കിലെ വീഡിയോ വൈറൽ
ന്യൂയോർക്കിലെ സെൻട്രൽ പാർക്കിൽ 29-കാരിയായ സഹപ്രവർത്തക കെൽസി ബോറൻസ്വൈഗിനൊപ്പം ബെഞ്ചിലിരുന്ന് ചുംബിക്കുന്ന ദൃശ്യമാണ് ടിക്ടോക്ക് കണ്ടന്റ് ക്രിയേറ്ററായ ജേ ഗ്വാപ്പോ പകർത്തിയത്. “ഇവിടെ കുട്ടികളുണ്ട്… ഒരു മുറിയിലേക്ക് പോകൂ,” എന്ന് പറയുന്നതിനിടെയാണ് വീഡിയോ ചിത്രീകരിച്ചത്.
ക്യാമറ ശ്രദ്ധയിൽപ്പെട്ടതോടെ ഇരുവരും അമ്പരന്ന് മുഖം മറയ്ക്കാൻ ശ്രമിക്കുന്നതും വീഡിയോയിൽ കാണാം. ടിക്ടോക്കിൽ ഏകദേശം 60 ലക്ഷം പേരും ഇൻസ്റ്റഗ്രാമിൽ 40 ലക്ഷം പേരും ഈ വീഡിയോ കണ്ടതായാണ് റിപ്പോർട്ട്.
കോടികളുടെ ജോലി നഷ്ടമായി
കുള്ളർട്ടൺ ഈ ആഴ്ച തന്നെ മറ്റൊരു പ്രമുഖ നിയമ സ്ഥാപനമായ ഗിബ്സൺ ഡൺ-ലേക്ക് മാറാനിരിക്കെയായിരുന്നു വീഡിയോ വൈറലായത്. എന്നാൽ വിവാദം ശക്തമായതോടെ പുതിയ നിയമന വാഗ്ദാനം കമ്പനി പിൻവലിച്ചതായി ഫിനാൻഷ്യൽ ടൈംസ് റിപ്പോർട്ട് ചെയ്യുന്നു.
നിയമരംഗത്തെ വിദഗ്ധരുടെ അഭിപ്രായത്തിൽ, വാച്ചെൽ ലിപ്ടണിൽ പങ്കാളിയായ കുള്ളർട്ടൺ വർഷത്തിൽ 40 ലക്ഷം ഡോളറിലധികം പ്രതിഫലം വാങ്ങുന്നുണ്ടാകാം. ഗിബ്സൺ ഡണ്ണിൽ ഇതിലും ഉയർന്ന പ്രതിഫലം ലഭിക്കാനായിരുന്നു സാധ്യതയെന്നും റിപ്പോർട്ടിൽ പറയുന്നു.
ഓപ്പൺഎഐ കേസിൽ ഒരുമിച്ച് പ്രവർത്തിച്ചു
ഈ വർഷം ആദ്യം ഇലോൺ മസ്ക് ഓപ്പൺഎഐക്കെതിരെ നൽകിയ 150 ബില്യൺ ഡോളറിന്റെ കേസിൽ കമ്പനിക്ക് അനുകൂലമായ വിധി നേടിക്കൊടുത്ത നിയമസംഘത്തിൽ നാഥാനിയൽ കുള്ളർട്ടണും കെൽസി ബോറൻസ്വൈഗും അംഗങ്ങളായിരുന്നു.
കുള്ളർട്ടണിന്റെ ഭാര്യ മോയ്റ കിം പെൻസ ഫെഡറൽ പ്രോസിക്യൂട്ടറാണ്. വിവാദവുമായി ബന്ധപ്പെട്ട് വാച്ചെൽ ലിപ്ടണോ ഗിബ്സൺ ഡണ്ണോ ഔദ്യോഗിക പ്രതികരണം നടത്തിയിട്ടില്ല. കുള്ളർട്ടണും ബോറൻസ്വൈഗും വിഷയത്തിൽ ഇതുവരെ പരസ്യമായി പ്രതികരിച്ചിട്ടില്ല.
A married lawyer who helped OpenAl beat Elon Musk was caught kissing a 29-year-old colleague; viral video could cost him a multimillion-dollar job
