സിആർപിഎഫ് ഉദ്യോഗസ്ഥരെ ആക്രമിച്ച ഭീകര കമാൻഡർ മുഹമ്മദ് ലത്തീഫ് ഭട്ടിനെ വധിച്ച് സൈന്യം; കൊല്ലപ്പെട്ടത് ഒരു വർഷമായി തിരയുന്ന ഭീകരൻ

ശ്രീനഗർ: തെക്കൻ കശ്മീരിലെ കുൽഗാം ജില്ലയിൽ സുരക്ഷാസേന നടത്തിയ പ്രത്യേക ഓപ്പറേഷനിൽ കൊടുംഭീകരൻ മുഹമ്മദ് ലത്തീഫ് ഭട്ട് (23) കൊല്ലപ്പെട്ടു. തെക്കൻ കശ്മീരിലെ പ്രാദേശിക ഭീകര കമാൻഡറായി പ്രവർത്തിച്ചിരുന്ന ഇയാളെ ഒരു വർഷത്തോളം നീണ്ട തിരച്ചിലിനൊടുവിലാണ് സൈന്യം വധിച്ചത്.

കുൽഗാം സ്വദേശിയായ ലത്തീഫ് ഭട്ട് മേഖലയിലെ വിവിധ ഭീകരപ്രവർത്തനങ്ങളുടെ മുഖ്യ സൂത്രധാരനായിരുന്നുവെന്ന് സൈനിക വൃത്തങ്ങൾ വ്യക്തമാക്കി. കഴിഞ്ഞയാഴ്ച കുൽഗാമിൽ മൂന്ന് സിആർപിഎഫ് ഉദ്യോഗസ്ഥർക്ക് നേരെയുണ്ടായ ആക്രമണത്തിന് നേതൃത്വം നൽകിയതും ഇയാളായിരുന്നു. ഈ ആക്രമണത്തിന് പിന്നാലെ സുരക്ഷാസേന പ്രദേശത്ത് തിരച്ചിൽ ശക്തമാക്കിയിരുന്നു.

മുൻപ് മരപ്പണിക്കാരനായിരുന്ന ഭട്ട് ഭീകരസംഘടനയിൽ എത്തിയത് എങ്ങനെയെന്നതിനെക്കുറിച്ച് വ്യക്തമായ വിവരങ്ങളില്ല. 2025 നവംബർ 17ന് ഇയാൾ ലഷ്കറെ തയിബയുമായി ബന്ധമുള്ള ‘കശ്മീർ റവല്യൂഷൻ ആർമി’യിൽ ചേർന്നതായി സമൂഹമാധ്യമങ്ങളിൽ പ്രചരിച്ചിരുന്നു. പിന്നീട് ഇയാളെ കാണാനില്ലെന്ന് കുടുംബം കുൽഗാം പൊലീസിൽ പരാതി നൽകുകയും ചെയ്തിരുന്നു.

കൃത്യമായ രഹസ്യാന്വേഷണ വിവരങ്ങളുടെ അടിസ്ഥാനത്തിലാണ് സൈന്യവും ജമ്മു കശ്മീർ പൊലീസും സംയുക്തമായി കുൽഗാമിൽ തിരച്ചിൽ ആരംഭിച്ചത്. ഒളിച്ചിരുന്ന ഭീകരൻ സുരക്ഷാസേനയ്ക്ക് നേരെ വെടിയുതിർത്തതോടെയാണ് ഏറ്റുമുട്ടൽ ആരംഭിച്ചത്. തുടർന്ന് സൈന്യം നടത്തിയ ശക്തമായ പ്രത്യാക്രമണത്തിലാണ് ഭട്ടിനെ വധിച്ചത്.

Army kills terrorist commander Mohammad Latif Bhat, who attacked CRPF personnel

More Stories from this section

family-dental
witywide