ന്യൂയോർക്കിൽ എഫ്.ബി.ഐ ഓഫീസിന് മുന്നിൽ തീവെപ്പും പടക്കം പൊട്ടിക്കലും: മുൻ സൈനികൻ മാരകായുധങ്ങളോടെ പിടിയിൽ

ന്യൂയോർക്ക്: ലോവർ മാൻഹട്ടനിലെ പ്രമുഖ ഫെഡറൽ ഭരണനിർവ്വഹണ സമുച്ചയത്തിന് പുറത്ത് പടക്കം പൊട്ടിക്കുകയും തീയിടുകയും ചെയ്ത സംഭവത്തിൽ മുൻ യു.എസ്. സൈനികൻ പിടിയിൽ. തിങ്കളാഴ്ച രാവിലെ എട്ടരയോടെയാണ് സംഭവം. എഫ്.ബി.ഐ, ഐ.സി.ഇ തുടങ്ങി വിവിധ കേന്ദ്ര ഏജൻസികൾ പ്രവർത്തിക്കുന്ന ’26 ഫെഡറൽ പ്ലാസ’യ്ക്ക് മുന്നിലാണ് ആക്രമണം നടന്നത്.

പോക്കിപ്സി സ്വദേശിയായ ആൻഡ്രൂ അറാബാക്ക (43) ആണ് സംഭവത്തിൽ അറസ്റ്റിലായത്. എഫ്.ബി.ഐയും ന്യൂയോർക്ക് സിറ്റി പോലീസും (NYPD) സംയുക്തമായാണ് ഇയാളെ കീഴടക്കിയത്.

കൈക്കോടാലികൾ, വെട്ടുകത്തി, മൂന്ന് കത്തികൾ, സ്ഫോടകവസ്തുക്കൾ, പെയിന്റ് ബോൾ തോക്കുകൾ എന്നിവയുമായാണ് പ്രതി സ്ഥലത്തെത്തിയത്. കെട്ടിടത്തിന് മുന്നിൽ വെച്ച് പടക്കങ്ങൾക്ക് തീ കൊളുത്തിയ ശേഷം, എളുപ്പത്തിൽ തീപിടിക്കുന്ന ദ്രാവകം ഒഴിച്ച് കെട്ടിടത്തിന് തീയിടാൻ ശ്രമിക്കുകയായിരുന്നു. ഉടൻ തന്നെ സ്ഥലത്തുണ്ടായിരുന്ന ഫെഡറൽ ഏജന്റുമാർ ഇയാളെ തടയുകയും കീഴടക്കുകയുമായിരുന്നു. തുടർന്ന് ഫയർഫോഴ്സ് എത്തി തീ വേഗത്തിൽ അണച്ചു. ആക്രമണത്തിനിടെ രണ്ട് സർക്കാർ ഉദ്യോഗസ്ഥർ ഉൾപ്പെടെ മൂന്ന് പേർക്ക് നിസ്സാര പരിക്കേറ്റു.

ആക്രമണം നടത്തിയ പ്രതിക്ക് പിന്നിൽ ശക്തമായ രാഷ്‌ട്രീയ പ്രചോദനമുണ്ടെന്നാണ് എഫ്.ബി.ഐ വിലയിരുത്തുന്നത്. ഇയാൾ അനധികൃത കുടിയേറ്റ വിരുദ്ധ ഏജൻസിയായ ‘ഐ.സി.ഇ’യ്ക്ക് എതിരെ പ്രവർത്തിക്കുന്നയാളാണെന്ന് എഫ്.ബി.ഐ അസിസ്റ്റന്റ് ഡയറക്ടർ ജെയിംസ് ബാർനക്കിൾ വ്യക്തമാക്കി.

“ജനങ്ങളെ അപായപ്പെടുത്തുക എന്ന വ്യക്തമായ ഉദ്ദേശ്യത്തോടെയാണ് ഇയാൾ ആയുധങ്ങളുമായി എത്തിയത്. ഇയാളൊരു സർക്കാർ വിരുദ്ധ തീവ്രവാദിയാണ്.” – ജെയിംസ് ബാർനക്കിൾ (എഫ്.ബി.ഐ അസിസ്റ്റന്റ് ഡയറക്ടർ). ഇയാളുടെ ബാഗിൽ നിന്ന് ഒരു നയപ്രഖ്യാപന രേഖയും പൊലീസ് കണ്ടെടുത്തിട്ടുണ്ട്. പ്രതി ഉപയോഗിച്ച വാഹനം കസ്റ്റഡിയിലെടുത്ത പൊലീസ്, അന്വേഷണത്തിനായി സെർച്ച് വാറന്റിന് അപേക്ഷ നൽകിയിട്ടുണ്ട്.

2001 മുതൽ 2005 വരെ യു.എസ്. ആർമിയിലും ന്യൂയോർക്ക് ആർമി നാഷണൽ ഗാർഡിലും ‘സ്പെഷ്യലിസ്റ്റ്’ റാങ്കിൽ സേവനമനുഷ്ഠിച്ചിട്ടുള്ള വ്യക്തിയാണ് അറാബാക്ക. മുമ്പും മാനസിക വിഭ്രാന്തി കാണിച്ചതിന് ഇയാൾ പൊലീസിന്റെ നിരീക്ഷണത്തിലായിട്ടുണ്ടെങ്കിലും അറസ്റ്റ് ചെയ്യപ്പെട്ടിരുന്നില്ല. സംഭവത്തെക്കുറിച്ച് എഫ്.ബി.ഐയുടെ ജോയിന്റ് ടെററിസം ടാസ്ക് ഫോഴ്സ് അന്വേഷണം ആരംഭിച്ചു. നഗരത്തിൽ സുരക്ഷ ശക്തമാക്കുമെന്നും ഫെഡറൽ അന്വേഷണത്തിന് പൂർണ്ണ പിന്തുണ നൽകുമെന്നും ന്യൂയോർക്ക് സിറ്റി മേയർ അറിയിച്ചു.

Attempted attack on federal building in New York: Ex-soldier arrested with deadly weapons