ട്രംപ് ഭരണകൂടത്തിന്റെ നിയമനടപടി ഭീഷണികൾ മാനസികാരോഗ്യത്തെയും ഔദ്യോഗിക ജോലികളെയും ഗുരുതരമായി ബാധിക്കുന്നതായി കാലിഫോർണിയയിലെ തിരഞ്ഞെടുപ്പ് ഉദ്യോഗസ്ഥർ. ഇതുസംബന്ധിച്ച് വെള്ളിയാഴ്ച കോടതിയിൽ സമർപ്പിച്ച രേഖകളിലാണ് ഉദ്യോഗസ്ഥർ ആശങ്ക അറിയിച്ചത്. സംസ്ഥാനത്തെ വോട്ടർ പട്ടികയുമായി ബന്ധപ്പെട്ട ക്രിമിനൽ അന്വേഷണത്തിന്റെ ഭാഗമായി യുഎസ് നീതിന്യായ വകുപ്പ് ഈ ആഴ്ച കാലിഫോർണിയയിലെ പ്രാദേശിക തിരഞ്ഞെടുപ്പ് ഉദ്യോഗസ്ഥർക്ക് ഗ്രാൻഡ് ജൂറി സമൻസുകൾ അയച്ചിരുന്നു.
ഫെഡറൽ സർക്കാരിന്റെ നടപടികൾ തനിക്കും ജീവനക്കാർക്കും കടുത്ത സമ്മർദമുണ്ടാക്കുന്നതായി സാന്താ ക്ലാര കൗണ്ടിയിലെ മുതിർന്ന തിരഞ്ഞെടുപ്പ് ഉദ്യോഗസ്ഥൻ മാറ്റ് മൊറാലസ് കോടതിയെ അറിയിച്ചു. ഭീഷണിയോട് പ്രതികരിക്കാൻ ഏറെ സമയം ചെലവഴിക്കേണ്ടിവരുന്നത് കടുത്ത നിരാശയും സമ്മർദവും സൃഷ്ടിക്കുന്നതായി കോൺട്രാ കോസ്റ്റ കൗണ്ടി രജിസ്ട്രാർ ക്രിസ്റ്റിൻ കോണലിയും വ്യക്തമാക്കി. കുറ്റകൃത്യത്തിന് കേസെടുക്കുമെന്ന് മുന്നറിയിപ്പ് നൽകുന്ന കത്ത് ആഭ്യന്തര സുരക്ഷാ വകുപ്പ് ഉദ്യോഗസ്ഥർ കൈമാറിയപ്പോൾ ഭയവും ഉത്കണ്ഠയും തോന്നിയെന്നും താൻ അറസ്റ്റിലായാൽ ഓഫീസ് എങ്ങനെ പ്രവർത്തിക്കുമെന്നതടക്കം അടിയന്തര പദ്ധതി തയ്യാറാക്കേണ്ടിവന്നതായും സാൻ ബെനിറ്റോ കൗണ്ടി രജിസ്ട്രാർ ഫ്രാൻസിസ്കോ ഡയസ് വ്യക്തമാക്കി.
നീതിന്യായ വകുപ്പിന്റെ ഭീഷണികൾ തടയാൻ ഫെഡറൽ കോടതിയോട് ആവശ്യപ്പെട്ടുള്ള ഹർജിയുടെ ഭാഗമായാണ് ഉദ്യോഗസ്ഥരുടെ മൊഴികൾ സമർപ്പിച്ചത്. ഇതിനിടെ, സംസ്ഥാന-പ്രാദേശിക തിരഞ്ഞെടുപ്പ് ഉദ്യോഗസ്ഥരെ ഭീഷണിപ്പെടുത്തുന്നത് നവംബർ 16 വരെ താൽക്കാലികമായി തടഞ്ഞ് ഫെഡറൽ ജഡ്ജി ട്രിന തോംസൺ ഉത്തരവിട്ടു. രജിസ്റ്റർ ചെയ്ത വോട്ടറുടെ ബാലറ്റ് വോട്ടുചെയ്യാൻ അർഹതയില്ലാത്തയാളുടേതാണെന്ന് നീതിന്യായ വകുപ്പ് ആരോപിക്കുന്നതിന്റെ പേരിൽ മാത്രം അതിന്റെ നടപടികൾ നിർത്താൻ ഉദ്യോഗസ്ഥരെ ഭീഷണിപ്പെടുത്തുകയോ സമ്മർദത്തിലാക്കുകയോ ചെയ്യരുതെന്ന് കോടതി വ്യക്തമാക്കി.
ഭീഷണികൾ വ്യക്തിപരമായ ഉത്കണ്ഠ മാത്രമല്ല, ഔദ്യോഗിക ജോലികളിൽ തടസ്സവും സൃഷ്ടിക്കുന്നതായി തിരഞ്ഞെടുപ്പ് ഉദ്യോഗസ്ഥർ പറഞ്ഞു. തിരഞ്ഞെടുപ്പ് ദിനത്തോടനുബന്ധിച്ച് ഫെഡറൽ ഉദ്യോഗസ്ഥരുടെ ഇടപെടലുണ്ടായാൽ അത് നേരിടാനുള്ള മുന്നൊരുക്കങ്ങൾ നടത്തേണ്ടിവരുന്നതായും അവർ അറിയിച്ചു. നിയമപാലകരുടെയോ ഫെഡറൽ ഏജന്റുമാരുടെയോ ഇടപെടലുണ്ടായാൽ സംഘർഷം ഒഴിവാക്കാനും സുരക്ഷ ഉറപ്പാക്കാനുമുള്ള നടപടികൾ ഉൾപ്പെടുത്തി തിരഞ്ഞെടുപ്പ് ജീവനക്കാർക്കും സന്നദ്ധപ്രവർത്തകർക്കുമുള്ള പരിശീലനം പുതുക്കേണ്ടിവന്നതായി മൊറാലസ് പറഞ്ഞു.
ഭീഷണികൾ കാരണം ജീവനക്കാരും സന്നദ്ധപ്രവർത്തകരും ജോലി ഉപേക്ഷിച്ചേക്കാമെന്നും ഇത് വോട്ടെണ്ണൽ കൂടുതൽ ദുഷ്കരമാക്കുമെന്നും ഉദ്യോഗസ്ഥർ ആശങ്ക പ്രകടിപ്പിച്ചു. വെള്ളിയാഴ്ച സാൻ ബെനിറ്റോ കൗണ്ടിയിൽ നാല് പോളിങ് ജീവനക്കാർ ജോലിക്കെത്തിയില്ലെന്നും ഡയസ് അറിയിച്ചു. കോടതിയിലെ രേഖകളോട് ട്രംപ് ഭരണകൂടം ഉടൻ പ്രതികരിച്ചിട്ടില്ല. അതേസമയം, പൗരന്മാരല്ലാത്തവരുടെ വോട്ടിങ് ക്രിമിനൽ നിയമപ്രകാരം കൈകാര്യം ചെയ്യേണ്ട വിഷയമാണെന്നാണ് നീതിന്യായ വകുപ്പിന്റെ നിലപാട്.
California election workers describe toll of DOJ threats in court filings
