പശ്ചിമേഷ്യയിൽ നിലനിൽക്കുന്ന സംഘർഷാവസ്ഥയുടെ പശ്ചാത്തലത്തിൽ, പ്രത്യേകിച്ചും സൗദി അറേബ്യയിലുള്ള മലയാളികൾക്കായി മുഖ്യമന്ത്രി വി.ഡി. സതീശന്റെ നിർദ്ദേശപ്രകാരം ഡൽഹി കേരള ഹൗസിൽ പ്രത്യേക കൺട്രോൾ റൂം തുറന്നു. 011-23747079 എന്ന നമ്പറിലും 9310443880 എന്ന വാട്ട്‌സ്ആപ്പ് നമ്പറിലും കൺട്രോൾ റൂമുമായി ബന്ധപ്പെടാവുന്നതാണ്. 24 മണിക്കൂറും പ്രവർത്തിക്കുന്ന ഈ കൺട്രോൾ റൂമിന്റെ നോഡൽ ഓഫീസറായി നോർക്ക ഡെവലപ്‌മെന്റ് ഓഫീസർ ജെ. ഷാജിമോനെയും, വിദേശകാര്യ മന്ത്രാലയവുമായി ഏകോപനം നടത്തുന്നതിനായി അഡീഷണൽ റസിഡന്റ് കമ്മീഷണറുടെ ചുമതലയുള്ള രാഹുൽ കെ. ജയ്‌സ്വാളിനെയും ചുമതലപ്പെടുത്തിയിട്ടുണ്ട്. റിയാദിലെയും ജിദ്ദയിലെയും ഇന്ത്യൻ എംബസികളുമായി ചേർന്ന് പ്രവർത്തിക്കാനാണ് റസിഡന്റ് കമ്മീഷണർ പുനീത് കുമാറിന്റെ നിർദ്ദേശം.
അതിനിടെ, മിഡിൽ ഈസ്റ്റിലെ സംഘർഷാവസ്ഥ രൂക്ഷമായ സാഹചര്യത്തിൽ അമേരിക്കൻ പൗരന്മാർക്കായി യു.എസ്. പുതിയ ജാഗ്രതാ നിർദ്ദേശം പുറപ്പെടുവിച്ചു. സംഘർഷം കൂടുതൽ വ്യാപിക്കാൻ സാധ്യതയുള്ളതിനാൽ പൗരന്മാർ അതീവ ജാഗ്രത പാലിക്കണമെന്നാണ് മുന്നറിയിപ്പ്. മേഖലയിലെ സുരക്ഷാ സാഹചര്യം വിലയിരുത്തി ആവശ്യമായ മുൻകരുതലുകൾ സ്വീകരിക്കാൻ എംബസികൾ നിർദ്ദേശം നൽകിയിട്ടുണ്ട്.
സൗദിയിൽ ഹൂതികളുടെ ഭാഗത്തുനിന്നും കനത്ത ആക്രമണങ്ങളാണ് റിപ്പോർട്ട് ചെയ്യപ്പെടുന്നത്. റിയാദ്, ദമാം, നജ്റാൻ വിമാനത്താവളങ്ങൾ ആക്രമിച്ചതായി ഹൂതികൾ അവകാശപ്പെട്ടു. കൂടാതെ, ഈസ്റ്റ്-വേസ്റ്റ് പൈപ്പ്‌ലൈൻ, റാബിഗ് ഓയിൽ റിഫൈനറി, യാമ്പുവിലെ ആരാംകോ കമ്പനി എന്നിവയ്ക്ക് നേരെയും ആക്രമണം നടത്തിയതായി അവർ അവകാശപ്പെടുന്നു. മേഖലയിലെ ഈ പുതിയ സംഭവവികാസങ്ങൾ വലിയ ആശങ്കയാണ് സൃഷ്ടിച്ചിരിക്കുന്നത്.
Control Room Opened at Kerala House in Delhi for Malayalis Amid Gulf Crisis; US Updates Travel Advisory as Houthi Attacks Intensify
