വാഷിംഗ്ടൺ: പൊതുവേദികളിലെ സജീവ സാന്നിധ്യവും തുറന്നുപറച്ചിലുകളും കൊണ്ട് എപ്പോഴും വാർത്തകളിൽ നിറയാറുള്ള യു.എസ് പ്രസിഡൻ്റ് ഡോണാൾഡ് ട്രംപ് വീണ്ടും പൊതുവേദിയിൽ ഉറങ്ങിപ്പോയതായി ആക്ഷേപം. ഓവൽ ഓഫീസിൽ വെച്ച് നടന്ന തൻ്റെ റിലീജിയസ് ലിബേർട്ടി കമ്മീഷൻ അംഗങ്ങളുമായുള്ള നിർണായക കൂടിക്കാഴ്ചയ്ക്കിടയിലാണ് സംഭവമെന്നാണ് റിപ്പോർട്ട്.
അമേരിക്കയിലെ മതസ്വാതന്ത്ര്യം ഉറപ്പാക്കുന്ന പ്രധാന ഘടകമായ ‘ഭരണകൂടവും മതവും തമ്മിലുള്ള വേർതിരിവ്’ നീക്കം ചെയ്യാൻ തങ്ങൾ ആഗ്രഹിക്കുന്നുവെന്ന് സമിതി അംഗങ്ങൾ യോഗത്തിൽ പ്രഖ്യാപിച്ചിരുന്നു. എന്നാൽ ഇത്രയും ഗൗരവമേറിയ ചർച്ചകൾ നടക്കുന്നതിനിടയിലും, ട്രംപ് ഉറക്കം തൂങ്ങുന്ന ദൃശ്യങ്ങളിലേക്കാണ് സോഷ്യൽ മീഡിയയുടെ ശ്രദ്ധ തിരിഞ്ഞത്.
ടെക്സസ് ലെഫ്റ്റനൻ്റ് ഗവർണർ ഡാൻ പാട്രിക് മാധ്യമങ്ങളോട് സംസാരിക്കുന്നതിനിടയിൽ ട്രംപ് കുറച്ചുനേരം കണ്ണുകൾ അടച്ച് ഇരിക്കുന്നതും, പിന്നീട് മറ്റൊരു സ്പീക്കർ സംസാരിക്കുമ്പോൾ കണ്ണ് തുറന്ന് നോക്കുന്നതുമായ ദൃശ്യങ്ങളാണ് ഓൺലൈനിൽ പ്രചരിക്കുന്നത്. ഇതോടെ ട്രംപ് വീണ്ടും ഉറങ്ങിപ്പോയെന്ന രീതിയിൽ സോഷ്യൽ മീഡിയയിൽ വലിയ പരിഹാസങ്ങളും ചർച്ചകളും ഉയർന്നു തുടങ്ങി.
മുൻപ് മെയ് മാസത്തിൽ സമാനമായ ഒരു സംഭവം ഉണ്ടായപ്പോൾ, ട്രംപ് ഉറങ്ങിയതല്ലെന്നും കണ്ണുകൾ ദീർഘനേരം ചിമ്മിയതാണെന്നുമാണ് വൈറ്റ് ഹൗസ് വിശദീകരിച്ചിരുന്നത്. ഇതിനെ പരിഹസിച്ചുകൊണ്ട്, ട്രംപിൻ്റെ ഇത്തരം “കണ്ണുചിമ്മൽ” സമയങ്ങളിൽ അദ്ദേഹത്തെ ആരെങ്കിലും വിളിച്ചുണർത്തണമെന്നാണ് സോഷ്യൽ മീഡിയ ഉപയോക്താക്കൾ ഇപ്പോൾ കുറിക്കുന്നത്. ഇക്കഴിഞ്ഞ ഫെബ്രുവരിയിൽ നടന്ന ബോർഡ് ഓഫ് പീസ് യോഗത്തിലും ട്രംപ് ഉറക്കം തൂങ്ങുന്ന ദൃശ്യങ്ങൾ വൈറലായിരുന്നു.
അതേസമയം, ട്രംപിൻ്റെ ശ്രദ്ധക്കുറവിനെക്കുറിച്ചുള്ള ചോദ്യങ്ങളോട് വൈറ്റ് ഹൗസ് വക്താവ് ഡേവിസ് ഇംഗ്ലെ രൂക്ഷമായാണ് പ്രതികരിച്ചത്. മുൻ പ്രസിഡൻ്റ് ജോ ബൈഡൻ്റെ ശാരീരിക-മാനസിക തളർച്ചകൾ മറച്ചുവെക്കാൻ മാധ്യമങ്ങൾ ശ്രമിച്ചതുപോലെ അല്ല ട്രംപെന്നും, ചരിത്രത്തിലെ തന്നെ ഏറ്റവും ഊർജ്ജസ്വലനും കാര്യപ്രാപ്തിയുമുള്ള പ്രസിഡൻ്റാണ് ട്രംപെന്നും അദ്ദേഹം വ്യക്തമാക്കി. ട്രംപ് തൻ്റെ വാഗ്ദാനങ്ങൾ പാലിക്കാൻ വിശ്രമമില്ലാതെ ജോലി ചെയ്യുകയാണെന്നും വക്താവ് കൂട്ടിച്ചേർത്തു.
ട്രംപിൻ്റെ പ്രായവും ആരോഗ്യസ്ഥിതിയും സംബന്ധിച്ച ചർച്ചകൾ സമീപകാലത്ത് വലിയ തോതിൽ അന്താരാഷ്ട്ര മാധ്യമങ്ങളിലും സോഷ്യൽ മീഡിയയിലും സജീവമാണ്. 2026 മേയ് മാസത്തിൽ വാൾട്ടർ റീഡ് നാഷണൽ മിലിട്ടറി മെഡിക്കൽ സെന്ററിൽ വെച്ച് ട്രംപ് തൻ്റെ വാർഷിക ആരോഗ്യ പരിശോധന പൂർത്തിയാക്കിയിരുന്നു. പരിശോധന ഫലങ്ങൾ “തികച്ചും തൃപ്തികരമാണ്”എന്ന് ട്രംപ് തന്നെ വ്യക്തമാക്കിയിരുന്നു. ട്രംപിൻ്റെ ഹൃദയമിടിപ്പ്, ശ്വാസകോശ പ്രവർത്തനം, നാഡീവ്യൂഹം എന്നിവ മികച്ച നിലയിലാണെന്ന് വൈറ്റ് ഹൗസ് ഫിസിഷ്യൻ പുറത്തുവിട്ട റിപ്പോർട്ടിൽ പറയുന്നു. അദ്ദേഹം തൻ്റെ ചുമതലകൾ നിർവഹിക്കാൻ പൂർണ്ണ സജ്ജനാണെന്നും ഡോക്ടർമാർ സാക്ഷ്യപ്പെടുത്തുന്നു.
2025 ജൂലൈയിൽ ട്രംപിന് ‘ക്രോണിക് വീനസ് ഇൻസഫിഷ്യൻസി’ ഉള്ളതായി സ്ഥിരീകരിച്ചിരുന്നു. പ്രായമായവരിൽ കാലുകളിലെ ഞരമ്പുകളിൽ രക്തം കെട്ടിക്കിടന്ന് വീക്കമുണ്ടാകുന്ന സാധാരണമായ ഒരു അവസ്ഥയാണിത്. ട്രംപിൻ്റെ കാലുകളിലും കണങ്കാലുകളിലും കാണപ്പെട്ട വീക്കത്തിന് കാരണം ഇതാണെന്ന് ഡോക്ടർമാർ വ്യക്തമാക്കി. പൊതുപരിപാടികൾക്കിടയിൽ ട്രംപിൻ്റെ കൈകളിൽ കറുത്ത പാടുകളും തടിപ്പുകളും, കഴുത്തിൽ ചെറിയ ചുവന്ന പാടുകളും കണ്ടത് വലിയ ചർച്ചയായിരുന്നു. എന്നാൽ നിത്യേന ആസ്പിരിൻ ഗുളിക കഴിക്കുന്നതുകൊണ്ടും, നിരന്തരമായി ആളുകൾക്ക് കൈ കൊടുക്കുന്നതുകൊണ്ടുമാണ് കൈകളിൽ ഇത്തരം പാടുകൾ ഉണ്ടാകുന്നതെന്നാണ് വൈറ്റ് ഹൗസിൻ്റെ വിശദീകരണം.
നിലവിൽ 238 പൗണ്ട് (ഏകദേശം 108 കിലോഗ്രാം) ഭാരമുള്ള ട്രംപിനോട് ശരീരഭാരം കുറയ്ക്കാനും, ഭക്ഷണക്രമം നിയന്ത്രിക്കാനും, വ്യായാമം കൂട്ടാനും ഡോക്ടർമാർ നിർദ്ദേശിച്ചിട്ടുണ്ട്.
എന്നാൽ, വൈറ്റ് ഹൗസ് പുറത്തുവിടുന്ന മെഡിക്കൽ റിപ്പോർട്ടുകൾ പൂർണ്ണമല്ലെന്നും, ട്രംപിൻ്റെ യഥാർത്ഥ ആരോഗ്യ വിവരങ്ങൾ അദ്ദേഹത്തിൻ്റെ അടുത്ത സഹായികളിൽ നിന്ന് പോലും മറച്ചുവെക്കുകയാണെന്നും ചില രാഷ്ട്രീയ നിരീക്ഷകരും പുസ്തക രചയിതാക്കളും ആരോപിക്കുന്നുണ്ട്. പ്രതിപക്ഷം ട്രംപിൻ്റെ പ്രായത്തെയും പൊതുവേദികളിലെ ക്ഷീണത്തെയും രാഷ്ട്രീയ ആയുധമാക്കുമ്പോൾ, മെഡിക്കൽ റിപ്പോർട്ടുകൾ ചൂണ്ടിക്കാട്ടി ട്രംപ് അതീവ ആരോഗ്യവാനും ഊർജ്ജസ്വലനുമാണെന്നാണ് വൈറ്റ് ഹൗസും അനുകൂലികളും വാദിക്കുന്നത്.
Did Trump fall asleep again? Footage from the Religious Affairs Committee meeting is being discussed
