ടെഹ്റാൻ: മിഡിൽ ഈസ്റ്റിൽ യുദ്ധം കടുക്കുന്നതിനിടെ അമേരിക്കൻ സൈനികരെ ലക്ഷ്യമിട്ട് ഇറാൻ സൈന്യത്തിൻ്റെ പുതിയ നീക്കം. യു.എസ് സൈനികരെ വധിക്കുകയോ ജീവനോടെ പിടികൂടുകയോ ചെയ്യുന്നവർക്ക് 30,000 ഡോളർ പ്രതിഫലം നൽകുമെന്ന് ഇറാൻ സൈന്യം ഔദ്യോഗികമായി പ്രഖ്യാപിച്ചു. ഏതെങ്കിലും വനിതയാണ് ഈ ദൗത്യം നടപ്പാക്കുന്നതെങ്കിൽ പ്രതിഫലത്തുക ഇരട്ടിയായി (60,000 ഡോളർ) നൽകുമെന്നും സൈന്യം വ്യക്തമാക്കിയിട്ടുണ്ട്.
ഈ ദൗത്യത്തിൽ പങ്കാളികളാകാൻ രാജ്യത്തെ ജനങ്ങളിൽ നിന്ന് വലിയ തോതിൽ അഭ്യർത്ഥനകൾ ലഭിച്ചതിനെത്തുടർന്നാണ് ഇത്തരമൊരു പദ്ധതിക്ക് രൂപം നൽകിയതെന്ന് ഇറാൻ കരസേനാ മേധാവി അമീർ ഹതാമി അറിയിച്ചു. ഇറാൻ്റെ ഔദ്യോഗിക വാർത്താ ഏജൻസിയായ ‘ഇർന’യാണ് ഈ വിവരം പുറത്തുവിട്ടത്.
“ഞങ്ങളുടെ രാജ്യം ആക്രമിക്കാൻ വരുന്ന ഏതൊരു അമേരിക്കൻ സൈനികനെ വധിക്കുകയോ, ജീവനോടെ പിടികൂടി ഇസ്ലാമിക് റിപ്പബ്ലിക് ഓഫ് ഇറാൻ്റെ സൈന്യത്തിന് കൈമാറുകയോ ചെയ്യുന്നവർക്ക് ഈ തുക ഉറപ്പായും ലഭിക്കും. ധീരരായ ഇറാനിയൻ വനിതകളാണ് ഈ ദൗത്യം നിർവ്വഹിക്കുന്നതെങ്കിൽ അവർക്ക് ഇരട്ടി തുക സമ്മാനമായി നൽകും,” കരസേനാ മേധാവി വ്യക്തമാക്കി.
നിലവിലെ സാഹചര്യത്തിൽ ഇറാൻ്റെ അതിർത്തിക്കുള്ളിൽ അമേരിക്കൻ കാൽനട സൈന്യത്തെ വിന്യസിച്ചിട്ടില്ല. കഴിഞ്ഞ ഏപ്രിൽ മാസത്തിൽ വെടിയേറ്റു വീണ ഒരു അമേരിക്കൻ പൈലറ്റിനെ രക്ഷപ്പെടുത്താൻ വേണ്ടി മാത്രമാണ് യു.എസ് സൈന്യം ഇറാൻ്റെ മണ്ണിൽ ഇറങ്ങി ഒരു താൽക്കാലിക രക്ഷാപ്രവർത്തനം നടത്തിയത്. മിഡിൽ ഈസ്റ്റ് യുദ്ധം ആരംഭിച്ചതിനുശേഷം ഇതുവരെ 17 യു.എസ് സൈനികരാണ് കൊല്ലപ്പെട്ടിട്ടുള്ളത്. ഇതിൽ അവസാനത്തെ മരണങ്ങൾ റിപ്പോർട്ട് ചെയ്തത് ജൂലൈ മാസത്തിലാണ്. കൊല്ലപ്പെട്ട സൈനികരെല്ലാം ജോർദാൻ, ഇറാഖ് തുടങ്ങിയ മറ്റ് അയൽരാജ്യങ്ങളിൽ വെച്ചാണ് ആക്രമിക്കപ്പെട്ടത്.
Iran offers $30,000 reward for capturing US soldiers
