ബ്രസ്സൽസ്: യൂറോപ്യൻ രാജ്യങ്ങളിലെ പ്രമുഖ സൂപ്പർമാർക്കറ്റുകളിലെ ശീതീകരണ സംവിധാനങ്ങൾ (ഫ്രീസറുകൾ) ലക്ഷ്യമിട്ട് വൻ സൈബർ ആക്രമണം. ഇന്റർനെറ്റുമായി ബന്ധിപ്പിച്ചിട്ടുള്ള സ്മാർട്ട് റഫ്രിജറേഷൻ കൺട്രോളുകൾ ഹാക്ക് ചെയ്തായിരുന്നു അട്ടിമറി. ഫ്രീസറുകളിലെ താപനില പെട്ടെന്ന് 50 ഡിഗ്രി സെൽഷ്യസ് വരെ ഉയർത്തിയതിനെത്തുടർന്ന് കോടിക്കണക്കിന് രൂപയുടെ ഭക്ഷ്യവസ്തുക്കൾ പൂർണ്ണമായി നശിച്ചു.
സ്വീഡൻ, ബെൽജിയം, അയർലൻഡ്, ലക്സംബർഗ്, നെതർലാൻഡ്സ്, എസ്റ്റോണിയ, ഫിൻലാൻഡ് തുടങ്ങി നിരവധി യൂറോപ്യൻ രാജ്യങ്ങളിലെ സൂപ്പർമാർക്കറ്റുകളെയാണ് ഈ ആക്രമണം ഒരേസമയം ബാധിച്ചത്. കഴിഞ്ഞ മാസം ഫ്രാൻസിലെ നൂറുകണക്കിന് സ്റ്റോറുകളിലും സമാനമായ ആക്രമണം റിപ്പോർട്ട് ചെയ്തിരുന്നു. അഹോൾഡ് ഡെൽഹൈസ്, കാരിഫോർ, ഇക, കൂപ്പ്, സൂപ്പർവാലു തുടങ്ങിയ യൂറോപ്പിലെ ഏറ്റവും വലിയ സൂപ്പർമാർക്കറ്റ് ശൃംഖലകളെല്ലാം ഈ ഡിജിറ്റൽ അട്ടിമറിയുടെ ഇരകളായി. പ്രമുഖ ഫർണിച്ചർ ബ്രാൻഡായ ‘ഐകിയ’യുടെ ബെൽജിയത്തിലെ ഔട്ട്‌ലെറ്റിലെ ഫ്രീസറുകൾക്കും കേടുപാടുകൾ സംഭവിച്ചു.
രാത്രികാലങ്ങളിലാണ് ഹാക്കർമാർ സിസ്റ്റത്തിന്റെ നിയന്ത്രണം ഏറ്റെടുത്തത്. ഫ്രീസറുകളെ തണുപ്പിക്കുന്നതിന് പകരം പെട്ടെന്ന് ചൂടാകുന്ന ‘ഡീഫ്രോസ്റ്റ്’ മോഡിലേക്ക് മാറ്റുകയായിരുന്നു. രാവിലെ ജീവനക്കാർ എത്തിയപ്പോഴേക്കും ഫ്രീസറുകളിലുണ്ടായിരുന്ന മാംസം, പാൽ ഉൽപന്നങ്ങൾ, ഐസ്ക്രീമുകൾ, മറ്റ് പായ്ക്ക് ചെയ്ത ഭക്ഷണങ്ങൾ എന്നിവയെല്ലാം പൂർണ്ണമായി ഉരുകിയും കേടുവന്നും നശിച്ച നിലയിലായിരുന്നു.
പല മുൻനിര സൂപ്പർമാർക്കറ്റുകളിലും ഉപയോഗിക്കുന്ന ഡാനിഷ് കമ്പനിയായ ‘ഡാൻഫോസ്’ നിർമ്മിച്ച പഴയ മോഡൽ കൺട്രോളറുകളിലെ സുരക്ഷാ വീഴ്ചയാണ് ഹാക്കർമാർ ചൂഷണം ചെയ്തത്. ഇവയ്ക്ക് പുതിയ സുരക്ഷാ അപ്‌ഡേറ്റുകൾ ലഭ്യമല്ലാത്തതാണ് ഹാക്കിങ് എളുപ്പമാക്കിയത്.
യൂറോപ്പിന്റെ ഭക്ഷ്യശൃംഖലയെ തകർക്കാനും വിപണിയിൽ ബോധപൂർവ്വം അസ്ഥിരതയുണ്ടാക്കാനും നടത്തിയ വലിയൊരു നീക്കമായാണ് യൂറോപ്യൻ യൂണിയൻ അധികൃതർ ഈ സംഭവത്തെ കാണുന്നത്. ആക്രമണത്തിന് പിന്നിൽ പ്രവർത്തിച്ച സൈബർ ക്രിമിനലുകളെ കണ്ടെത്താൻ അന്വേഷണം ഊർജ്ജിതമാക്കിയിട്ടുണ്ട്.
Digital sabotage shocks Europe; supermarket fridges hacked, food stocks worth crores destroyed.
