വാഷിംഗ്ടൺ: യുഎസിൽ ഇമിഗ്രേഷൻ ആൻഡ് കസ്റ്റംസ് എൻഫോഴ്സ്മെന്റ് ഏജന്റുമാർ ഉൾപ്പെട്ട മാരകമായ വെടിവെപ്പുകളെത്തുടർന്ന് രാജ്യവ്യാപകമായി വാഹന പരിശോധനകൾ താൽക്കാലികമായി നിർത്തിവെക്കാനുള്ള തീരുമാനത്തെ എതിർത്ത് യുഎസ് പ്രസിഡന്റ് ഡോണൾഡ് ട്രംപ്. കുറ്റകൃത്യങ്ങൾ തടയുന്നതിനുള്ള ഏറ്റവും പ്രധാനപ്പെട്ടതും ഫലപ്രദവുമായ മാർഗ്ഗങ്ങളിലൊന്നാണ് വാഹനങ്ങൾ തടഞ്ഞുള്ള പരിശോധനയെന്നും അത് ഉപേക്ഷിക്കരുതെന്നും ട്രംപ് വ്യക്തമാക്കി.
ടെക്സാസിലും മെയ്നിലും ഐസിഇ ഏജന്റുമാരുടെ നടപടിക്കിടെ രണ്ട് പേർ കൊല്ലപ്പെട്ടതിന് പിന്നാലെയാണ് രാജ്യവ്യാപകമായി വാഹന പരിശോധനകൾക്ക് കർശന നിയന്ത്രണം ഏർപ്പെടുത്താൻ ആഭ്യന്തര സുരക്ഷാ വകുപ്പ് തീരുമാനിച്ചത്. എന്നാൽ ഈ തീരുമാനത്തിന് തൊട്ടുപിന്നാലെ ട്രംപ് തന്റെ സോഷ്യൽ മീഡിയ പ്ലാറ്റ്ഫോമായ ‘ട്രൂത്ത് സോഷ്യൽ’ വഴി ഇതിനെതിരെ രംഗത്തുവരികയായിരുന്നു.
“കുറ്റകൃത്യങ്ങൾക്കെതിരെയുള്ള ഏറ്റവും ഫലപ്രദമായ ആയുധങ്ങളിലൊന്നായ വാഹന പരിശോധനകൾ നമുക്ക് ഉപേക്ഷിക്കാൻ കഴിയില്ല. അങ്ങനെ ചെയ്യുന്നത് കുറ്റവാളികളെ സഹായിക്കുന്നതിന് തുല്യമാണ്. രാജ്യത്ത് കുറ്റകൃത്യങ്ങളുടെ നിരക്ക് വലിയ രീതിയിൽ കുറയ്ക്കാൻ ഐസിഇയുടെ പ്രവർത്തനം സഹായിച്ചിട്ടുണ്ട്,” ട്രംപ് കുറിച്ചു.
അതേസമയം, ട്രംപിന്റെ അതിർത്തി കാര്യങ്ങളുടെ ചുമതലയുള്ള ടോം ഹോമാൻ മുൻപ് അറിയിച്ചത് ഈ നിരോധനം താൽക്കാലികം മാത്രമാണെന്നാണ്. എന്നാൽ പ്രസിഡന്റിന്റെ പ്രതികരണത്തിന് പിന്നാലെ നയം വ്യക്തമാക്കിയ ആഭ്യന്തര സുരക്ഷാ വകുപ്പ് സെക്രട്ടറി മാർക്ക്വെയ്ൻ മുള്ളിൻ, നിയമവിരുദ്ധമായി രാജ്യത്ത് കഴിയുന്നവരെ എവിടെവെച്ചും അറസ്റ്റ് ചെയ്യുമെന്നും അതിർത്തി കടന്നവർ അറസ്റ്റിൽ നിന്ന് രക്ഷപ്പെടാൻ ശ്രമിക്കുന്നത് അപകടകരമാണെന്നും ഓർമ്മിപ്പിച്ചു.
അടുത്തിടെയുണ്ടായ ചില മാരകമായ സംഭവങ്ങളാണ് നിലവിലെ വിവാദങ്ങൾക്ക് കാരണം. മെയ്നിൽ നടന്ന ഒരു റെയ്ഡിനിടെ 25 കാരനായ കൊളംബിയൻ സ്വദേശി ജോഹാൻ സെബാസ്റ്റ്യൻ ദുരൻ ഗ്വിറേറോ ഐസിഇ ഏജന്റിന്റെ വെടിയേറ്റു മരിച്ചിരുന്നു. ഇയാൾക്ക് യുഎസിൽ ജോലി ചെയ്യാനുള്ള നിയമപരമായ അനുമതിയുണ്ടായിരുന്നുവെന്ന് മനുഷ്യാവകാശ പ്രവർത്തകർ പറയുന്നു. ടെക്സാസിലെ ഹൂസ്റ്റണിൽ നടന്ന മറ്റൊരു സംഭവത്തിൽ 52 കാരനായ മെക്സിക്കൻ സ്വദേശി ലോറെൻസോ സാൽഗാഡോ അറൗജോയും വെടിയേറ്റു മരിച്ചു. തങ്ങൾ തിരഞ്ഞ പ്രതിയാണെന്ന് തെറ്റിദ്ധരിച്ചാണ് ഉദ്യോഗസ്ഥർ ഇയാൾക്ക് നേരെ വെടിയുതിർത്തത്. ഇതിന് പുറമെ ഫ്ലോറിഡയിൽ ഏജന്റുകളിൽ നിന്ന് രക്ഷപ്പെടാൻ ശ്രമിക്കുന്നതിനിടെ ഒരാൾ ട്രക്ക് ഇടിച്ചും മരിച്ചിരുന്നു.
2025 ജനുവരിക്ക് ശേഷം മാത്രം ഇമിഗ്രേഷൻ എൻഫോഴ്സ്മെന്റ് നടപടികൾക്കിടെ ഏഴോളം പേർ മരിച്ചതായാണ് റിപ്പോർട്ടുകൾ. ഐസിഇക്ക് നൽകിയിട്ടുള്ള അറസ്റ്റ്, നാടുകടത്തൽ ക്വാട്ടകളാണ് ഇത്തരം അനിഷ്ട സംഭവങ്ങളിലേക്ക് നയിക്കുന്നതെന്ന് ഡെമോക്രാറ്റിക് സെനറ്റർ ഡിക് ഡർബിൻ കുറ്റപ്പെടുത്തി. ഏജൻസി അടിസ്ഥാനപരമായ പോലീസ് നിയമങ്ങൾ പാലിക്കുന്നില്ലെന്നും അദ്ദേഹം ആരോപിച്ചു. വെടിവെപ്പുകളെത്തുടർന്ന് അമേരിക്കയിലെ വിവിധ നഗരങ്ങളിൽ ശക്തമായ പ്രതിഷേധങ്ങളാണ് ഉയർന്നുവരുന്നത്.
Donald Trump says vehicle checks should not stop even after dangerous shootings; US President supports ICE
