ഹവാന: ക്യൂബയുടെ പടിഞ്ഞാറൻ തീരത്തിന് സമീപം തിങ്കളാഴ്ച 6.1 തീവ്രത രേഖപ്പെടുത്തിയ ഭൂചലനം ഉണ്ടായി. ഭൂചലനത്തിന്റെ പ്രകമ്പനം അമേരിക്കയിലെ ഫ്ലോറിഡ സംസ്ഥാനത്തും മെക്സിക്കോയുടെ ചില ഭാഗങ്ങളിലും അനുഭവപ്പെട്ടതായി റിപ്പോർട്ടുകൾ. അമേരിക്കൻ ജിയോളജിക്കൽ സർവേ (USGS)യുടെ കണക്കുകൾ പ്രകാരം, ക്യൂബയുടെ പടിഞ്ഞാറൻ അറ്റത്തിൽ നിന്ന് ഏകദേശം 100 കിലോമീറ്റർ അകലെയുള്ള സമുദ്രഭാഗത്താണ് ഭൂചലനം ഉണ്ടായത്.
റിക്ടർ സ്കെയിലിൽ 6.1 തീവ്രത രേഖപ്പെടുത്തിയ ഭൂചലനം പ്രദേശവാസികളിൽ ആശങ്ക പരത്തി. ക്യൂബയിലെ നിരവധി പ്രദേശങ്ങളിൽ ഏകദേശം 20 സെക്കൻഡ് നേരം ശക്തമായ കുലുക്കം അനുഭവപ്പെട്ടതായി നാട്ടുകാർ പറഞ്ഞു. കെട്ടിടങ്ങളിൽ ഉണ്ടായിരുന്നവർ ഭയന്ന് പുറത്തിറങ്ങി തെരുവുകളിലേക്ക് ഓടിയെത്തി.
അതേസമയം, ഫ്ലോറിഡയുടെ വിവിധ ഭാഗങ്ങളിൽ താമസിക്കുന്നവരും ഭൂമി കുലുങ്ങിയതായി റിപ്പോർട്ട് ചെയ്തു. കഴിഞ്ഞ അരമണിക്കൂറിനിടെ തെക്കുപടിഞ്ഞാറൻ ഫ്ലോറിഡയിൽ നിന്ന് നിരവധി കുലുക്ക റിപ്പോർട്ടുകൾ ലഭിച്ചതായി മയാമി-സൗത്ത് ഫ്ലോറിഡ ദേശീയ കാലാവസ്ഥാ സേവന കേന്ദ്രം അറിയിച്ചു.
ക്യൂബയുടെ പടിഞ്ഞാറ് ഭാഗത്തുള്ള തെക്കൻ ഗൾഫ് മേഖലയിലാണ് ഭൂചലനം ഉണ്ടായതെന്നും ഇതിൻ്റെ പ്രകമ്പനം ഫ്ലോറിഡയിലെ വിവിധ പ്രദേശങ്ങളിൽ അനുഭവപ്പെട്ടതായി റിപ്പോർട്ടുകൾ ലഭിച്ചിട്ടുണ്ട് എന്നും അധികൃതർ അറിയിച്ചു.
Earthquake of 6.1 magnitude jolts Cuba, tremors felts in Florida, Mexico
