വാഷിംഗ്ടൺ: യുഎസിലെ കോവിഡ്-19 ഗവേഷണങ്ങളുമായി ബന്ധപ്പെട്ട നിർണായക പൊതുരേഖകൾ ഒളിപ്പിക്കാൻ ഗൂഢാലോചന നടത്തിയ കേസിൽ പ്രമുഖ പകർച്ചവ്യാധി വിദഗ്ദ്ധൻ ഡോ. ആൻ്റണി ഫൗസിയുടെ മുൻ മുഖ്യ ഉപദേഷ്ടാവ് ഡേവിഡ് മോറൻസ് (78) ഫെഡറൽ കോടതിയിൽ കുറ്റസമ്മതം നടത്തി. മേരിലാൻഡിലെ ഗ്രീൻബെൽറ്റ് ഫെഡറൽ കോടതിയിലാണ് യുഎസ് ഗവൺമെൻ്റിനെ വഞ്ചിക്കാൻ ഗൂഢാലോചന നടത്തിയെന്ന കുറ്റം മോറൻസ് സമ്മതിച്ചത്.
വിവരാവകാശ നിയമപ്രകാരം പൊതുജനങ്ങൾക്കും മാധ്യമങ്ങൾക്കും ലഭ്യമാകേണ്ട ഔദ്യോഗിക വിവരങ്ങൾ നശിപ്പിക്കാനും മറച്ചുവെക്കാനും ശ്രമിച്ചു എന്നതാണ് ഇദ്ദേഹത്തിനെതിരെയുള്ള പ്രധാന കുറ്റം. നാഷണൽ ഇൻസ്റ്റിറ്റ്യൂട്ട് ഓഫ് അലർജി ആൻഡ് ഇൻഫെക്ഷ്യസ് ഡിസീസസിൽ ദീർഘകാലം സീനിയർ ഉദ്യോഗസ്ഥനായിരുന്നു ഇദ്ദേഹം.
കോവിഡ് വൈറസിൻ്റെ ഉത്ഭവവുമായി ബന്ധപ്പെട്ട ചർച്ചകളും വൂഹാൻ ഇൻസ്റ്റിറ്റ്യൂട്ട് ഓഫ് വൈറോളജിക്ക് നൽകിയ ഫണ്ടിംഗ് വിവരങ്ങളും ഔദ്യോഗികമായി പരിശോധിക്കപ്പെടുന്നത് ഒഴിവാക്കാൻ മോറൻസ് തൻ്റെ ഔദ്യോഗിക ഇമെയിലിന് പകരം വ്യക്തിഗത ജിമെയിൽ അക്കൗണ്ടാണ് ഉപയോഗിച്ചിരുന്നത്. വിവരങ്ങൾ പുറത്താകാതിരിക്കാൻ ഇമെയിലുകൾ എങ്ങനെ അപ്രത്യക്ഷമാക്കണമെന്ന് തനിക്കറിയാമെന്ന് ഇദ്ദേഹം സഹപ്രവർത്തകർക്ക് സന്ദേശം അയച്ചിരുന്നതായും പ്രോസിക്യൂഷൻ കണ്ടെത്തി.
കൂടാതെ, റദ്ദാക്കപ്പെട്ട വവ്വാലുകളിലെ കൊറോണ വൈറസ് ഗവേഷണ ഗ്രാൻ്റ് പുനഃസ്ഥാപിക്കാൻ ഇദ്ദേഹം തൻ്റെ പദവി ദുരുപയോഗം ചെയ്തതായും പ്രോസിക്യൂട്ടർമാർ കോടതിയെ അറിയിച്ചു. ഇതിന് പകരമായി ചില സ്വകാര്യ കമ്പനികളിൽ നിന്ന് കൈക്കൂലി കൈപ്പറ്റിയതായും ആരോപണമുണ്ട്.
കുറ്റസമ്മതത്തിൻ്റെ പശ്ചാത്തലത്തിൽ മോറൻസിന് അഞ്ച് വർഷം വരെ തടവുശിക്ഷ ലഭിച്ചേക്കാം. കേസിൽ വരും മാസങ്ങളിൽ കോടതി അന്തിമ ശിക്ഷാവിധി പ്രഖ്യാപിക്കും. അതേസമയം, മോറൻസിൻ്റെ പ്രവൃത്തികൾ ഏജൻസിയുടെ നയങ്ങൾക്ക് വിരുദ്ധമാണെന്ന് ആൻ്റണി ഫൗസി മുൻപ് വ്യക്തമാക്കിയിരുന്നു. കോവിഡ് മഹാമാരിയുടെ ഉത്ഭവത്തെക്കുറിച്ച് യുഎസിൽ നടക്കുന്ന വിപുലമായ അന്വേഷണങ്ങളിൽ നിർണായകമായ വഴിത്തിരിവാണ് ഈ കുറ്റസമ്മതം.
Former US health adviser David Morans pleads guilty to deceiving government and hiding COVID records
