മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ട് രാജ്യതലസ്ഥാനത്ത് പ്രതിഷേധം ശക്തമാകുന്നു. ഐസ (AISA), എ.എ.പി (AAP), എ.ഐ.എസ്.എഫ് (AISF) എന്നീ സംഘടനകളുടെ നേതൃത്വത്തിൽ ഇന്ത്യ ഗേറ്റിലേക്ക് നടത്തിയ പ്രതിഷേധ മാർച്ച് ഡൽഹി പോലീസ് തടഞ്ഞു. റോഡിൽ ഉപരോധം സൃഷ്ടിച്ച നാല് ബസുകളിലായി നിരവധി പ്രവർത്തകരെ പോലീസ് കസ്റ്റഡിയിലെടുത്തു. തുടർന്ന് ഇന്ത്യ ഗേറ്റിൽ നിന്ന് ജന്തർ മന്ദറിലേക്കും എ.ഐ.എസ്.എഫ് പ്രതിഷേധ മാർച്ച് സംഘടിപ്പിച്ചു. നിലവിൽ ഇന്ത്യ ഗേറ്റ് പരിസരത്ത് വൻ പോലീസ് സന്നാഹമാണ് നിലയുറപ്പിച്ചിരിക്കുന്നത്.
നേരത്തെ നടന്ന പ്രതിഷേധങ്ങളുമായി ബന്ധപ്പെട്ട് ഔദ്യോഗിക ഉത്തരവ് ലംഘിക്കൽ, പോലീസിന്റെ കൃത്യനിർവഹണം തടസ്സപ്പെടുത്തൽ തുടങ്ങിയ ബി.എൻ.എസ് (BNS) വകുപ്പുകൾ ചുമത്തി കണ്ടാലറിയാവുന്ന ആളുകൾക്കെതിരെ ഡൽഹി പോലീസ് കേസെടുത്തിട്ടുണ്ട്. പാർലമെന്റ് സ്ട്രീറ്റ് സ്റ്റേഷനിൽ രണ്ടും കൊണാട്ട് പ്ലേസ് സ്റ്റേഷനിൽ ഒരു കേസുമാണ് രജിസ്റ്റർ ചെയ്തിട്ടുള്ളത്. എഫ്.ഐ.ആറിൽ വ്യക്തികളുടെ പേരുകൾ നേരിട്ട് ചേർത്തിട്ടില്ലെങ്കിലും പ്രതിഷേധം സംഘടിപ്പിച്ച സംഘടനകളുടെ വിവരങ്ങൾ വ്യക്തമായി രേഖപ്പെടുത്തിയിട്ടുണ്ടെന്ന് പോലീസ് ഉദ്യോഗസ്ഥർ സ്ഥിരീകരിച്ചു.
അതേസമയം, പ്രതിഷേധത്തിൽ പങ്കെടുത്ത വനിതാ പ്രവർത്തകരോട് പുരുഷ പോലീസ് മോശമായി പെരുമാറിയെന്ന ആരോപണവുമായി സി.ജെ.പിയും (CJP) ഐസയും രംഗത്തെത്തിയിട്ടുണ്ട്. ഐസയുടെ മാർച്ചിനിടെ വനിതാ പ്രവർത്തകരെ പുരുഷ പോലീസ് വലിച്ചിഴച്ചതായും, എ.സി.പി വിവേക് ഭഗത് ലൈംഗികമായി ഉപദ്രവിച്ചതായും സ്വതന്ത്ര മാധ്യമപ്രവർത്തക ആരോപിച്ചു. കുറ്റക്കാരായ പോലീസ് ഉദ്യോഗസ്ഥർക്കെതിരെ എഫ്.ഐ.ആർ രജിസ്റ്റർ ചെയ്യണമെന്ന് ആവശ്യപ്പെട്ട് പാർലമെന്റ് സ്ട്രീറ്റ് പോലീസ് സ്റ്റേഷനിലേക്ക് മാർച്ച് പ്രഖ്യാപിച്ചതിനെ തുടർന്ന് സ്റ്റേഷന് മുന്നിൽ വൻ ബാരിക്കേഡുകൾ ഉയർത്തി പോലീസ് സുരക്ഷ ശക്തമാക്കി.
CEC Gyanesh Kumar Resignation Demands Escalate: Protests Intensify in Delhi, AAP and Student Wings Detained
