സാന്താക്രൂസ് ഡി ടെനറൈഫ്: അറ്റ്ലാൻ്റിക് സമുദ്രത്തിൽ ഹാന്തവൈറസ് ബാധയെത്തുടർന്ന് കുടുങ്ങിയ ‘എം.വി ഹോണ്ടിയസ്’ എന്ന ക്രൂയിസ് കപ്പലിലെ യാത്രക്കാരെ ഒഴിപ്പിച്ചു തുടങ്ങി. സ്പെയിനിലെ കാനറി ദ്വീപുകളിലെത്തിയ യാത്രക്കാരെ വിവിധ രാജ്യങ്ങൾ അയച്ച പ്രത്യേക വിമാനങ്ങളിലാണ് മടക്കിക്കൊണ്ടുപോകുന്നത്. കപ്പലിലെ യാത്രയ്ക്കിടെ മൂന്ന് യാത്രക്കാർ മരിക്കുകയും നിരവധി പേർക്ക് രോഗം സ്ഥിരീകരിക്കുകയും ചെയ്തതോടെയാണ് യാത്ര പാതിവഴിയിൽ അവസാനിപ്പിച്ചത്.
സ്പെയിനിലെ ഗ്രാനഡില്ല തുറമുഖത്ത് നങ്കൂരമിട്ട കപ്പലിൽ നിന്ന് അതീവ സുരക്ഷാ സജ്ജീകരണങ്ങളോടെയാണ് യാത്രക്കാരെ പുറത്തെത്തിച്ചത്. അമേരിക്ക, ബ്രിട്ടൻ, ജർമ്മനി തുടങ്ങിയ രാജ്യങ്ങളിൽ നിന്നുള്ള യാത്രക്കാരാണ് ആദ്യഘട്ടത്തിൽ മടങ്ങിയത്. ഹസ്മത് സ്യൂട്ടുകൾ ധരിച്ച ആരോഗ്യപ്രവർത്തകർ യാത്രക്കാരെ ഓരോരുത്തരെയായി അണുമുക്തമാക്കിയ ശേഷമാണ് വിമാനത്താവളത്തിലേക്ക് മാറ്റിയത്. അതിനിടെ, ഫ്രാൻസിലേക്ക് മടങ്ങിയ യാത്രക്കാരിൽ ഒരാൾക്ക് വിമാനത്തിൽ വെച്ച് രോഗലക്ഷണങ്ങൾ കണ്ടത് ആശങ്ക വർദ്ധിപ്പിച്ചിട്ടുണ്ട്. ഇവരെ പാരീസിലെ സൈനിക ആശുപത്രിയിൽ ഐസൊലേഷനിലാക്കി.
നാട്ടിലെത്തുന്ന യാത്രക്കാർ 42 ദിവസം വരെ കർശനമായ ക്വാറൻ്റൈനിൽ കഴിയണമെന്ന് അധികൃതർ നിർദ്ദേശിച്ചു. രോഗം ബാധിച്ചവരിൽ രണ്ട് ഇന്ത്യക്കാരും ഉൾപ്പെടുന്നുണ്ടെന്നാണ് വിവരം. കപ്പലിലെ ബാക്കി ജീവനക്കാരുമായി കപ്പൽ നെതർലൻഡ്സിലെ റോട്ടർഡാം തുറമുഖത്തേക്ക് തിരിക്കും. അവിടെ വെച്ച് കപ്പൽ പൂർണ്ണമായും അണുമുക്തമാക്കാനുള്ള നടപടികൾ സ്വീകരിക്കും. അർജൻ്റീനയിലെ വിനോദസഞ്ചാരത്തിനിടെ എലികളിൽ നിന്നാണ് രോഗം പടർന്നതെന്നാണ് പ്രാഥമിക നിഗമനം. മനുഷ്യരിൽ നിന്ന് മനുഷ്യരിലേക്ക് വൈറസ് പടരാൻ സാധ്യതയുണ്ടെന്ന ലോകാരോഗ്യ സംഘടനയുടെ മുന്നറിയിപ്പിനെത്തുടർന്ന് വിമാനത്താവളങ്ങളിലും തുറമുഖങ്ങളിലും കനത്ത ജാഗ്രത തുടരുകയാണ്.
Hantavirus: Cruise ship passengers begin returning home; high alert continues
