വാഷിംഗ്ടൺ: ഇറാനുമായുള്ള യുഎസ് നയതന്ത്ര ചർച്ചകൾ താൽക്കാലികമായി നിർത്തിവച്ചതിനിടയിലും, നിലവിലെ സാഹചര്യം “നല്ല നിലയിലാണ്” എന്ന് വ്യക്തമാക്കി യുഎസ് പ്രസിഡന്റ് ഡോണൾഡ് ട്രംപ്. തന്ത്രപ്രധാനമായ ഹോർമുസ് കടലിടുക്കിനെച്ചൊല്ലി ഇരുരാജ്യങ്ങളും തമ്മിൽ യുദ്ധസമാനമായ കടുത്ത തർക്കം തുടരുന്ന സാഹചര്യത്തിലാണ് അദ്ദേഹത്തിന്റെ പ്രസ്താവന. “നിലവിൽ കാര്യങ്ങൾ വളരെ അനുകൂലമായ സാഹചര്യത്തിലാണ് മുന്നോട്ട് പോകുന്നത്,” എന്ന് മാധ്യമപ്രവർത്തകരോട് പറഞ്ഞ ട്രംപ്, ഭാവിയിൽ ഏതെങ്കിലും ഘട്ടത്തിൽ ഇറാനുമായുള്ള ചർച്ചകൾ പുനരാരംഭിച്ചേക്കാമെന്ന സൂചനയും നൽകി. ഹോർമുസ് കടലിടുക്ക് നിലവിൽ പൂർണ്ണമായും യുഎസിന്റെ “നിയന്ത്രണത്തിലും കസ്റ്റഡിയിലുമാണ്” എന്ന തങ്ങളുടെ മുൻ വാദം ട്രംപ് വീണ്ടും ആവർത്തിച്ചു.
ഇരുരാജ്യങ്ങളും തമ്മിലുള്ള പോരാട്ടത്തിൽ നിർണ്ണായകമായ ഒരു പങ്കാണ് ഹോർമുസ് കടലിടുക്കിനുള്ളത്. ഫെബ്രുവരി അവസാന വാരം മുതൽ ആരംഭിച്ച പോരാട്ടത്തെത്തുടർന്ന്, ലോകത്തെ പ്രമുഖ എണ്ണക്കപ്പൽ പാതയായ ഈ കടലിടുക്കിലൂടെയുള്ള ഗതാഗതം ഇറാന്റെ ശക്തമായ ഇടപെടൽ കാരണം തടസ്സപ്പെട്ടിരിക്കുകയാണ്. “അവർ ഇടയ്ക്കിടെ ഏതെങ്കിലും ഡ്രോണുകൾ അയച്ചേക്കാം, എന്നാൽ എല്ലാവർക്കും അതിലൂടെ കടന്നുപോകാൻ കഴിയില്ല,” ഹോർമുസ് പാതയിലെ തടസ്സങ്ങളെ പരാമർശിച്ചുകൊണ്ട് ട്രംപ് കൂട്ടിച്ചേർത്തു.
ഇറാൻ അണുവായുധം നിർമ്മിക്കുന്നത് തടയുക എന്നതിനാണ് തന്റെ ഭരണകൂടം മുൻഗണന നൽകുന്നതെന്ന് ട്രംപ് മുൻപും ആവർത്തിച്ചിട്ടുള്ളതാണ്. ഈ സംഘർഷത്തിൽ അടുത്ത പടവുകൾ എന്തായിരിക്കണമെന്ന് ട്രംപ് ഭരണകൂടം വിലയിരുത്തി വരികയാണ്. ഇറാനുമായുള്ള ഉദ്യോഗസ്ഥതല ചർച്ചകൾ താത്കാലികമായി നിർത്തിവെക്കാൻ ഭരണകൂട പ്രതിനിധികൾക്ക് ട്രംപ് നിർദ്ദേശം നൽകിയതായി ഔദ്യോഗിക വൃത്തങ്ങൾ വ്യക്തമാക്കിയതിന് തൊട്ടുപിന്നാലെയാണ് പ്രസിഡന്റിന്റെ ഈ പരസ്യ പ്രതികരണം.
