വാഷിംഗ്ടൺ: 9/11 ഭീകരാക്രമണത്തിന് ശേഷം അമേരിക്കൻ വിമാനത്താവളങ്ങളിൽ ഏർപ്പെടുത്തിയ സുരക്ഷാ നിയന്ത്രണങ്ങളിൽ 25 വർഷങ്ങൾക്ക് ശേഷം ചരിത്രപരമായ മാറ്റങ്ങൾ വരുത്താൻ ഒരുങ്ങി ട്രാന്സ്പോർട്ടേഷൻ സെക്യൂരിറ്റി അഡ്മിനിസ്ട്രേഷൻ (TSA). വിമാന ടിക്കറ്റില്ലാത്ത സാധാരണക്കാർക്ക് എയർപോർട്ട് ബോർഡിംഗ് ഗേറ്റ് വരെ പ്രവേശനാനുമതി നൽകുന്ന നയമാണ് പ്രധാനമായും വീണ്ടും നടപ്പിലാക്കുന്നത്.
പുതിയ ‘ഗേറ്റ്സൈഡ് TSA പ്രീചെക്ക്’ പദ്ധതി പ്രകാരം വിമാന ടിക്കറ്റില്ലാത്ത ബന്ധുക്കൾക്കും സുഹൃത്തുക്കൾക്കും ഗേറ്റ് വരെ എത്തി യാത്രക്കാരെ യാത്രയാക്കാനും സ്വീകരിക്കാനും സാധിക്കും. കൂടാതെ ലേ-ഓവർ സമയങ്ങളിൽ സുഹൃത്തുക്കളെ കാണുന്നതിനും എയർപോർട്ടിനുള്ളിലെ ഡൈനിംഗ്, ഷോപ്പിംഗ് സൗകര്യങ്ങൾ ഉപയോഗിക്കുന്നതിനും ഇത് അവസരമൊരുക്കും.
മുൻകൂട്ടി ‘TSA PreCheck’ രജിസ്ട്രേഷനുള്ള വ്യക്തികൾക്ക് തങ്ങളുടെ സന്ദർശനത്തിന് 1 മുതൽ 3 ദിവസം മുമ്പ് ഓൺലൈനായി അപേക്ഷ സമർപ്പിച്ച് ഈ സൗകര്യം പ്രയോജനപ്പെടുത്താം. യു.എസിലെ 13 പ്രധാന വിമാനത്താവളങ്ങളിലാണ് ഈ പദ്ധതി ആദ്യഘട്ടത്തിൽ നടപ്പിലാക്കുന്നത്.
വിമാനത്താവളങ്ങളിൽ സുരക്ഷാ പരിശോധനാ സമയത്ത് വാട്ടർ ബോട്ടിലുകൾ കരുതാൻ അനുമതി നൽകുന്ന കാര്യവും പരിഗണനയിലാണ്. 2006-ൽ ബ്രിട്ടനിൽ പാനീയ കുപ്പികളിൽ ദ്രാവക രൂപത്തിലുള്ള സ്ഫോടകവസ്തുക്കൾ കടത്താൻ ശ്രമിച്ച ഭീകരാക്രമണ പദ്ധതി തകർത്തതിന് പിന്നാലെയാണ് ലിക്വിഡ് സാധനങ്ങൾ കൊണ്ടുപോകുന്നതിന് വിലക്കേർപ്പെടുത്തിയത്.
വിമാനത്താവളങ്ങളിലെ സുരക്ഷാ നിലവാരം കുറയ്ക്കാതെ തന്നെയാണ് ഈ പുതിയ മാറ്റങ്ങൾ കൊണ്ടുവരുന്നത്. പരമ്പരാഗത എക്സ്-റേ മെഷീനുകൾക്ക് പകരം അത്യാധുനിക ‘കമ്പ്യൂട്ടഡ് ടോമോഗ്രഫി’ (CT) സ്കാനിംഗ് മെഷീനുകൾ സ്ഥാപിച്ചതോടെയാണ് ദ്രാവക രൂപത്തിലുള്ള സ്ഫോടകവസ്തുക്കളും മറ്റ് സുരക്ഷാ ഭീഷണികളും കൃത്യമായി കണ്ടെത്താൻ സാധിക്കുന്നത്.
കഴിഞ്ഞ വർഷം സുരക്ഷാ പരിശോധനയ്ക്കിടെ ചെരിപ്പുകൾ അഴിച്ചുമാറ്റണമെന്ന രണ്ട് പതിറ്റാണ്ടിലേറെ പഴക്കമുള്ള നിർബന്ധിത നിബന്ധനയും TSA ഒഴിവാക്കിയിരുന്നു. പുതിയ ഇളവുകൾ പഴയകാലത്തെ സാധാരണ അന്തരീക്ഷത്തിലേക്ക് മടങ്ങാൻ സഹായിക്കുമെന്ന പ്രതീക്ഷയിലാണ് യാത്രക്കാർ.
Historic relaxation of US airport security rules 25 years after the 9/11 terrorist attacks; access to the boarding gate allowed without a ticket.
