ടെഹ്റാൻ: കിഴക്കൻ ഇറാനിലെ രണ്ട് പ്രധാന റെയിൽവേ പാലങ്ങൾക്ക് നേരെ അമേരിക്കൻ സൈന്യം നടത്തിയ വ്യോമാക്രമണം കടുത്ത യുദ്ധക്കുറ്റമാണെന്ന് ഇറാൻ ആരോപിച്ചു. കഴിഞ്ഞ മാസം വാഷിംഗ്ടണും ടെഹ്റാനും തമ്മിൽ ഒപ്പുവെച്ച വെടിനിർത്തൽ കരാറിന്റെയും ഐക്യരാഷ്ട്രസഭയുടെ ചട്ടങ്ങളുടെയും നഗ്നമായ ലംഘനമാണ് അമേരിക്ക നടത്തിയിരിക്കുന്നതെന്ന് ഇറാന്റെ വിദേശകാര്യ മന്ത്രാലയം വ്യാഴാഴ്ച പുറത്തിറക്കിയ ഔദ്യോഗിക പ്രസ്താവനയിൽ വ്യക്തമാക്കി.
മഷാദ് നഗരത്തിലേക്കുള്ള പ്രധാന റെയിൽവേ റൂട്ടിലെ രണ്ട് പാലങ്ങൾക്ക് നേരെയാണ് യുഎസ് മിലിട്ടറി ബോംബാക്രമണം നടത്തിയത്. ഇറാന്റെ മുൻ പരമോന്നത നേതാവ് ആയത്തുള്ള അലി ഖമേനിയുടെ സംസ്കാര ചടങ്ങുകളിൽ പങ്കെടുക്കാൻ ലക്ഷക്കണക്കിന് ആളുകൾ മഷാദിലേക്ക് യാത്ര ചെയ്യുന്ന സമയത്താണ് ഈ ആക്രമണം ഉണ്ടായിരിക്കുന്നത്. ഈ റെയിൽവേ പാലങ്ങൾക്ക് പുറമെ രാജ്യത്തിന്റെ തെക്കൻ തീരദേശ പ്രവിശ്യകളിലെ നിരവധി കേന്ദ്രങ്ങളിലും കഴിഞ്ഞ 48 മണിക്കൂറിനുള്ളിൽ അമേരിക്ക ക്രിമിനൽ ആക്രമണങ്ങൾ നടത്തിയതായി ഇറാൻ കുറ്റപ്പെടുത്തി.
അതേസമയം, അമേരിക്കൻ സൈന്യത്തിന്റെ മിഡ് ഈസ്റ്റ് ചുമതലയുള്ള യുഎസ് സെൻട്രൽ കമാൻഡ് ഇറാന്റെ തീരപ്രദേശങ്ങളിലെ തൊണ്ണൂറോളം സൈനിക ലക്ഷ്യങ്ങൾക്ക് നേരെ ശക്തമായ വ്യോമാക്രമണം നടത്തിയതായി സ്ഥിരീകരിച്ചു. ഇറാന്റെ വ്യോമ പ്രതിരോധ സംവിധാനങ്ങളും മിസൈൽ സംഭരണശാലകളുമാണ് തങ്ങൾ തകർത്തതെന്നാണ് യുഎസ് വാദം. എന്നാൽ ഇറാൻ ആരോപിക്കുന്നതുപോലെ റെയിൽവേ പാലങ്ങൾക്ക് നേരെ ആക്രമണം നടത്തിയോ എന്ന കാര്യത്തെക്കുറിച്ച് യുഎസ് സെൻട്രൽ കമാൻഡിന്റെ ഔദ്യോഗിക പ്രസ്താവനയിൽ വ്യക്തമായ പരാമർശങ്ങളൊന്നുമില്ല. പാലങ്ങൾ തകർന്നതോടെ രാജ്യത്തെ ട്രെയിൻ സർവീസുകൾ പൂർണ്ണമായി തടസ്സപ്പെട്ടിരിക്കുകയാണ്.
