ടെഹ്റാൻ: ജോർദാൻ, ബഹ്റൈൻ, കുവൈത്ത് എന്നിവിടങ്ങളിലെ അമേരിക്കൻ സൈനിക താവളങ്ങൾ ലക്ഷ്യമിട്ട് മൂന്ന് ഘട്ടങ്ങളിലായി മിസൈൽ-ഡ്രോൺ ആക്രമണം നടത്തിയതായി ഇറാന്റെ ഇസ്ലാമിക് റെവല്യൂഷണറി ഗാർഡ് കോർപ്സ് (IRGC) അവകാശപ്പെട്ടു. ആക്രമണത്തിൽ പാട്രിയറ്റ് വ്യോമപ്രതിരോധ സംവിധാനങ്ങളും ഇന്ധന സംഭരണ ടാങ്കുകളും തന്ത്രപ്രധാന റഡാർ സംവിധാനവും പൂർണമായും നശിപ്പിച്ചതായും ഐആർജിസി അറിയിച്ചു.
“കണ്ണിന് കണ്ണ്” എന്ന പേരിൽ നടത്തിയ ഈ സൈനിക നടപടിയിലൂടെ അമേരിക്ക ഇറാനെതിരെ നടത്തിയ സമീപകാല ആക്രമണങ്ങൾക്ക് തിരിച്ചടി നൽകിയതാണെന്ന് ഇറാന്റെ സർക്കാർ അനുകൂല മാധ്യമങ്ങളും ഐആർജിസിയും വ്യക്തമാക്കി. എന്നാൽ ഈ അവകാശവാദങ്ങൾ സ്ഥിരീകരിക്കപ്പെട്ടിട്ടില്ല. ഇറാന്റെ സർക്കാർ അനുകൂല വാർത്താ ഏജൻസിയായ നൂർ ന്യൂസ് റിപ്പോർട്ട് ചെയ്യുന്നതനുസരിച്ച്, ഇറാൻ സൈന്യവും ഐആർജിസിയും ചേർന്ന് മേഖലയിലെ “ശത്രു സൈനിക കേന്ദ്രങ്ങൾ” ലക്ഷ്യമാക്കി വ്യാപക മിസൈൽ-ഡ്രോൺ ആക്രമണം നടത്തി.
കഴിഞ്ഞ 48 മണിക്കൂറിനിടെ “ശത്രുവിന്റെ നീക്കങ്ങൾ” നിരീക്ഷിച്ച ശേഷമാണ് ആക്രമണത്തിനുള്ള ലക്ഷ്യങ്ങൾ നിശ്ചയിച്ചതെന്നും, അമേരിക്കൻ ആക്രമണങ്ങൾക്ക് മറുപടിയായാണ് സൈനിക നടപടി നടത്തിയതെന്നും ഇറാനിയൻ സൈനിക ഉദ്യോഗസ്ഥരെ ഉദ്ധരിച്ച് റിപ്പോർട്ടിൽ പറയുന്നു. ആദ്യഘട്ട ആക്രമണത്തിൽ ജോർദാനിലെ പ്രിൻസ് ഹസൻ എയർബേസ് ലക്ഷ്യമിട്ട് മിസൈലുകളും ഡ്രോണുകളും പ്രയോഗിച്ചതായും നിരവധി ഇന്ധന സംഭരണ കേന്ദ്രങ്ങൾക്കും ആയുധ ഗോഡൗണുകൾക്കും തീപിടിപ്പിച്ചതായും ഐആർജിസി അവകാശപ്പെട്ടു.
രണ്ടാംഘട്ടത്തിൽ ബഹ്റൈനിലെ ഷെയ്ഖ് ഈസ എയർബേസ് ആക്രമിച്ചതായും ഹെലികോപ്റ്റർ അറ്റകുറ്റപ്പണി കേന്ദ്രം, പി-8 നിരീക്ഷണ വിമാനം സൂക്ഷിച്ചിരുന്ന ഹാംഗർ, അമേരിക്കൻ ഡ്രോൺ കമാൻഡ് ആൻഡ് കൺട്രോൾ കേന്ദ്രം എന്നിവ ലക്ഷ്യമിട്ടതായും ഐആർജിസി അറിയിച്ചു. മൂന്നാംഘട്ടത്തിൽ കുവൈത്തിലെ അലി അൽ-സലേം എയർബേസിലെ ഇന്ധന ടാങ്കുകളും പാട്രിയറ്റ് വ്യോമപ്രതിരോധ സംവിധാനങ്ങളും, അഹമ്മദ് അൽ-ജാബർ എയർബേസിലെ തന്ത്രപ്രധാന FPS റഡാർ സംവിധാനവും പൂർണമായും തകർത്തതായി ഇറാൻ അവകാശപ്പെട്ടു. തിരിച്ചടി സൈനിക നടപടി തുടരുകയാണെന്നും ഐആർജിസി വ്യക്തമാക്കി.
ഹോർമുസ് കടലിടുക്കിൽ അമേരിക്കൻ സൈനിക ഇടപെടൽ തുടരാൻ അനുവദിക്കില്ലെന്നും, തുടരുന്ന സൈനിക നടപടികളുടെ ഫലങ്ങൾ പിന്നീട് ഔദ്യോഗികമായി പ്രഖ്യാപിക്കുമെന്നും ഐആർജിസി മുന്നറിയിപ്പ് നൽകി. അതേസമയം, അന്താരാഷ്ട്ര കപ്പൽഗതാഗതത്തെ തടസ്സപ്പെടുത്താനുള്ള ഇറാന്റെ ശേഷി ദുർബലപ്പെടുത്തുക എന്ന ലക്ഷ്യത്തോടെ അമേരിക്കൻ സെൻട്രൽ കമാൻഡ് (CENTCOM) ഞായറാഴ്ച ഇറാനിലെ വിവിധ സൈനിക കേന്ദ്രങ്ങൾക്കെതിരെ കൃത്യമായ ആക്രമണങ്ങൾ നടത്തിയിരുന്നു.
വ്യോമപ്രതിരോധ സംവിധാനങ്ങൾ, തീരദേശ റഡാർ ശൃംഖല, മിസൈൽ-ഡ്രോൺ വിക്ഷേപണ കേന്ദ്രങ്ങൾ, ചെറുകിട നാവിക സേനാ കപ്പലുകൾ എന്നിവയാണ് അമേരിക്കയുടെ ആക്രമണത്തിൽ ലക്ഷ്യമിട്ടതെന്ന് സെന്റ്കോം അറിയിച്ചു. യുദ്ധവിമാനങ്ങൾ, നാവികസേനാ യുദ്ധക്കപ്പലുകൾ, ആക്രമണ ഡ്രോണുകൾ, ആളില്ലാ കടൽ ഡ്രോണുകൾ എന്നിവ ഉപയോഗിച്ചാണ് ആക്രമണം നടത്തിയതെന്നും അമേരിക്കൻ സൈന്യം വ്യക്തമാക്കി.
“ആഗോള വ്യാപാരത്തിന് നിർണായകമായ കടൽപാതയാണ് ഹോർമുസ് കടലിടുക്ക്. അതിന്റെ നിയന്ത്രണം ഇറാന്റെ കൈകളിലല്ല,” എന്ന് സെന്റ്കോം പ്രസ്താവനയിൽ വ്യക്തമാക്കി. അമേരിക്കൻ പ്രസിഡന്റിന്റെ നിർദേശപ്രകാരമാണ് പുതിയ ആക്രമണം നടത്തിയതെന്നും, ഹോർമുസ് കടലിടുക്കിലൂടെ സ്വതന്ത്രമായി സഞ്ചരിക്കുന്ന വാണിജ്യ കപ്പലുകൾക്ക് നേരെയുള്ള ഇറാന്റെ ആക്രമണശേഷി കുറയ്ക്കുകയും ഇറാനിയൻ സൈന്യത്തെ ഉത്തരവാദിത്തത്തിന് വിധേയമാക്കുകയുമാണ് ലക്ഷ്യമെന്നും സെന്റ്കോം പ്രസ്താവനയിൽ കൂട്ടിച്ചേർത്തു.
Iran ‘completely destroys’ Patriot air defences, fuel tanks, radar at US Gulf bases
