ടെഹ്റാൻ/വാഷിംഗ്ടൺ: അമേരിക്കയുമായുള്ള വെടിനിർത്തൽ ചർച്ചകൾ നിർണ്ണായക ഘട്ടത്തിൽ എത്തിനിൽക്കെ, തങ്ങളുടെ പക്കലുള്ള സമ്പുഷ്ടീകരിച്ച യുറേനിയം ശേഖരം ഒരു കാരണവശാലും വിദേശത്തേക്ക് മാറ്റില്ലെന്ന് വ്യക്തമാക്കി പ്രമുഖ ഇറാനിയൻ ഉദ്യോഗസ്ഥൻ ഇബ്രാഹിം അസീസി. ഇറാന്റെ ഔദ്യോഗിക വാർത്താ ഏജൻസിയായ ‘മീസാൻ’ ആണ് റഷ്യൻ മാധ്യമങ്ങളെ ഉദ്ധരിച്ച് ഇക്കാര്യം റിപ്പോർട്ട് ചെയ്തത്. തങ്ങളുടെ സമ്പുഷ്ടീകരിച്ച യുറേനിയം ഒരു മൂന്നാം രാജ്യത്തേക്ക് കൈമാറാൻ ടെഹ്റാൻ ഉദ്ദേശിക്കുന്നില്ലെന്ന് ഇറാന്റെ പാർലമെന്ററി നാഷണൽ സെക്യൂരിറ്റി കമ്മീഷൻ തലവനായ അസീസി റഷ്യൻ മാധ്യമമായ ‘ആർ.ഐ.എ നോവോസ്റ്റി’ക്ക് നൽകിയ അഭിമുഖത്തിൽ വെള്ളിയാഴ്ച വ്യക്തമാക്കി.
ഔദ്യോഗികമായി വെടിനിർത്തൽ പ്രഖ്യാപിക്കുന്നതിനും തന്ത്രപ്രധാനമായ ഹോർമുസ് കടലിടുക്ക് തുറന്നു കൊടുക്കുന്നതിനുമായി അമേരിക്കയും ഇറാനും തമ്മിൽ കരാറിലേക്ക് അടുക്കുന്നതായി റിപ്പോർട്ടുകളുണ്ട്. എങ്കിലും, ഇറാന്റെ യുറേനിയം ശേഖരത്തിന് എന്ത് സംഭവിക്കും എന്ന ചോദ്യം ഇപ്പോഴും ഒരു പ്രധാന തർക്കവിഷയമായി തുടരുകയാണ്. വരാനിരിക്കുന്ന ഭാവി ചർച്ചകളിലെ ഏറ്റവും സങ്കീർണ്ണമായ ഭാഗവും ഇതുതന്നെയായിരിക്കും. 60 ശതമാനം വരെ ശുദ്ധീകരിച്ച, ഏതാണ്ട് 1000 പൗണ്ടോളം വരുന്ന യുറേനിയം ശേഖരത്തെ കേന്ദ്രീകരിച്ചാണ് നിലവിൽ ചർച്ചകൾ പുരോഗമിക്കുന്നത്. ബോംബ് നിർമ്മാണത്തിന് വരെ ഉപയോഗിക്കാവുന്ന ഈ യുറേനിയം ശേഖരം ആർക്കും വിട്ടുനൽകില്ലെന്ന് ഇറാൻ ആവർത്തിച്ചു വ്യക്തമാക്കുന്നുണ്ടെങ്കിലും, തങ്ങൾ ആണവായുധം നിർമ്മിക്കാൻ ലക്ഷ്യമിടുന്നില്ലെന്നാണ് അവരുടെ ഔദ്യോഗിക നിലപാട്.
അതേസമയം, ഇറാനുമായുള്ള താൽക്കാലിക ധാരണാപത്രത്തിൽ പ്രസിഡന്റ് ഡോണൾഡ് ട്രംപ് ഒപ്പുവെക്കുമോ എന്ന കാര്യം ഇപ്പോഴും നിശ്ചയിക്കപ്പെട്ടിട്ടില്ലെന്ന് അമേരിക്കൻ വൈസ് പ്രസിഡന്റ് ജെ.ഡി വാൻസ് പ്രസ്താവിച്ചു. കരാറിലെ ചില പ്രത്യേക വാക്കുകളിലും നിബന്ധനകളിലും ഇരുരാജ്യങ്ങളും തമ്മിൽ ഇപ്പോഴും ചർച്ചകൾ നടത്തിവരികയാണ്. ചർച്ചകളിൽ കാര്യമായ പുരോഗതി ഉണ്ടായിട്ടുണ്ടെന്ന് വ്യക്തമാക്കിയ വാൻസ്, എന്നാൽ ഇറാന്റെ ആണവ പദ്ധതിയെയും സമ്പുഷ്ടീകരിച്ച യുറേനിയത്തെയും സംബന്ധിച്ച ചില പ്രധാന കാര്യങ്ങളിൽ ഇപ്പോഴും അവ്യക്തത തുടരുന്നതായി കൂട്ടിച്ചേർത്തു.
നേരത്തെ, ചർച്ചകൾ പരാജയപ്പെടുകയാണെങ്കിൽ സൈനിക ശക്തി ഉപയോഗിച്ച് യുറേനിയം ശേഖരം പിടിച്ചെടുക്കുമെന്ന് ട്രംപ് ഭീഷണിപ്പെടുത്തിയിരുന്നു. ഇതിനായി ഇസ്ഫഹാൻ ആണവ സമുച്ചയത്തിൽ നടത്തേണ്ട സൈനിക നീക്കങ്ങളുടെ വിവിധ സാധ്യതകൾ യു.എസ് സൈനിക മേധാവികൾ പരിശോധിച്ചതായും ഇതിന് നൂറുകണക്കിന് അല്ലെങ്കിൽ ആയിരക്കണക്കിന് സൈനികർ വേണ്ടിവരുമെന്നും വലിയ തോതിലുള്ള ജീവഹാനിക്ക് സാധ്യതയുണ്ടെന്നും മാർച്ചിൽ സി.എൻ.എൻ റിപ്പോർട്ട് ചെയ്തിരുന്നു. എന്നാൽ പിന്നീട് ട്രംപ് തന്റെ നിലപാടിൽ ഇളവ് വരുത്തുകയും, ഇറാന്റെ സമ്പുഷ്ടീകരിച്ച യുറേനിയം തിരിച്ചുപിടിക്കുന്ന പ്രക്രിയയിൽ ടെഹ്റാനെക്കൂടി പങ്കാളിയാക്കാൻ തയ്യാറാണെന്ന സൂചന നൽകുകയും ചെയ്തിരുന്നു. ഈ യുറേനിയം ഒന്നുകിൽ യു.എസിലേക്ക് മാറ്റുകയോ, അല്ലെങ്കിൽ ഇറാനിൽ വെച്ചോ മറ്റൊരു സ്ഥലത്തോ വെച്ചോ നശിപ്പിക്കുകയോ ചെയ്യുമെന്നാണ് ട്രംപ് ഒടുവിൽ വ്യക്തമാക്കിയത്.
