ടെഹ്റാൻ: പശ്ചിമേഷ്യയിൽ യുദ്ധം ആളിപ്പടരുന്നതിനിടയിൽ, ഇസ്രായേലിനെതിരെ നടത്തിവന്ന സൈനിക നടപടികൾ താൽക്കാലികമായി നിർത്തിവെച്ചതായി ഇറാൻ ഔദ്യോഗികമായി പ്രഖ്യാപിച്ചു. എന്നാൽ, തെക്കൻ ലെബനൻ ഉൾപ്പെടെയുള്ള മേഖലകളിൽ ഇസ്രായേൽ തങ്ങളുടെ വ്യോമാക്രമണങ്ങളും അധിനിവേശവും തുടരുകയാണെങ്കിൽ ശക്തമായ സൈനിക തിരിച്ചടി പുനരാരംഭിക്കുമെന്ന കടുത്ത മുന്നറിയിപ്പും ഇറാൻ നൽകിയിട്ടുണ്ട്.
ഇറാന്റെ ഔദ്യോഗിക വാർത്താ ഏജൻസിയായ തസ്നീം പുറത്തുവിട്ട സൈനിക പ്രസ്താവനയിലാണ് ഈ നിർണായക വിവരം അടങ്ങിയിരിക്കുന്നത്. മർദ്ദിതരായ ലെബനൻ ജനതയ്ക്ക് പൂർണ്ണ പിന്തുണ പ്രഖ്യാപിച്ചുകൊണ്ട്, തങ്ങളുടെ കരുത്തരായ സായുധസേന ഇസ്രായേൽ ഭരണകൂടത്തിന് അതീവ വേദനാജനകമായ മറുപടിയാണ് കഴിഞ്ഞ ദിവസങ്ങളിൽ നൽകിയതെന്ന് ഇറാന്റെ പ്രസ്താവനയിൽ അവകാശപ്പെടുന്നു.
ഇസ്രായേലിന്റെ ഭാഗത്തുനിന്നും ഇനിയും പ്രകോപനങ്ങളോ ശത്രുതാപരമായ നീക്കങ്ങളോ ഉണ്ടായാൽ, മുൻപ് കണ്ടതിനേക്കാൾ ഭീകരവും തകർപ്പനുമായ പ്രതിരോധ നടപടികളായിരിക്കും ഇറാന്റെ ഭാഗത്തുനിന്നും ഉണ്ടാവുകയെന്നും സൈന്യം ഓർമ്മിപ്പിച്ചു. ഇറാൻ വിട്ടുവീഴ്ചയ്ക്ക് തയ്യാറാകുന്നു എന്ന സൂചനകൾ നൽകുമ്പോഴും, ലെബനനിലെ ഇസ്രായേലിന്റെ നീക്കങ്ങൾ തന്നെയാണ് വരും ദിവസങ്ങളിൽ പശ്ചിമേഷ്യൻ യുദ്ധത്തിന്റെ ഗതി നിർണ്ണയിക്കുകയെന്ന് വ്യക്തമാക്കുന്നതാണ് ഈ പുതിയ സൈനിക പ്രസ്താവന.
