.ടെഹ്റാൻ: ഇസ്രായേലും ലെബനനും തമ്മിൽ വെടിനിർത്തൽ കരാറിലെത്തിയതിനും, തന്ത്രപ്രധാനമായ ഹോർമുസ് കടലിടുക്ക് ഇറാൻ വീണ്ടും തുറന്നതിനും പിന്നാലെ മേഖലയിൽ സമാധാനം പുനഃസ്ഥാപിക്കാനുള്ള നയതന്ത്ര നീക്കങ്ങളെ പ്രശംസിച്ച് പാകിസ്ഥാനിലെ ഇറാൻ സ്ഥാനപതി റെസ അമിരി മൊഗദം. നയതന്ത്രത്തിന് അവസരം നൽകാനുള്ള എല്ലാ ഭാഗത്തുനിന്നുമുള്ള ശ്രമങ്ങൾ ശുഭസൂചനയാണെന്ന് അദ്ദേഹം പറഞ്ഞു. പാകിസ്ഥാൻ്റെ ശക്തമായ ഇടപെടലുകൾ മേഖലയിൽ സുസ്ഥിരമായ സമാധാനത്തിനും സുരക്ഷയ്ക്കും പുരോഗതിക്കും വഴിതുറക്കുമെന്ന് അദ്ദേഹം സമൂഹമാധ്യമമായ എക്സിൽ കുറിച്ചു.പരസ്പര വിശ്വാസം, വാക്കുകളിലും പ്രവൃത്തികളിലും പുനരാവർത്തനങ്ങൾ ഒഴിവാക്കൽ, ബഹുമാനം എന്നിവയിലൂടെ മാത്രമേ നിലവിലുള്ള അഭിപ്രായവ്യത്യാസങ്ങൾ പരിഹരിക്കാൻ സാധിക്കൂ എന്ന് മൊഗദം ചൂണ്ടിക്കാട്ടി. മേഖലയിലെ രാജ്യങ്ങൾക്കിടയിലുള്ള കൂട്ടായ പ്രവർത്തനങ്ങൾ ദീർഘകാലാടിസ്ഥാനത്തിലുള്ള ലക്ഷ്യങ്ങൾ കൈവരിക്കാൻ സഹായിക്കും. കഴിഞ്ഞയാഴ്ച അമേരിക്കയും ഇറാനും തമ്മിൽ നടന്ന ചർച്ചകളിൽ നിർണ്ണായക മധ്യസ്ഥനായി പാകിസ്ഥാൻ മാറിയ പശ്ചാത്തലത്തിലാണ് ഇറാന്റെ ഈ പ്രതികരണം. ഹോർമുസ് കടലിടുക്ക് തുറന്നത് ആഗോള ഊർജ്ജ വിപണിയിലും സാമ്പത്തിക രംഗത്തും വലിയ ആശ്വാസമാണ് നൽകുന്നത്.
