ടെഹ്റാൻ : ഇറാൻ പരമോന്നത നേതാവ് ആയത്തോള മൊജ്താബ ഖമേനിക്ക് നിലവിൽ പ്രത്യേക ആരോഗ്യപ്രശ്നങ്ങളോ വെല്ലുവിളികളോ ഇല്ലെന്ന് ഇറാൻ പ്രസിഡന്റ് മസൂദ് പെസെഷ്കിയൻ സി.ബി.എസ് ന്യൂസിനോട് വ്യക്തമാക്കി. ഫെബ്രുവരിയിൽ നടന്ന യു.എസ്-ഇസ്രായേൽ ആക്രമണത്തിൽ മുൻ പരമോന്നത നേതാവും അദ്ദേഹത്തിന്റെ പിതാവുമായ ആയത്തോള അലി ഖമേനി കൊല്ലപ്പെട്ടതിന് ശേഷം മൊജ്താബ ഖമേനിയെ പൊതുവേദികളിൽ കണ്ടിരുന്നില്ല.
താൻ മൊജ്താബ ഖമേനിയുമായി ഏഴ് മണിക്കൂറോളം നീണ്ട കൂടിക്കാഴ്ച നടത്തിയതായി ‘ഫെയ്സ് ദി നേഷൻ’ മോഡറേറ്റർ മാർഗരറ്റ് ബ്രണ്ണനോട് പെസെഷ്കിയൻ പറഞ്ഞു. നീണ്ട സമയം ഇരിക്കാൻ പ്രയാസമുള്ളതിനാൽ ഇരുവരും ഇരിപ്പിടങ്ങളും രീതികളും മാറ്റിയാണ് സംസാരിച്ചതെന്നും അദ്ദേഹം വ്യക്തമാക്കി.
“ഒരു വൈദ്യശാസ്ത്ര വിദഗ്ദ്ധൻ എന്ന നിലയിൽ പറയട്ടെ, അദ്ദേഹം പൂർണ്ണ ആരോഗ്യവാനാണ്. അദ്ദേഹത്തിന്റെ മുഖത്തും കാലുകൾക്കും ഏറ്റ പരിക്കുകൾ ഭേദമായിക്കഴിഞ്ഞു. എന്റെ വാക്കുകൾ ഒരു ഡോക്ടറുടെ വാക്കുകളായി കണ്ട് വിശ്വസിക്കൂ, അദ്ദേഹത്തിന് യാതൊരുവിധ ആരോഗ്യപ്രശ്നവുമില്ല,” പെസെഷ്കിയൻ കൂട്ടിച്ചേർത്തു.
നയതന്ത്ര കാര്യങ്ങളിൽ മൊജ്താബ ഖമേനി തനിക്ക് ഉപദേശങ്ങൾ നൽകുന്നുണ്ടോ എന്ന ചോദ്യത്തിന്, വിവിധ സംഘടനകൾ, സുരക്ഷാ സേനകൾ, പാർലമെന്റ് പ്രതിനിധികൾ, സർക്കാർ ഏജൻസികൾ എന്നിവയിൽ നിന്നുള്ള ആറ് അംഗങ്ങൾ അടങ്ങിയ ഒരു സംഘമാണ് കൂടിയാലോചനകളും തീരുമാനങ്ങളും കൈക്കൊള്ളുന്നതെന്ന് പ്രസിഡന്റ് വിശദീകരിച്ചു.
