2028ലെ യുഎസ് പ്രസിഡന്റ് തിരഞ്ഞെടുപ്പിൽ വൈസ് പ്രസിഡന്റ് ജെ.ഡി വാൻസ് മത്സരിക്കുമോയെന്ന കാര്യത്തിൽ സംശയം പ്രകടിപ്പിച്ച് പ്രസിഡന്റ് ഡോണൾഡ് ട്രംപ്. ഇടക്കാല തിരഞ്ഞെടുപ്പിൽ റിപ്പബ്ലിക്കൻ പാർട്ടിക്കുണ്ടായ തിരിച്ചടിക്കു പിന്നാലെയാണ് ട്രംപിന്റെ പ്രതികരണം. വൈറ്റ് ഹൗസിൽ മാധ്യമങ്ങളോട് സംസാരിക്കവെ, വാൻസുമായി നിരവധി കാര്യങ്ങൾ ചർച്ച ചെയ്യാറുണ്ടെങ്കിലും 2028ൽ ആരൊക്കെയാണ് മത്സരിക്കുകയെന്ന് പറയാനാകില്ലെന്ന് ട്രംപ് പറഞ്ഞു. ഒരുപക്ഷേ വാൻസ് മത്സരിച്ചേക്കില്ലെന്നും അദ്ദേഹം കൂട്ടിച്ചേർത്തു.
ഇടക്കാല തിരഞ്ഞെടുപ്പിലെ തിരിച്ചടിക്ക് കാരണം ഇറാനുമായുള്ള യുദ്ധമാണെന്ന് ആരോപിച്ച് വാൻസ് ട്രംപ് ഭരണകൂടത്തിന്റെ നിലപാടിൽനിന്ന് അകലം പാലിച്ചതിനു പിന്നാലെയാണ് പ്രതികരണം. ‘നമ്മൾ പരാജയപ്പെട്ടത് യുദ്ധം കാരണമാണ്’ എന്ന് എക്സിലെ കുറിപ്പിൽ വാൻസ് തുറന്നടിച്ചിരുന്നു. 2024ൽ ട്രംപിനെ പിന്തുണച്ച റിപ്പബ്ലിക്കൻ വോട്ടർമാർ ഇത്തവണയും വോട്ട് ചെയ്യാനെത്തിയെങ്കിലും ഇറാൻ യുദ്ധം, ഇന്ധനവില വർധന, ‘അമേരിക്ക ഫസ്റ്റ്’ നയത്തിൽനിന്നുള്ള പിന്മാറ്റം എന്നിവയിൽ അതൃപ്തിയുണ്ടായിരുന്നുവെന്ന് വാൻസ് പറഞ്ഞു.
യുദ്ധത്തിന്റെ ചെലവിനെയും വിമർശിച്ച വാൻസ്, അടുത്ത ആറുവർഷത്തേക്ക് സെനറ്റിന്റെ നിയന്ത്രണം നഷ്ടപ്പെടുന്നത് യുദ്ധത്തിന് നൽകേണ്ടിവന്ന വിലയായിരുന്നുവെന്ന് കരുതുന്നവർ അത് തുറന്നുപറയണമെന്നും ആവശ്യപ്പെട്ടു. തിരഞ്ഞെടുപ്പിലെ പരാജയത്തിന്റെ കാരണങ്ങളെക്കുറിച്ചുള്ള ചർച്ച യുദ്ധത്തിൽനിന്ന് തുടങ്ങണമെന്നും അദ്ദേഹം വ്യക്തമാക്കി. എന്നാൽ ഇറാനെതിരായ സൈനിക നടപടി അനിവാര്യമായിരുന്നുവെന്ന നിലപാടിലാണ് ട്രംപ്. യുദ്ധം തിരഞ്ഞെടുപ്പിലെ തിരിച്ചടിക്ക് ഒരു കാരണമായെന്ന് സമ്മതിച്ച അദ്ദേഹം, ഭീകരവാദത്തിന് പിന്തുണ നൽകുന്ന ഇറാനെ ആണവായുധം കൈവശം വയ്ക്കാൻ അനുവദിക്കാനാകില്ലെന്നും പറഞ്ഞു. ഇന്ധനവിലയിലെ താൽക്കാലിക വർധനയും തിരഞ്ഞെടുപ്പിനെ ബാധിച്ചിട്ടുണ്ടാകാമെന്ന് ട്രംപ് സമ്മതിച്ചു.
അതേസമയം, 2028ലെ പ്രസിഡന്റ് തിരഞ്ഞെടുപ്പിന് മുന്നോടിയായി ട്രംപിന്റെ നയങ്ങളിൽ അതൃപ്തിയുള്ള വോട്ടർമാരെ ഉൾപ്പെടുത്തി പുതിയ രാഷ്ട്രീയ സഖ്യം രൂപീകരിക്കാൻ വാൻസ് ശ്രമിക്കുന്നതായി ഫോക്സ് ന്യൂസ് റിപ്പോർട്ട് ചെയ്തു. വിദേശസംഘർഷങ്ങളിൽനിന്ന് വിട്ടുനിൽക്കുക, ജീവിതച്ചെലവ് കുറയ്ക്കുക, അതിർത്തി സുരക്ഷ ശക്തമാക്കുക എന്നിവയ്ക്ക് മുൻഗണന നൽകുന്ന റിപ്പബ്ലിക്കൻ വിഭാഗത്തെയാണ് വാൻസ് ലക്ഷ്യമിടുന്നതെന്നാണ് റിപ്പോർട്ട്. ഇതിനിടെ, ഇടക്കാല തിരഞ്ഞെടുപ്പിൽ ഡെമോക്രാറ്റുകൾ കോൺഗ്രസിൽ നേട്ടമുണ്ടാക്കിയത് ട്രംപിനും റിപ്പബ്ലിക്കൻ പാർട്ടിക്കും തിരിച്ചടിയായി.
ടെക്സസ്, കൻസാസ്, സൗത്ത് കരോലിന, നോർത്ത് കരോലിന, ഒഹായോ എന്നിവിടങ്ങളിൽ ഡെമോക്രാറ്റുകൾ വിജയിച്ചു. ജോർജിയ, ഒഹായോ, അയോവ, ടെക്സസ് എന്നിവിടങ്ങളിലെ ഗവർണർ തിരഞ്ഞെടുപ്പുകളിലും പാർട്ടി നേട്ടമുണ്ടാക്കി.
‘Maybe he won’t run’: Trump on JD Vance’s 2028 presidential bid after midterm setback for Republicans
