വാഷിംഗ്ടൺ: അമേരിക്കൻ വിസ അഭിമുഖങ്ങളിൽ എച്ച്-1ബി അപേക്ഷകരെ കടുത്ത പ്രതിസന്ധിയിലാക്കി യുഎസ് ഇമിഗ്രേഷൻ വിഭാഗത്തിൻ്റെ പുതിയ നീക്കം. “നിങ്ങൾക്ക് പകരം എന്തുകൊണ്ട് ഒരു അമേരിക്കക്കാരന് ഈ ജോലി ചെയ്തുകൂടാ?” എന്ന ചോദ്യമാണ് ഇപ്പോൾ വിസ അഭിമുഖങ്ങളിൽ വ്യാപകമായി ഉയരുന്നത്. മുൻകൂട്ടി തയ്യാറാകാതെ എത്തുന്ന ഭൂരിഭാഗം അപേക്ഷകർക്കും ഈ ചോദ്യത്തിന് മുന്നിൽ കൃത്യമായ ഉത്തരം നൽകാൻ കഴിയുന്നില്ലെന്നാണ് റിപ്പോർട്ടുകൾ.
അമേരിക്കൻ വിപണിയിൽ സ്വദേശികളുടെ തൊഴിൽ സുരക്ഷ ഉറപ്പാക്കുക എന്ന ലക്ഷ്യത്തോടെയാണ് വിസ നടപടികൾ കർശനമാക്കിയിരിക്കുന്നത്. ഡോണൾഡ് ട്രംപ് മുൻ ഭരണകാലത്ത് നടപ്പിലാക്കിയ “ബൈ അമേരിക്കൻ, ഹയർ അമേരിക്കൻ” (അമേരിക്കൻ ഉൽപ്പന്നങ്ങൾ വാങ്ങുക, അമേരിക്കക്കാരെ ജോലിക്ക് എടുക്കുക) എന്ന നയത്തിൻ്റെ തിരിച്ചുവരവാണ് ഇതെന്നാണ് ഇമിഗ്രേഷൻ അഭിഭാഷകർ വിലയിരുത്തുന്നത്.
ഇന്ത്യൻ-അമേരിക്കൻ സമൂഹത്തെയും യുഎസ് കുടിയേറ്റ കാര്യങ്ങളെയും നിരീക്ഷിക്കുന്ന പ്രമുഖ മാധ്യമമായ ‘ദി അമേരിക്കൻ ബസാർ’ ആണ് ഈ വിവരങ്ങൾ പുറത്തുവിട്ടത്. സാങ്കേതികവിദ്യ, ഐടി കരാർ ജോലികൾ, കൺസൾട്ടിംഗ് എന്നീ മേഖലകളിലുള്ള ജീവനക്കാരെയാണ് ഈ പുതിയ പ്രതിസന്ധി ഏറ്റവും കൂടുതൽ ബാധിക്കുന്നത്. ഈ മേഖലകളിൽ പണ്ടുമുതലേ വിദേശികളായ വിദഗ്ധ തൊഴിലാളികളെയാണ് അമേരിക്കൻ കമ്പനികൾ വൻതോതിൽ ആശ്രയിച്ചിരുന്നത്.
ഇന്ത്യൻ ഉദ്യോഗാർത്ഥികൾക്ക് തിരിച്ചടി
എച്ച്-1ബി വിസ കൈവശമുള്ളവരിൽ ഭൂരിഭാഗവും ഇന്ത്യ, ചൈന എന്നീ രാജ്യങ്ങളിൽ നിന്നുള്ളവരാണ്. അതുകൊണ്ടുതന്നെ പുതിയ കർശന നിയന്ത്രണങ്ങൾ ഏറ്റവും കൂടുതൽ ബാധിക്കുന്നത് ഇന്ത്യൻ ഐടി പ്രൊഫഷണലുകളെയാണ്. വലിയ കൺസൾട്ടിംഗ് കമ്പനികളിലെയും ഐടി കരാർ കമ്പനികളിലെയും എച്ച്-1ബി, എൽ-1ബി അപേക്ഷകർക്ക് നേരെയാണ് കൂടുതൽ പരിശോധനകൾ നടക്കുന്നത്. വിസ അനുവദിക്കുന്നതിൽ വലിയ കാലതാമസവും വിസ നിരസിക്കപ്പെടലും ഇപ്പോൾ പതിവാകുകയാണെന്ന് മക്എൻറ്റി ലോ ഗ്രൂപ്പിലെ പ്രമുഖ ബിസിനസ് ഇമിഗ്രേഷൻ അഭിഭാഷകനായ ജെയിംസ് ഹോളിസ് വ്യക്തമാക്കുന്നു.
തങ്ങളുടെ വിദ്യാഭ്യാസം, സാങ്കേതിക കഴിവ്, പ്രവൃത്തിപരിചയം എന്നിവയെക്കുറിച്ച് വിശദീകരിക്കാൻ ഉദ്യോഗാർത്ഥികൾ തയ്യാറെടുക്കാറുണ്ടെങ്കിലും, ഒരു അമേരിക്കൻ തൊഴിലാളിക്ക് എന്തുകൊണ്ട് ഈ ജോലി ചെയ്യാൻ കഴിയില്ല എന്ന് സ്ഥാപിക്കാൻ പലർക്കും കഴിയുന്നില്ലെന്ന് അദ്ദേഹം ചൂണ്ടിക്കാണിക്കുന്നു. അടുത്ത മൂന്ന് വർഷത്തേക്ക് ഇമിഗ്രേഷൻ നടപടികൾ കൂടുതൽ കർശനമായി തുടരാനാണ് സാധ്യത.
അഭിമുഖങ്ങളിൽ എങ്ങനെ വിജയിക്കാം?
പ്രതിസന്ധി മറികടക്കാൻ അപേക്ഷകർ കൃത്യമായ തയ്യാറെടുപ്പുകൾ നടത്തണമെന്ന് വിദഗ്ദ്ധർ നിർദ്ദേശിക്കുന്നു. തങ്ങൾ ചെയ്യാൻ പോകുന്ന ജോലിയുടെ പ്രത്യേകത എന്താണെന്ന് വ്യക്തമായി ബോധ്യപ്പെടുത്തുക. ഒരു അമേരിക്കൻ തൊഴിലാളിക്കില്ലാത്ത എന്ത് പ്രത്യേക അറിവോ, വിപണി പരിചയമോ, ബന്ധങ്ങളോ ആണ് തങ്ങൾക്കുള്ളതെന്ന് കൃത്യമായി വിശദീകരിക്കണം. സമർപ്പിക്കുന്ന എല്ലാ രേഖകളും കൃത്യമാണെന്ന് ഉറപ്പുവരുത്തുകയും, യുഎസിലെ ജോലിസ്ഥലം, ശമ്പളം, ചെയ്യേണ്ട ചുമതലകൾ എന്നിവയെക്കുറിച്ച് വ്യക്തമായ ധാരണയുണ്ടായിരിക്കുകയും വേണം.
കമ്പനികൾ നൽകുന്ന ശമ്പളം, അപേക്ഷകരുടെ എണ്ണം തുടങ്ങിയ പല കാര്യങ്ങളും ഉദ്യോഗാർത്ഥികളുടെ നിയന്ത്രണത്തിലല്ലെങ്കിലും, വ്യക്തിപരമായ യോഗ്യതകൾ കൃത്യമായി അഭിമുഖത്തിൽ വിശദീകരിക്കാൻ സാധിച്ചാൽ വിസ ലഭിക്കാനുള്ള സാധ്യത വർദ്ധിക്കുമെന്നും ഇമിഗ്രേഷൻ വിദഗ്ദ്ധർ വ്യക്തമാക്കുന്നു.
New US immigration question traps H-1B applicants; IT employees worried
