വാഷിംഗ്ടൺ: യുഎസ് പ്രസിഡന്‍റ് ഡോണൾഡ് ട്രംപിന്‍റെ പുതിയ വൈറ്റ് ഹൗസ് പ്രസ് സെക്രട്ടറിയായി ചുമതലയേറ്റ കാറ്റി സഖറിയയുടെ മുൻകാല സമൂഹമാധ്യമ പോസ്റ്റുകൾക്കെതിരെ രൂക്ഷ വിമർശനം. പ്രമുഖ ഡെമോക്രാറ്റിക് നേതാക്കൾക്കെതിരെയും ഹോളിവുഡ് പ്രമുഖർക്കെതിരെയും അടിസ്ഥാനരഹിതമായ പീഡോഫീലിയ (കുട്ടികൾക്കെതിരെയുള്ള ലൈംഗികാതിക്രമം) ആരോപണങ്ങളും മറ്റ് ഗൂഢാലോചനാ സിദ്ധാന്തങ്ങളും അവർ മുൻകാലങ്ങളിൽ പ്രചരിപ്പിച്ചിരുന്നതായി സിഎൻഎൻ നടത്തിയ പരിശോധനയിൽ കണ്ടെത്തി.
പ്രധാനമായും 2022ലെ സമൂഹമാധ്യമ പോസ്റ്റുകളിലാണ് കടുത്ത ഭാഷയിലുള്ള വിവാദ പരാമർശങ്ങളുള്ളത്. ‘പിസഗേറ്റ്’ പോലുള്ള തള്ളിക്കളയപ്പെട്ട ഗൂഢാലോചനാ സിദ്ധാന്തങ്ങളെ പിന്തുണച്ചും, ഹോളിവുഡ് പ്രമുഖർ കുട്ടികളെ ലക്ഷ്യമിടുന്നുവെന്ന തരത്തിലും സഖറിയ പോസ്റ്റുകൾ പങ്കുവെച്ചിരുന്നു. ജോൺ പൊഡെസ്ത ഉൾപ്പെടെയുള്ള പ്രമുഖ രാഷ്ട്രീയ വ്യക്തികൾക്കെതിരെയും അവർ സമാനമായ രീതിയിൽ ആരോപണങ്ങൾ ഉന്നയിച്ചിരുന്നു. കൂടാതെ, കുടിയേറ്റ വിഷയങ്ങളിൽ ഭരണകൂടം കൂടുതൽ കടുത്ത നടപടികൾ സ്വീകരിക്കണമെന്നും, റിബൽ അല്ലെങ്കിൽ അധിനിവേശ സാഹചര്യങ്ങളിൽ ഭരണഘടനയുടെ അടിസ്ഥാന അവകാശങ്ങൾ താൽക്കാലികമായി നിർത്തിവെക്കണമെന്നും ആവശ്യപ്പെട്ടുകൊണ്ടുള്ള അവരുടെ മുൻകാല പോസ്റ്റുകളും ചർച്ചയായിട്ടുണ്ട്.
ജെഫ്രി എപ്സ്റ്റിൻ കേസുമായി ബന്ധപ്പെട്ട് നീതിന്യായ വകുപ്പ് വിവരങ്ങൾ മൂടിവെക്കാൻ ശ്രമിച്ചുവെന്നും അവർ കുറ്റപ്പെടുത്തിയിരുന്നു. എന്നാൽ ഈ വിവാദങ്ങളോട് പ്രതികരിക്കാൻ വൈറ്റ് ഹൗസോ കാറ്റി സഖറിയയോ തയ്യാറായിട്ടില്ല. പ്രസിഡന്‍റിന്‍റെ അജണ്ടകൾ കൃത്യമായി ജനങ്ങളിലേക്ക് എത്തിക്കാനാണ് താൻ പ്രസ് സെക്രട്ടറി സ്ഥാനത്ത് എത്തിയതെന്നും ആ ദൗത്യത്തിൽ പൂർണ്ണ ശ്രദ്ധ കേന്ദ്രീകരിക്കുമെന്നും അവർ വ്യക്തമാക്കി. കാറ്റി സഖറിയ മികച്ചൊരു കൂട്ടിച്ചേർക്കലാണെന്നും ഭരണകൂടത്തിന്‍റെ ലക്ഷ്യങ്ങൾ ജനങ്ങളിലെത്തിക്കാൻ അവർക്ക് പ്രത്യേക കഴിവുണ്ടെന്നും വൈറ്റ് ഹൗസ് കമ്മ്യൂണിക്കേഷൻസ് ഡയറക്ടർ സ്റ്റീവൻ ചെങ് പ്രതികരിച്ചു.
