ലോസ് ആഞ്ചലസ്: അമേരിക്കയിലെ ലോസ് ആഞ്ചലസിലെ മേയർ തിരഞ്ഞെടുപ്പിനായുള്ള സ്ഥാനാർത്ഥിയായി മലയാളിയായ സിറ്റി കൗൺസിൽ അംഗം നിത്യ രാമന് തകർപ്പൻ വിജയം. ശക്തമായ ത്രികോണ മത്സരത്തിനൊടുവിൽ പ്രമുഖ റിയാലിറ്റി ടിവി താരം സ്പെൻസർ പ്രാറ്റിനെ അട്ടിമറിച്ചാണ് നിത്യ രാമൻ നവംബറിൽ നടക്കുന്ന അന്തിമ റൺഓഫ് തിരഞ്ഞെടുപ്പിലേക്ക് യോഗ്യത നേടിയത്. നിലവിലെ മേയറായ കാരെൻ ബാസാണ് റൺഓഫിൽ നിത്യയുടെ എതിരാളി. അസോസിയേറ്റഡ് പ്രസാണ് നിത്യയുടെ മുന്നേറ്റം പ്രവചിച്ചത്.
സോഷ്യൽ മീഡിയയിലൂടെ വലിയ തരംഗമുണ്ടാക്കിയ “ദി ഹിൽസ്” താരം സ്പെൻസർ പ്രാറ്റിന് തുടക്കത്തിൽ വലിയ ലീഡുണ്ടായിരുന്നു. എന്നാൽ വോട്ടെണ്ണലിൻ്റെ അവസാന ദിവസങ്ങളിൽ നിത്യ രാമൻ ക്രമാനുഗതമായി വോട്ടുകൾ വർദ്ധിപ്പിച്ച് പ്രാറ്റിനെ മൂന്നാം സ്ഥാനത്തേക്ക് തള്ളുകയായിരുന്നു. പ്രാറ്റ് മത്സരരംഗത്തുനിന്ന് പുറത്തായതോടെ പോരാട്ടം കാരെൻ ബാസും നിത്യ രാമനും തമ്മിലായി.
നിത്യ രാമൻ്റെ മുന്നേറ്റത്തിന് പിന്നാലെ കടുത്ത വിമർശനവുമായി മേയർ കാരെൻ ബാസിൻ്റെ ക്യാമ്പ് രംഗത്തെത്തി. സ്കൂളുകൾക്ക് സമീപം അനധികൃത താൽക്കാലിക താമസസ്ഥലങ്ങൾ അനുവദിക്കുന്ന, പൊലീസുകാരുടെ എണ്ണം കൂട്ടുന്നതിനെ എതിർക്കുന്ന ഒരാളാണ് നിത്യയെന്ന് കാരെൻ ബാസിൻ്റെ വക്താവ് അലക്സ് സ്റ്റാക്ക് കുറ്റപ്പെടുത്തി. ഹോളിവുഡ് തൊഴിൽ മേഖലയിലെ പ്രതിസന്ധികളിലും കേന്ദ്ര ഏജൻസികളുടെ (എസിഇ) ഇടപെടലുകളിലും നിത്യ നിസ്സംഗത പാലിക്കുകയാണെന്നും ബാസിൻ്റെ ക്യാമ്പ് ആരോപിച്ചു.
താൻ നേരത്തെ പിന്തുണച്ചിരുന്ന കാരെൻ ബാസിനെതിരെ ഫെബ്രുവരിയിൽ അപ്രതീക്ഷിതമായാണ് നിത്യ രാമൻ മേയർ സ്ഥാനത്തേക്ക് മത്സരിക്കുമെന്ന് പ്രഖ്യാപിച്ചത്. 2020-ൽ ലോസ് ആഞ്ചലസ് സിറ്റി കൗൺസിലിലേക്ക് തിരഞ്ഞെടുക്കപ്പെട്ട നിത്യ, കൗൺസിലിലെത്തുന്ന ആദ്യ ദക്ഷിണേഷ്യൻ വനിത കൂടിയാണ്. അന്ന് 17 വർഷമായി പദവിയിലിരുന്ന കൗൺസിൽ അംഗത്തെ അട്ടിമറിച്ചാണ് നിത്യ ചരിത്രം കുറിച്ചത്.
പ്രൈമറി തിരഞ്ഞെടുപ്പിൽ ഒരു സ്ഥാനാർത്ഥിക്കും 50 ശതമാനത്തിലധികം വോട്ട് നേടാനാകാത്തതിനാലാണ് ഏറ്റവും കൂടുതൽ വോട്ട് നേടിയ ആദ്യ രണ്ട് സ്ഥാനാർത്ഥികളായ കാരെൻ ബാസും നിത്യ രാമനും തമ്മിൽ നവംബറിൽ റൺഓഫ് തിരഞ്ഞെടുപ്പ് നടക്കുന്നത്.
Nithya Raman advances over Spencer Pratt in Los Angeles mayoral race
