അമേരിക്കൻ ഇടക്കാല തിരഞ്ഞെടുപ്പിൽ ഡെമോക്രാറ്റിക് പാർട്ടിക്കായി പ്രചാരണരംഗത്തിറങ്ങി മുൻ പ്രസിഡന്റ് ബരാക് ഒബാമ. ഇറാൻ യുദ്ധത്തിന്റെയും വർധിച്ചുവരുന്ന വിലക്കയറ്റത്തിന്റെയും പേരിൽ ട്രംപ് ഭരണകൂടത്തിനെതിരെ ഒബാമ രൂക്ഷവിമർശനം ഉന്നയിച്ചു. ഭരണകൂടത്തിന്റെ വിഡ്ഢിത്തങ്ങൾക്കെങ്കിലും നിയന്ത്രണമേർപ്പെടുത്താനുള്ള അവസാനത്തെ മികച്ച അവസരമാണ് ഈ തിരഞ്ഞെടുപ്പ് എന്ന് ശനിയാഴ്ച ഒഹായോയിൽ നടന്ന പ്രചാരണയോഗത്തിൽ ഒബാമ പറഞ്ഞു. ശനിയാഴ്ച ഒഹായോയിലും മിഷിഗണിലും നടന്ന പരിപാടികളിൽ ട്രംപിനെയും മന്ത്രിസഭാംഗങ്ങളെയും ഒബാമ വിമർശിച്ചു.
വൈറ്റ് ഹൗസ് നവീകരിക്കാനുള്ള ട്രംപിന്റെ നീക്കത്തെയും അദ്ദേഹം പരിഹസിച്ചു. ആധുനിക കാലത്ത് കണ്ടിട്ടില്ലാത്ത തരത്തിലുള്ള രണ്ട് വർഷത്തെ അരാജകത്വത്തിനും ക്രൂരതയ്ക്കും അഴിമതിക്കും കഴിവുകേടിനും ശേഷം, ‘ഇനി മതിയാക്കാം’ എന്ന് പറയാനുള്ള അവസരമാണ് നിങ്ങൾക്ക് ലഭിച്ചിരിക്കുന്നതെന്നും ക്ലീവ്‌ലൻഡിലെ പരിപാടിയിൽ ഒബാമ പറഞ്ഞു. കോവിഡ് മഹാമാരിക്കു ശേഷമുള്ള സാമ്പത്തിക പ്രതിസന്ധിയും വിലക്കയറ്റവും കാരണം 2024ൽ ഡെമോക്രാറ്റുകൾക്ക് വോട്ട് ചെയ്യാതിരുന്നവരുടെ ആശങ്കകൾ തനിക്ക് മനസ്സിലാകും. എന്നാൽ, നിലവിലെ സാമ്പത്തിക സ്ഥിതിക്ക് ട്രംപ് തന്നെയാണ് ഉത്തരവാദിയെന്നും അദ്ദേഹം ആരോപിച്ചു. ആ വ്യക്തി വരുന്നതിന് മുമ്പ് എല്ലാത്തിനും വില കൂടുതലാണെന്ന് നിങ്ങൾ കരുതിയിരുന്നെങ്കിൽ, ഇപ്പോൾ എല്ലാത്തിനും വില വീണ്ടും കൂടിയിരിക്കുകയാണ് എന്നും ട്രംപിനെ പരാമർശിച്ച് ഒബാമ പറഞ്ഞു.
വൈറ്റ് ഹൗസ് നവീകരിക്കാനുള്ള ട്രംപിന്റെ നീക്കത്തെയും ഒബാമ പരിഹസിച്ചു. “എന്തിനാണ് ഇത്രയധികം സ്വർണം? സദ്ദാം ഹുസൈൻ ഒരു ചീസ്‌കേക്ക് ഫാക്ടറി തുറന്നതുപോലെയാണ് ട്രംപ് വൈറ്റ് ഹൗസിനെ മാറ്റിയിരിക്കുന്നത്,” ഒബാമ തമാശയായി പറഞ്ഞു. ഇറാൻ യുദ്ധം ഹോർമുസ് കടലിടുക്കിന്റെ കാര്യത്തിൽ ഇറാന് “വീറ്റോ അധികാരം” നൽകിയെന്നും ഒബാമ വ്യക്തമാക്കി. 2026ലെ ഇടക്കാല തിരഞ്ഞെടുപ്പുമായി ബന്ധപ്പെട്ട ഒബാമയുടെ ആദ്യ പ്രചാരണയോഗമായിരുന്നു ഒഹായോയിലേത്. മുൻ സെനറ്റർ ഷെറോഡ് ബ്രൗണിന് പിന്തുണ പ്രഖ്യാപിക്കാനായിരുന്നു പരിപാടി. നിലവിലെ റിപ്പബ്ലിക്കൻ സെനറ്റർ ജോൺ ഹസ്റ്റഡിനെതിരെയാണ് ബ്രൗൺ മത്സരിക്കുന്നത്. ഗവർണർ സ്ഥാനത്തേക്ക് റിപ്പബ്ലിക്കൻ സ്ഥാനാർഥി വിവേക് രാമസ്വാമിക്കെതിരെ മത്സരിക്കുന്ന എമി ആക്ടനും യോഗത്തിൽ പങ്കെടുത്തു.
ഫെബ്രുവരിയിൽ യുദ്ധം ആരംഭിക്കുന്നതിനു മുമ്പ് കപ്പൽഗതാഗതത്തിന് തുറന്നുകിടന്നിരുന്ന പ്രധാന സമുദ്രപാതയാണിത്. ഇറാൻ യുദ്ധത്തെക്കുറിച്ച് ശനിയാഴ്ച ചോദിച്ചപ്പോൾ, “ഞാൻ അത് വളരെ ഫലപ്രദമായി കൈകാര്യം ചെയ്തിട്ടുണ്ട്. ഒരുപക്ഷേ യുദ്ധം അവസാനിപ്പിക്കേണ്ടിവരും; അല്ലെങ്കിൽ അവർ കരാറിന് തയ്യാറായേക്കാം. എന്നാൽ അതിൽ എനിക്ക് ഉറപ്പില്ല. എന്തായാലും വിജയം നമ്മുടേതാണ്,” എന്നായിരുന്നു ട്രംപിന്റെ പ്രതികരണം.റഷ്യ അധിനിവേശത്തിലുള്ള യുക്രെയ്ൻ നഗരമായ ഒലെഷ്കിയിൽ റഷ്യയും യുക്രെയ്‌നും തമ്മിലുള്ള വെടിനിർത്തൽ സാധ്യമാക്കുന്നതിൽ മെലാനിയ ട്രംപ് “വിജയകരമായി ഇടപെട്ടു” എന്ന് വൈറ്റ് ഹൗസ് അവകാശപ്പെട്ടിരുന്നു. മെലാനിയ യുക്രെയ്ൻ സന്ദർശിക്കുമോയെന്ന ചോദ്യത്തിന് “കാത്തിരുന്ന് കാണാം” എന്നായിരുന്നു ട്രംപിന്റെ മറുപടി.
ഇറാൻ, യുക്രെയ്ൻ യുദ്ധങ്ങൾ കാരണം എണ്ണവില ഉയർന്നതോടെ വില കുറയ്ക്കാൻ ട്രംപിന് സമ്മർദമേറുകയാണ്. റിപ്പബ്ലിക്കൻ, ഡെമോക്രാറ്റിക് പാർട്ടികളിലെ ചില നിയമനിർമാതാക്കളുടെ എതിർപ്പിനിടയിലും റഷ്യയിൽനിന്ന് ഡീസൽ അമേരിക്കയിലേക്ക് കയറ്റുമതി ചെയ്യുന്നതിനായി ട്രംപ് അടുത്തിടെ കരാറിലെത്തിയിരുന്നു. അതേസമയം, ഫ്ലോറിഡയിൽ ഭാര്യ മെലാനിയ ട്രംപിനൊപ്പം നേരത്തേ വോട്ട് രേഖപ്പെടുത്തിയ പ്രസിഡന്റ് ഡോണൾഡ് ട്രംപ്, ജോർജിയയിൽ നടന്ന റാലിയിലൂടെ വോട്ടർമാരെ ആവേശത്തിലാക്കാൻ ശ്രമിച്ചു. നവംബർ മൂന്നിനാണ് ഇടക്കാല തിരഞ്ഞെടുപ്പ്. കോൺഗ്രസിന്റെ നിയന്ത്രണം ആർക്കായിരിക്കുമെന്ന് നിർണയിക്കുന്ന തിരഞ്ഞെടുപ്പിന്റെ ആദ്യഘട്ട വോട്ടെടുപ്പ് ഇതിനകം ആരംഭിച്ചു. ട്രംപിന്റെ പ്രസിഡന്റ് കാലാവധിയുടെ ശേഷിക്കുന്ന കാലയളവിൽ കോൺഗ്രസിൽ ഏതു പാർട്ടിക്കായിരിക്കും ഭൂരിപക്ഷമെന്നത് ഈ തിരഞ്ഞെടുപ്പിലൂടെ വ്യക്തമാകും.
Obama attacks Trump as he campaigns for Democrats ahead of midterm elections
