വാഷിംഗ്ടൺ: രാജ്യവ്യാപകമായി നടക്കുന്ന ഇടക്കാല തെരഞ്ഞെടുപ്പിന് മുന്നോടിയായി മിഷിഗണിലെ പോർട്ട് ഹ്യൂറണിൽ നടന്ന റിപ്പബ്ലിക്കൻ പാർട്ടിയുടെ വമ്പൻ പ്രചാരണ റാലിയിൽ യുഎസ് പ്രസിഡന്റ് ഡോണൾഡ് ട്രംപിനൊപ്പം പ്രശസ്ത റാപ്പർ നിക്കി മിനാജ് വേദി പങ്കിട്ടു. റിപ്പബ്ലിക്കൻ സ്ഥാനാർത്ഥികൾക്ക് വോട്ട് അഭ്യർത്ഥിച്ച് ട്രംപിനൊപ്പം എയർഫോഴ്സ് വൺ വിമാനത്തിലാണ് താരം മിഷിഗണിൽ എത്തിയത്.
റിപ്പബ്ലിക്കൻ സ്ഥാനാർത്ഥികൾക്കായി വോട്ട് അഭ്യർത്ഥിച്ച നിക്കി മിനാജ്, ഡോണൾഡ് ട്രംപ് രാജ്യത്തിന്റെ ഊർജ്ജം മാറ്റിമറിച്ചുവെന്നും തങ്ങൾക്ക് പ്രതീക്ഷയോടെ നോക്കിക്കാണാൻ പറ്റിയ ഒരു ഭാവി നൽകിയെന്നും വേദിയിൽ പറഞ്ഞു. “രാജ്യം ഒരു നിർണായക വഴിത്തിരിവിലൂടെയാണ് കടന്നുപോകുന്നത്, അതിനാൽ ഈ മികച്ച വ്യക്തികളെല്ലാം തെരഞ്ഞെടുക്കപ്പെടേണ്ടതുണ്ട്,” സ്വർണ്ണ നിറത്തിലുള്ള ഗുച്ചി സ്യൂട്ട് ധരിച്ചെത്തിയ മിനാജ് ജനക്കൂട്ടത്തോട് ആഹ്വാനം ചെയ്തു.
റാലിയിൽ ട്രംപ് നിക്കി മിനാജിന്റെ രൂപഭംഗിയെ പരസ്യമായി പ്രശംസിച്ചതും ശ്രദ്ധേയമായി. റാലിയിൽ പങ്കെടുക്കാനെത്തിയ നിക്കി മിനാജിന്റെ ശരീരപ്രകൃതിയെയും രൂപഭംഗിയെയും കുറിച്ച് ട്രംപ് പരസ്യമായി നടത്തിയ പരാമർശങ്ങൾ വലിയ രീതിയിൽ ശ്രദ്ധിക്കപ്പെടുകയും ചർച്ചയാവുകയും ചെയ്തു. മറ്റൊരു പുരുഷ റിപ്പബ്ലിക്കൻ സ്ഥാനാർത്ഥിയുടെ ശരീരത്തെ പ്രശംസിച്ചതിന് തൊട്ടുപിന്നാലെയാണ് ട്രംപ് സദസ്സിന്റെ ശ്രദ്ധ നിക്കി മിനാജിലേക്ക് തിരിച്ചത്. “ഞാൻ നേരത്തെ അതിമനോഹരമായ ഒരു ശരീരം (പിൻഭാഗം) കണ്ടിരുന്നു; നിക്കി മിനാജ്, അത് ആർക്കും ശ്രദ്ധിക്കാതിരിക്കാൻ കഴിയില്ല,” എന്ന് പറഞ്ഞ ട്രംപ് താരത്തോട് എഴുന്നേറ്റു നിൽക്കാൻ ആവശ്യപ്പെടുകയും ചെയ്തു. സദസ്സ് ഇതിനോട് ആവേശത്തോടെയാണ് പ്രതികരിച്ചത്. തുടർന്ന്, തന്റെ ഈ വാക്കുകളിൽ മിനാജിന് ഒട്ടും അപമാനം തോന്നിയിട്ടില്ലെന്ന് താൻ കരുതുന്നതായും ട്രംപ് കൂട്ടിച്ചേർത്തു.
റാപ്പ് റാണി വേദിയിലെത്തിയപ്പോൾ തന്നേക്കാൾ കൂടുതൽ ജനശ്രദ്ധ അവർക്ക് ലഭിക്കുന്നതിലുള്ള തമാശ കലർന്ന അസൂയയും ട്രംപ് പങ്കുവെച്ചു. “എന്നെക്കാൾ മറ്റാരെങ്കിലും തിളങ്ങി നിൽക്കുന്നത് എനിക്ക് ഇഷ്ടമല്ലെന്ന് നിങ്ങൾക്കറിയാമല്ലോ. ഈ സ്ത്രീ എന്നെ നിഴലിലാക്കിക്കളഞ്ഞു, എനിക്ക് അതിൽ ദേഷ്യമുണ്ട്,” എന്ന് ട്രംപ് പറഞ്ഞു. നിക്കി മിനാജ് പ്രസംഗം കഴിഞ്ഞ് വേദി വിട്ടതിന് ശേഷവും ട്രംപ് പ്രശംസ തുടർന്നു. “അവർ ഇതിനു മുൻപ് ഒരിക്കലും ഇത്രയും സുന്ദരിയായി കാണപ്പെട്ടിട്ടില്ല. അവർക്ക് കാര്യങ്ങൾ മനസ്സിലാകുന്നുണ്ട്, അവർ മിടുക്കിയാണ്,” എന്നായിരുന്നു ട്രംപിന്റെ വാക്കുകൾ. താൻ ട്രംപിന്റെ ‘നമ്പർ വൺ ഫാൻ’ ആണെന്ന് മിനാജ് മുൻപും തുറന്നുപറഞ്ഞിട്ടുണ്ട്.
അതേസമയം, മിഷിഗണിലെ സെനറ്റ് സീറ്റിലേക്ക് ഡെമോക്രാറ്റിക് സ്ഥാനാർത്ഥി അബ്ദുൾ എൽ-സയീദും റിപ്പബ്ലിക്കൻ സ്ഥാനാർത്ഥി മൈക്ക് റോഗേഴ്സും തമ്മിൽ കടുത്ത മത്സരമാണ് നടക്കുന്നത്. റാലിയിൽ ഡെമോക്രാറ്റിക് സ്ഥാനാർത്ഥിയുടെ മുസ്ലീം പശ്ചാത്തലത്തെ ലക്ഷ്യമിട്ട് ട്രംപ് കടുത്ത വർഗീയ-ഇസ്‌ലാമോഫോബിക് പരാമർശങ്ങൾ നടത്തി. എൽ-സയീദ് വിജയിച്ചാൽ അദ്ദേഹം രാജ്യത്തേക്ക് ഭീകരരെ ക്ഷണിച്ചുവരുത്തുമെന്ന് ട്രംപ് ആരോപിച്ചു.
തന്റെ വിശ്വാസവും പേരും ഉപയോഗിച്ച് ജനങ്ങളെ ഭിന്നിപ്പിക്കാനാണ് ട്രംപ് ശ്രമിക്കുന്നതെന്നും വിലക്കയറ്റവും ആരോഗ്യമേഖലയിലെ പ്രതിസന്ധികളും പോലുള്ള യഥാർത്ഥ പ്രശ്നങ്ങളിൽ നിന്ന് ജനശ്രദ്ധ തിരിക്കാനാണ് ഇത്തരം വിദ്വേഷ പ്രസംഗങ്ങളെന്നും അബ്ദുൾ എൽ-സയീദ് ഇതിനോട് പ്രതികരിച്ചു. നവംബർ 3-ന് നടക്കുന്ന ഇടക്കാല തെരഞ്ഞെടുപ്പ് ട്രംപിന്റെ ബാക്കി ഭരണകാലയളവിൽ കോൺഗ്രസിന്റെ നിയന്ത്രണം ഏത് പാർട്ടിക്ക് ആയിരിക്കുമെന്ന് നിർണ്ണയിക്കുന്നതിൽ നിർണ്ണായകമാണ്.
Rapper Nicki Minaj joins Trump on stage at a Michigan Republican rally; US President launches sharp criticism against his opponent.
