വാഷിംഗ്ടൺ: റിപ്പബ്ലിക്കൻ സെനറ്റർ ഡാൻ എസ്. സള്ളിവൻ പരാജയപ്പെട്ടാൽ അലാസ്കയിലെ തിരഞ്ഞെടുപ്പ് ഫലം തടയണമെന്നാവശ്യപ്പെട്ട് ട്രംപ് ഭരണകൂടം ഫയൽ ചെയ്ത വ്യവഹാരത്തിനെതിരെ ഡെമോക്രാറ്റ് നേതാക്കൾ രംഗത്ത്. ഡെമോക്രാറ്റിക് സെനറ്റോറിയൽ ക്യാമ്പെയ്ൻ കമ്മിറ്റിയും അലാസ്കയിലെ ഡെമോക്രാറ്റിക് സെനറ്റ് സ്ഥാനാർത്ഥി മേരി പെൽട്ടോളയുടെ അഭിഭാഷകരും ചേർന്ന് ഫെഡറൽ കോടതിയിൽ ഇതിനെതിരെ ഔദ്യോഗികമായി മറുപടി നൽകി.
ഡെമോക്രാറ്റിക് പ്രക്രിയകൾക്ക് മേലുള്ള കടന്നുകയറ്റമാണിതെന്ന് ചൂണ്ടിക്കാട്ടിയാണ് ഇവർ കോടതിയെ സമീപിച്ചിരിക്കുന്നത്. തിരഞ്ഞെടുപ്പ് ഫലം അട്ടിമറിക്കാനുള്ള നീക്കമാണിതെന്നും വോട്ടർമാരെ അപമാനിക്കുന്നതിന് തുല്യമാണിതെന്നുമാണ് ഹർജിയിൽ വ്യക്തമാക്കുന്നത്.
അതേ പേരിലുള്ള മറ്റൊരു സ്ഥാനാർത്ഥി (ഡാനിയേൽ ജെ. സള്ളിവൻ ജൂനിയർ) ബാലറ്റിൽ ഉള്ളതിനാൽ വോട്ടർമാർക്ക് ആശയക്കുഴപ്പമുണ്ടാകാം എന്ന വാദമാണ് ജസ്റ്റിസ് ഡിപ്പാർട്ട്മെന്റ് മുന്നോട്ടുവെക്കുന്നത്. എന്നാൽ അലാസ്കയുടെ റാങ്ക്ഡ്-ചോയ്സ് വോട്ടിംഗ് സമ്പ്രദായത്തെയും വോട്ടർമാരുടെ വിധിയെയും നിഷേധിക്കുന്നതാണ് ഫെഡറൽ സർക്കാരിന്റെ നടപടിയെന്ന് ഡെമോക്രാറ്റുകൾ കുറ്റപ്പെടുത്തുന്നു.
