ടെൽ അവീവ്: പശ്ചിമേഷ്യയെ പിടിച്ചുകുലുക്കിയ ഹമാസ് ആക്രമണത്തിനും അതിനെത്തുടർന്നുണ്ടായ കടുത്ത യുദ്ധങ്ങൾക്കും ശേഷം ഇസ്രയേൽ നാളെ (ചൊവ്വാഴ്ച) പോളിംഗ് ബൂത്തിലേക്ക്. രാജ്യം ഇന്നേവരെ കണ്ടിട്ടില്ലാത്ത വിധം പ്രവചനാതീതമായ രാഷ്ട്രീയ സാഹചര്യത്തിലാണ് ജനവിധി തേടുന്നത്. പതിറ്റാണ്ടുകളായി ഇസ്രയേൽ രാഷ്ട്രീയം നിയന്ത്രിക്കുന്ന പ്രധാനമന്ത്രി ബെഞ്ചമിൻ നെതന്യാഹുവിന്റെ രാഷ്ട്രീയഭാവി നിർണ്ണയിക്കുന്നതാണ് ഈ വോട്ടെടുപ്പ്. മുൻ പ്രതിരോധ സേനാ (IDF) മേധാവി ഗാഡി ഐസൻകോട്ട് നയിക്കുന്ന ശക്തമായ ജനകീയ മുന്നേറ്റമാണ് നെതന്യാഹുവിനും അദ്ദേഹത്തിന്റെ ലികുഡ് പാർട്ടിക്കും ഇത്തവണ ഏറ്റവും വലിയ വെല്ലുവിളി ഉയർത്തുന്നത്.
യുദ്ധകാലത്തെ നെതന്യാഹു സർക്കാരിന്റെ വീഴ്ചകളും തടവുകാരുടെ മോചനവുമായി ബന്ധപ്പെട്ട ജനരോഷവുമാണ് പ്രതിപക്ഷം പ്രധാന ആയുധമാക്കുന്നത്. ഹമാസ് ആക്രമണത്തിന് പിന്നാലെ രൂപീകരിച്ച അടിയന്തര യുദ്ധ കാബിനറ്റിൽ അംഗമായിരുന്ന ഐസൻകോട്ട്, നെതന്യാഹുവിന് കൃത്യമായ യുദ്ധ പ്ലാനുകൾ ഇല്ലെന്ന് ആരോപിച്ച് കഴിഞ്ഞ വർഷം ജൂണിലാണ് മന്ത്രിസഭ വിട്ടത്. ഗാസയിലെ യുദ്ധത്തിൽ സ്വന്തം മകനെയും രണ്ട് മരുമക്കളെയും നഷ്ടപ്പെട്ട ഐസൻകോട്ടിന്റെ വ്യക്തിപരമായ പോരാട്ടം വോട്ടർമാർക്കിടയിൽ വലിയ സഹതാപ തരംഗമുണ്ടാക്കിയിട്ടുണ്ട്. സ്വന്തം അധികാരം നിലനിർത്താൻ മാത്രമാണ് നെതന്യാഹു യുദ്ധം നീട്ടിക്കൊണ്ടുപോകുന്നതെന്നാണ് ഐസൻകോട്ടിന്റെയും ‘യാഷർ’ പാർട്ടിയുടെയും പ്രധാന ആക്ഷേപം.
പ്രവചനാതീതമായ സർവേ ഫലങ്ങൾ
അവസാനഘട്ട സർവേ ഫലങ്ങളെല്ലാം ഇസ്രയേലിൽ കടുത്ത രാഷ്ട്രീയ അനിശ്ചിതാവസ്ഥയാണ് പ്രവചിക്കുന്നത്. ഇസ്രയേൽ പാർലമെന്റായ നെസ്സറ്റിൽ ആകെ 120 സീറ്റുകളാണുള്ളത്. നാലുവർഷത്തിലൊരിക്കലാണ് തിരഞ്ഞെടുപ്പ് നടക്കേണ്ടതെങ്കിലും രാഷ്ട്രീയ അസ്ഥിരത കാരണം പലപ്പോഴും കാലാവധി പൂർത്തിയാകുംമുമ്പ് തിരഞ്ഞെടുപ്പ് നടക്കാറുണ്ട്. 2022-ൽ മൂന്നുവർഷത്തിനിടെ അഞ്ചാം തവണയാണ് നെസ്സറ്റ് പിരിച്ചുവിട്ട് തിരഞ്ഞെടുപ്പ് നടത്തിയത്.
നെസറ്റ് ഭരണത്തിലെത്താൻ 61 സീറ്റുകൾ ആവശ്യമാണ്. എന്നാൽ, നെതന്യാഹു അനുകൂല വലതുപക്ഷ മുന്നണിക്കും പ്രതിപക്ഷ മുന്നണിക്കും വ്യക്തമായ ഭൂരിപക്ഷം ലഭിക്കില്ലെന്നാണ് സൂചനകൾ. നെതന്യാഹുവിന്റെ സഖ്യത്തിന് 50 മുതൽ 51 വരെ സീറ്റുകൾ ലഭിക്കുമ്പോൾ, പ്രതിപക്ഷ സഖ്യം 52 മുതൽ 56 വരെ സീറ്റുകൾ നേടിയേക്കാമെന്ന് വിവിധ സർവേകൾ ചൂണ്ടിക്കാണിക്കുന്നു. ഇതോടെ, ഇത്തവണ 14 മുതൽ 16 വരെ സീറ്റുകൾ നേടിയേക്കാവുന്ന അറബ് രാഷ്ട്രീയ പാർട്ടികളുടെ നിലപാട് സർക്കാർ രൂപീകരണത്തിൽ അതീവ നിർണായകമാകും. ഇസ്രയേൽ ചരിത്രത്തിൽ ഇന്നുവരെ ഒരു പാർട്ടിക്കും ഒറ്റയ്ക്ക് ഭൂരിപക്ഷം ലഭിച്ചിട്ടില്ല. അതിനാൽ 120 അംഗ നെസ്സറ്റിൽ ഭൂരിപക്ഷമായ 61 സീറ്റുകൾ ഉറപ്പാക്കാൻ വിവിധ കക്ഷികൾ ചേർന്ന് മുന്നണിയുണ്ടാക്കണം.
ചരിത്രം കുറിക്കാൻ ഐസൻകോട്ട്?
പരമ്പരാഗതമായി യൂറോപ്യൻ പശ്ചാത്തലമുള്ള (അഷ്കെനാസി) വരേണ്യവർഗം ഭരിച്ച ഇസ്രയേൽ രാഷ്ട്രീയത്തിൽ, മൊറോക്കൻ കുടിയേറ്റ പശ്ചാത്തലമുള്ള (മിസ്രാഹി ജൂതൻ) ഗാഡി ഐസൻകോട്ടിന്റെ മുന്നേറ്റം വലിയ വംശീയ മാറ്റങ്ങൾക്കും കാരണമായേക്കാം. നെതന്യാഹുവിന്റെ പരമ്പരാഗത വോട്ട് ബാങ്കായ മിസ്രാഹി വോട്ടർമാർക്കിടയിൽ ഐസൻകോട്ടിനുള്ള സ്വാധീനം ലികുഡ് പാർട്ടിയുടെ കോട്ടകളിൽ വിള്ളൽ വീഴ്ത്തിയിട്ടുണ്ട്. വിജയിക്കുകയാണെങ്കിൽ ഇസ്രയേലിന്റെ ചരിത്രത്തിലെ ആദ്യ ‘മിസ്രാഹി’ പ്രധാനമന്ത്രിയായി ഐസൻകോട്ട് മാറും.
പതിനെട്ട് വയസ്സ് പൂർത്തിയായ, വോട്ടർപ്പട്ടികയിൽ പേരുള്ള എല്ലാ ഇസ്രയേൽ പൗരന്മാർക്കും പാസ്പോർട്ട്, ഡ്രൈവിങ് ലൈസൻസ് അല്ലെങ്കിൽ ഇസ്രയേൽ തിരിച്ചറിയൽ കാർഡ് ഉപയോഗിച്ച് തങ്ങളുടെ വീടിനടുത്തുള്ള പോളിങ് സ്റ്റേഷനിൽ വോട്ട് രേഖപ്പെടുത്താം. വിദേശത്തുള്ള ഭൂരിഭാഗം പൗരന്മാർക്കും അവിടെനിന്ന് വോട്ട് ചെയ്യാനുമാകില്ല. ഇസ്രയേൽ ജനസംഖ്യയുടെ ഏകദേശം 20 ശതമാനം വരുന്ന അറബ് പൗരന്മാരുടെ പോളിങ് ശതമാനം ഇത്തവണത്തെ തിരഞ്ഞെടുപ്പ് ഫലത്തിൽ ഏറെ നിർണായകമാകും.
നാളെ വോട്ടെടുപ്പ് പൂർത്തിയാകുമെങ്കിലും നവംബർ ആദ്യവാരത്തോടെ മാത്രമേ ഔദ്യോഗിക ഫലപ്രഖ്യാപനം ഉണ്ടാകൂ. ആർക്കും ഭൂരിപക്ഷമില്ലാത്ത സാഹചര്യമുണ്ടായാൽ സങ്കീർണ്ണമായ സഖ്യചർച്ചകൾക്കും, ഇസ്രയേൽ രാഷ്ട്രീയത്തിൽ അധികാരം പങ്കിടുന്ന റൊട്ടേഷൻ ഭരണരീതിക്കും വരുംദിവസങ്ങളിൽ രാജ്യം സാക്ഷ്യം വഹിക്കേണ്ടി വരും.
A pivotal general election in Israel’s history takes place tomorrow; it is a do-or-die battle for Netanyahu, with former military chief Gadi Eizenkot posing a strong challenge.
