കീവ്: യുക്രെയ്നിലെ പ്രമുഖ ഡാറ്റാ സെന്ററുകളെയും ടെലികോം വിനിമയ ശൃംഖലകളെയും ലക്ഷ്യമിട്ട് റഷ്യ നടത്തിയ ശക്തമായ വ്യോമാക്രമണങ്ങളിൽ ഒരു കൗമാരക്കാരി ഉൾപ്പെടെ ആറ് പേർ കൊല്ലപ്പെട്ടു. പുലർച്ചെയോടെയാണ് രാജ്യം കണ്ട ഏറ്റവും വലിയ ഡിജിറ്റൽ ഇൻഫ്രാസ്ട്രക്ചർ ആക്രമണങ്ങളിലൊന്ന് റഷ്യ അഴിച്ചുവിട്ടത് .
യുക്രെയ്നിലെ പ്രമുഖ മൊബൈൽ-ഇന്റർനെറ്റ് സേവന ദാതാക്കളായ കീവ്സ്റ്റാർ , വോഡഫോൺ , ഡാറ്റാഗ്രൂപ്പ് എന്നിവയുടെ പ്രധാന കേന്ദ്രങ്ങളെയും ഡാറ്റാ സ്റ്റോറേജുകളെയുമാണ് മിസൈലുകളും ഡ്രോണുകളും ഉപയോഗിച്ച് റഷ്യ ലക്ഷ്യമിട്ടത്. ആക്രമണത്തെ തുടർന്ന് തലസ്ഥാനമായ കീവിലും പരിസര പ്രദേശങ്ങളിലും ഇന്റർനെറ്റ്, കമ്മ്യൂണിക്കേഷൻ സംവിധാനങ്ങൾ പൂർണ്ണമായും തടസ്സപ്പെട്ടു.
രാജ്യത്തിന്റെ എട്ടോളം മേഖലകളിലെ ജനവാസ കേന്ദ്രങ്ങളിലും ഊർജ്ജ നിലയങ്ങളിലും കടുത്ത നാശനഷ്ടങ്ങളാണ് റിപ്പോർട്ട് ചെയ്തിരിക്കുന്നത്. സപ്പോറീഷ്യ മേഖലയിൽ മൂന്ന് പേരും കീവിൽ ഒരാളും വ്യോമാക്രമണത്തിൽ കൊല്ലപ്പെട്ടു. വടക്കുകിഴക്കൻ മേഖലയായ സുമിയിലുണ്ടായ ബോംബാക്രമണത്തിലാണ് പതിനാറുകാരിയായ പെൺകുട്ടിയും ഒരു വയോധികയും കൊല്ലപ്പെട്ടത്.
യുക്രെയ്ന്റെ ആശയവിനിമയ സംവിധാനങ്ങൾ തകർത്ത് രാജ്യത്തെ നിശ്ചലമാക്കുക എന്ന ലക്ഷ്യത്തോടെയുള്ള ‘ഹൈബ്രിഡ്’ യുദ്ധമുറയാണ് റഷ്യ ഇപ്പോൾ നടത്തുന്നതെന്ന് യുക്രെയ്ൻ സൈനിക വക്താക്കൾ അറിയിച്ചു. തകരാറിലായ ടെലികോം ശൃംഖലകൾ അടിയന്തരമായി പുനഃസ്ഥാപിക്കാനുള്ള ശ്രമങ്ങൾ യുക്രെയ്ൻ ആരംഭിച്ചിട്ടുണ്ട്.
Russia launches massive air strike on Ukraine’s digital sector; 6 dead, including a teenager.
