വാഷിംഗ്ടൺ: അന്താരാഷ്ട്ര വ്യാപാര പാതയായ ഹോർമുസ് കടലിടുക്കിൽ വാണിജ്യ കപ്പലുകൾക്ക് നേരെ ഇറാൻ നടത്തിയ ആക്രമണങ്ങൾക്ക് മറുപടിയായി യു.എസ് സൈന്യം ശക്തമായ തിരിച്ചടി തുടങ്ങിയതായി യു.എസ് സെൻട്രൽ കമാൻഡ് അറിയിച്ചു.
മേഖലയിൽ സമാധാനം നിലനിർത്താൻ രൂപീകരിച്ച വെടിനിർത്തൽ കരാറിൻ്റെ നഗ്നമായ ലംഘനമാണ് ഇറാൻ്റെ ഭാഗത്തുനിന്നുണ്ടായതെന്ന് യു.എസ് കുറ്റപ്പെടുത്തി. കഴിഞ്ഞ രണ്ട് ദിവസത്തിനിടെ ഹോർമുസ് കടലിടുക്കിലൂടെ സഞ്ചരിച്ച മൂന്ന് പ്രമുഖ ഓയിൽ ടാങ്കറുകൾക്ക് നേരെ ഇറാൻ്റെ ഇസ്ലാമിക് റെവല്യൂഷണറി ഗാർഡ് കോർപ്സ് ആക്രമണം നടത്തിയതായി രണ്ട് യു.എസ് ഉദ്യോഗസ്ഥർ സിബിഎസ് ന്യൂസിനോട് സ്ഥിരീകരിച്ചിട്ടുണ്ട്. ഇതിന് തൊട്ടുപിന്നാലെയാണ് അമേരിക്കയുടെ വൻ സൈനിക നീക്കം.
നിരപരാധികളായ സാധാരണക്കാർ നയിക്കുന്ന വാണിജ്യ കപ്പലുകളെ ലക്ഷ്യമിട്ടതിന് ഇറാൻ വലിയ വില നൽകേണ്ടിവരുമെന്നും, ഇതിനായി ശക്തമായ തുടർച്ചയായ വ്യോമാക്രമണങ്ങൾ ആരംഭിച്ചതായും ചൊവ്വാഴ്ച വൈകിട്ട് സെൻ്റകോം പുറത്തുവിട്ട സോഷ്യൽ മീഡിയ പോസ്റ്റിൽ വ്യക്തമാക്കുന്നു. ഇറാൻ്റെ ആക്രമണത്തിൽ കപ്പലുകൾക്ക് നേരിയ കേടുപാടുകൾ സംഭവിച്ചതായാണ് റിപ്പോർട്ട്.
അതേസമയം, മേഖലയിൽ വീണ്ടും യുദ്ധപ്രതീതി ഉയർന്നതോടെ അന്താരാഷ്ട്ര വിപണിയിൽ എണ്ണവിലയിൽ പെട്ടെന്ന് വലിയ വർദ്ധനവ് രേഖപ്പെടുത്തി. ഇരു രാജ്യങ്ങളും തമ്മിലുള്ള നയതന്ത്ര ചർച്ചകളെയും സമാധാന ശ്രമങ്ങളെയും ഈ പുതിയ സൈനിക നീക്കം വരും ദിവസങ്ങളിൽ എങ്ങനെ ബാധിക്കുമെന്ന ആശങ്കയിലാണ് ലോകരാജ്യങ്ങൾ.
Ship attack in the Strait of Hormuz: America retaliates strongly against Iran; War looms in the region
