വയനാട് കള്ളാടി തുരങ്കപാത നിർമ്മാണ സ്ഥലത്തുണ്ടായ മണ്ണിടിച്ചിൽ ദുരന്തമേഖല നാളെ മുഖ്യമന്ത്രി വി ഡി സതീശൻ സന്ദർശിക്കും. രാവിലെ 11.30-ന് തിരുവനന്തപുരം വിമാനത്താവളത്തിൽ നിന്നും ഹെലികോപ്ടറിൽ യാത്ര തിരിക്കുന്ന മുഖ്യമന്ത്രി ഉച്ചയ്ക്ക് ഒരു മണിയോടെ അപകടസ്ഥലത്തെത്തും. അപകടത്തിൽ അഞ്ച് പേർ മരിച്ചതായാണ് വിവരം. ഇതിൽ അതിഥി തൊഴിലാളികളായ മൂന്ന് പേരുടെ മൃതദേഹങ്ങൾ തിരിച്ചറിഞ്ഞു. മധ്യപ്രദേശ് സ്വദേശി ചന്ദ്രഭാൻ, ബിഹാർ സ്വദേശി വികാസ് കുമാർ, ജാർഖണ്ഡ് സ്വദേശി അന്മോൾ എന്നിവരാണ് മരിച്ചവർ. കള്ളാടിയിൽ തുരങ്കപാത പദ്ധതി പ്രദേശത്ത് ജോലിയിലുണ്ടായിരുന്ന തൊഴിലാളികളും സുരക്ഷാ ജീവനക്കാരുമാണ് അപകടത്തിൽപ്പെട്ടത്.
ദുരന്ത സ്ഥലത്ത് അഞ്ചുപേരെക്കൂടി കാണാനില്ലെന്ന് സ്ഥലം സന്ദർശിച്ച മന്ത്രിമാരായ ടി സിദ്ധീഖും അനിൽ കുമാറും വാർത്താസമ്മേളനത്തിൽ അറിയിച്ചു. വിക്രം, രാഹുൽ, മുഹമ്മദ് ഇമ്രാൻ, രാകേഷ്, അസറുദ്ദീൻ അൻസാരി എന്നിവരെയാണ് കാണാതായത്. അപകടത്തിൽ പരിക്കേറ്റ രണ്ട് പേരുടെ നില ഗുരുതരമായി തുടരുകയാണ്. ഇതിൽ ഐസിയുവിൽ കഴിയുന്ന ദിലീപ് എന്നയാളുടെ നില അങ്ങേയറ്റം ദയനീയമാണെന്ന് മന്ത്രിമാർ വ്യക്തമാക്കി. കാണാതായവർക്കായുള്ള തിരച്ചിൽ രാത്രി വൈകിയും തുടരുകയാണ്. വിനോദസഞ്ചാരികളോ മറ്റാരെങ്കിലുമോ മണ്ണിനടിയിൽ പെട്ടിട്ടുണ്ടോ എന്ന ആശങ്കയും നിലനിൽക്കുന്നുണ്ട്.
നാളെ ദുരന്തമേഖലയിൽ പൂർണ്ണമായ ശാസ്ത്രീയ പരിശോധന നടത്താൻ തീരുമാനിച്ചതിനാൽ അപകടസ്ഥലത്തേക്ക് പൊതുജനങ്ങൾക്കുള്ള പ്രവേശനം പൂർണ്ണമായി നിരോധിച്ചിട്ടുണ്ട്. രക്ഷാപ്രവർത്തനം കൂടുതൽ ഊർജ്ജിതമാക്കാൻ പ്രദേശം നാല് സോണുകളാക്കി തിരിക്കുമെന്നും മൃതദേഹങ്ങൾ കണ്ടെത്താൻ കെടാവർ നായ്ക്കളെ എത്തിക്കുമെന്നും മന്ത്രി ടി സിദ്ധീഖ് പറഞ്ഞു. മരിച്ചവരുടെ പോസ്റ്റ്മോർട്ടം നടപടികൾ വേഗത്തിൽ പൂർത്തിയാക്കി മൃതദേഹങ്ങൾ നാട്ടിലെത്തിക്കാനുള്ള ക്രമീകരണങ്ങൾ ചെയ്യും. തകർന്ന റോഡുകൾ ഗതാഗതയോഗ്യമാക്കാനുള്ള പണികൾ ഉടൻ ആരംഭിക്കുമെന്നും മന്ത്രിമാർ കൂട്ടിച്ചേർത്തു.
തുരങ്ക പാത നിർമ്മാണ മേഖലയോട് ചേർന്ന് മീനാക്ഷി പാലത്തിന് സമീപമാണ് വലിയ രീതിയിൽ മണ്ണിടിച്ചിലുണ്ടായത്. അപകടത്തെ തുടർന്ന് മുൻകരുതലിന്റെ ഭാഗമായി സമീപവാസികളെ ചുളിക്ക സർക്കാർ എൽപി സ്കൂളിലെ ദുരിതാശ്വാസ ക്യാമ്പിലേക്ക് മാറ്റിപ്പാർപ്പിച്ചു. മേപ്പാടിയിൽ നിന്ന് ചൂരൽമലയിലേക്കുള്ള ഏക പാതയിലാണ് മണ്ണിടിഞ്ഞത് എന്നതിനാൽ ചൂരൽമല, അട്ടമല പ്രദേശങ്ങൾ പൂർണ്ണമായി ഒറ്റപ്പെട്ട നിലയിലാണ്. വോളന്റിയർമാരുടെ സേവനം ഉറപ്പാക്കി പ്രതികൂല കാലാവസ്ഥയിലും രക്ഷാപ്രവർത്തനം മുന്നോട്ട് കൊണ്ടുപോകാനാണ് അധികൃതരുടെ തീരുമാനം.
Wayanad landslide: CM V D Satheesan to visit disaster site tomorrow; three deceased identified
