സാൻഫ്രാൻസിസ്കോ: കുടുംബത്തോടൊപ്പം കാർ കൊക്കയിലേക്ക് ഓടിച്ചിറക്കി കൊലപ്പെടുത്താൻ ശ്രമിച്ച കേസിൽ ഇന്ത്യൻ വംശജനായ റേഡിയോളജിസ്റ്റ് ധർമ്മേഷ് പട്ടേലിനെതിരെയുള്ള (45) എല്ലാ ക്രിമിനൽ കുറ്റങ്ങളും കാലിഫോർണിയ കോടതി റദ്ദാക്കി. മാനസികാരോഗ്യ ചികിത്സ വിജയകരമായി പൂർത്തിയാക്കിയതിനെത്തുടർന്നാണിത്. ഇദ്ദേഹം രണ്ട് വർഷത്തെ പ്രത്യേക കൗൺസിലിംഗും നിരീക്ഷണവും പൂർത്തിയാക്കിയതോടെയാണ് കാലിഫോർണിയ നിയമപ്രകാരം ഇദ്ദേഹത്തിൻ്റെ പേരിലുള്ള കേസ് പൂർണ്ണമായും റദ്ദാക്കിയത്.
അത്ഭുതകരമായ രക്ഷപ്പെടൽ
2023 ജനുവരി 2-നാണ് കാലിഫോർണിയയിലെ പസഫിക് കോസ്റ്റ് ഹൈവേയിലുള്ള ‘ഡെവിൾസ് സ്ലൈഡ്’ എന്നറിയപ്പെടുന്ന 250 അടി താഴ്ചയുള്ള കൊക്കയിലേക്ക് ധർമ്മേഷ് പട്ടേൽ തൻ്റെ ടെസ്ല കാർ ഓടിച്ചിറക്കിയത്. അപകട സമയം ഇയാളുടെ ഭാര്യയും 4-ഉം 7-ഉം വയസ്സുള്ള രണ്ട് കുട്ടികളും കാറിലുണ്ടായിരുന്നു. അത്രയും വലിയ താഴ്ചയിലേക്ക് വീണിട്ടും കാറിലുണ്ടായിരുന്ന നാലുപേരും അത്ഭുതകരമായാണ് ജീവനോടെ രക്ഷപ്പെട്ടത്. തുടർന്ന് ധർമ്മേഷ് പട്ടേലിനെതിരെ വധശ്രമത്തിന് കേസെടുക്കുകയും ജാമ്യമില്ലാതെ ജയിലിലടയ്ക്കുകയും ചെയ്തു.
മാനസിക വൈകല്യവും പുതിയ നിയമവും
അപകട സമയത്ത് ധർമ്മേഷ് കടുത്ത വിഷാദരോഗത്തിനും ഭ്രമാത്മക ചിന്തകൾക്കും അടിമയായിരുന്നു എന്ന് പ്രതിഭാഗം അഭിഭാഷകർ കോടതിയിൽ തെളിയിച്ചു. കുട്ടികളെ തട്ടിക്കൊണ്ടുപോകാൻ ആൾക്കാർ വരുന്നുണ്ടെന്ന തോന്നലാണ് തന്നെ ഈ ക്രൂരതയ്ക്ക് പ്രേരിപ്പിച്ചതെന്ന് ഇയാൾ പിന്നീട് ഡോക്ടർമാരോട് സമ്മതിച്ചിരുന്നു.
2023-ൽ കാലിഫോർണിയയിൽ നിലവിൽ വന്ന പുതിയ മാനസികാരോഗ്യ വഴിതിരിച്ചുവിടൽ നിയമം അനുസരിച്ചാണ് 2024-ൽ കോടതി ഇയാൾക്ക് ജയിലിന് പകരം വിദഗ്ദ്ധ ചികിത്സ അനുവദിച്ചത്. സ്റ്റാൻഫോർഡ് യൂണിവേഴ്സിറ്റിയിലെ സൈക്യാട്രിസ്റ്റിൻ്റെയും ഫാമിലി തെറാപ്പിസ്റ്റിൻ്റെയും കീഴിൽ രണ്ട് വർഷത്തെ ഔട്ട്പേഷ്യൻ്റ് ചികിത്സയാണ് ഇയാൾക്ക് നൽകിയത്. ജിപിഎസ് ട്രാക്കർ ഘടിപ്പിച്ചാണ് ഇയാളെ മാതാപിതാക്കളുടെ വീട്ടിൽ താമസിപ്പിച്ചിരുന്നത്.
ചികിത്സ വിജയകരമായി പൂർത്തിയാക്കിയാൽ പ്രതിക്കെതിരെയുള്ള കുറ്റങ്ങൾ പൂർണ്ണമായി നീക്കം ചെയ്യണമെന്നാണ് കാലിഫോർണിയയിലെ നിയമം. അതുകൊണ്ടുതന്നെ നിയമപ്രകാരം കേസ് തള്ളിക്കളയാൻ കോടതി നിർബന്ധിതരാകുകയായിരുന്നു എന്ന് സാൻ മാറ്റെയോ കൗണ്ടി ഡിസ്ട്രിക്റ്റ് അറ്റോർണി സ്റ്റീവ് വാഗ്സ്റ്റാഫ് വ്യക്തമാക്കി. എന്നാൽ വധശ്രമം പോലുള്ള ഗുരുതരമായ കുറ്റകൃത്യങ്ങളെ ഈ നിയമത്തിൽ നിന്ന് ഒഴിവാക്കണമെന്ന് ആവശ്യപ്പെട്ട് പ്രൊസിക്യൂഷൻ ശക്തമായി രംഗത്തുവന്നിട്ടുണ്ട്.
മാപ്പ് നൽകി കുടുംബം
തൻ്റെ ഭർത്താവിന് പൂർണ്ണമായ മാപ്പ് നൽകിയതായി ധർമ്മേഷിൻ്റെ ഭാര്യ കോടതിയിൽ സാക്ഷ്യപ്പെടുത്തിയിരുന്നു. കുട്ടികൾക്ക് അച്ഛനെ ആവശ്യമുണ്ടെന്നും ഇയാൾക്കെതിരെ നിയമനടപടികൾ തുടരാൻ തങ്ങൾ ആഗ്രഹിക്കുന്നില്ലെന്നും അവർ വ്യക്തമാക്കി. കേസ് റദ്ദാക്കിയതോടെ കോടതിക്ക് പുറത്ത് കാത്തുനിന്ന ഭാര്യയോടൊപ്പം ധർമ്മേഷ് പട്ടേൽ മടങ്ങി. അതേസമയം, മെഡിക്കൽ ബോർഡ് ഓഫ് കാലിഫോർണിയ ഇയാളുടെ ഡോക്ടർ ലൈസൻസ് റദ്ദാക്കിയിട്ടുണ്ട്.
A California court has dismissed all criminal charges against an Indian-origin radiologist who attempted to murder his family by driving their car into a ditch
