അറ്റ്‌ലാന്റ: തെക്കൻ ജോർജിയയിലെ വിയന്ന നഗരത്തിൽ നടന്ന ‘ഹോംകമിംഗ് ബ്ലോക്ക് പാർട്ടി’ക്കിടെയുണ്ടായ കൂട്ടവെടിവെപ്പിൽ രണ്ടുപേർ കൊല്ലപ്പെട്ടു. സംഭവത്തിൽ ഡസൻ കണക്കിന് ആളുകൾക്ക് പരിക്കേറ്റതായാണ് റിപ്പോർട്ട്. ഡൂലി കൗണ്ടി ഹൈസ്കൂളിന്റെ ഹോംകമിംഗ് ആഘോഷങ്ങളോടനുബന്ധിച്ച് ഞായറാഴ്ച പുലർച്ചെ നടന്ന അനൗദ്യോഗിക പാർട്ടിക്കിടെയാണ് ദാരുണമായ സംഭവം അരങ്ങേറിയത്.
പൈൻ സ്ട്രീറ്റിൽ തടിച്ചുകൂടിയ വലിയ ജനക്കൂട്ടത്തിന് നേരെയാണ് അക്രമികൾ വെടിയുതിർത്തത്. വെടിവെപ്പിൽ രണ്ട് യുവാക്കൾ സംഭവസ്ഥലത്തുതന്നെ മരണപ്പെട്ടു. പരിക്കേറ്റ നിരവധി പേരെ സമീപത്തെ വിവിധ ആശുപത്രികളിൽ പ്രവേശിപ്പിച്ചിരിക്കുകയാണ്. വെടിയേറ്റവർക്ക് പുറമേ, വെടിവെപ്പിനെത്തുടർന്നുണ്ടായ പരിഭ്രാന്തിയിൽ ഓടി രക്ഷപ്പെടാൻ ശ്രമിക്കുന്നതിനിടെ വാഹനമിടിച്ചും ചിലർക്ക് പരിക്കേറ്റിട്ടുണ്ട്.
ആക്രമണത്തിന്റെ കാരണത്തെക്കുറിച്ചോ പ്രതികളെക്കുറിച്ചോ ഉള്ള വിവരങ്ങൾ ഇതുവരെ ലഭ്യമായിട്ടില്ല. അക്രമികളെ കണ്ടെത്താനായി ജോർജിയ ബ്യൂറോ ഓഫ് ഇൻവെസ്റ്റിഗേഷനും പ്രാദേശിക പൊലീസും സംയുക്തമായി ഊർജ്ജിതമായ അന്വേഷണം ആരംഭിച്ചതായി അധികൃതർ അറിയിച്ചു.
Shooting at homecoming party in South Georgia: Two killed, several injured.
