വാഷിംഗ്ടൺ: ഇടക്കാല തെരഞ്ഞെടുപ്പിൽ റിപ്പബ്ലിക്കൻ പാർട്ടി നേരിട്ട തിരിച്ചടികൾക്ക് പിന്നാലെ വൈറ്റ് ഹൗസ് ഭരണതലത്തിൽ വൻ അഴിച്ചുപണി നടപ്പിലാക്കി യുഎസ് പ്രസിഡന്റ് ഡോണൾഡ് ട്രംപ്. നിലവിലെ ചീഫ് ഓഫ് സ്റ്റാഫ് സുസി വൈൽസിന് പകരക്കാരനായി ട്രംപിന്റെ വിശ്വസ്തനും തന്ത്രജ്ഞനുമായ സ്റ്റീഫൻ മില്ലറെ പുതിയ വൈറ്റ് ഹൗസ് ചീഫ് ഓഫ് സ്റ്റാഫായി നിയമിച്ചു. വരും തിങ്കളാഴ്ച മില്ലർ ഔദ്യോഗികമായി ചുമതലയേൽക്കും.
തന്റെ പുതിയ ഉത്തരവാദിത്തത്തെക്കുറിച്ച് പ്രതികരിച്ച മില്ലർ, “പ്രസിഡന്റിനെ പിന്തുണയ്ക്കാനും നമ്മുടെ മഹത്തായ റിപ്പബ്ലിക്കിനെ സംരക്ഷിക്കാനും ആത്മാർത്ഥമായി പോരാടുക എന്ന മുൻഗണന മുൻപത്തേക്കാൾ വ്യക്തമാണ്” എന്ന് പ്രസ്താവിച്ചു. സ്ഥാനം ഒഴിയുന്ന സുസി വൈൽസിന്റെ പ്രവർത്തനങ്ങളെ പ്രശംസിച്ച അദ്ദേഹം, വൈൽസ് ‘തതുല്യമില്ലാത്ത’ പ്രകടനമാണ് കാഴ്ചവെച്ചതെന്നും കൂട്ടിച്ചേർത്തു.
ഇടക്കാല തെരഞ്ഞെടുപ്പിൽ കോൺഗ്രസിന്റെ ഇരുസഭകളിലും റിപ്പബ്ലിക്കൻ പാർട്ടിക്ക് ഭൂരിപക്ഷം നഷ്ടമായതാണ് പെട്ടെന്നുള്ള ഭരണ നേതൃത്വ മാറ്റത്തിന് കാരണമെന്നാണ് വിലയിരുത്തൽ. അതേസമയം, സ്ഥാനം ഒഴിയുന്ന സുസി വൈൽസ് ‘ട്രംപ് പൊളിറ്റിക്കൽ ഓപ്പറേഷൻസ്’ വിഭാഗത്തിന്റെ മേൽനോട്ടത്തിലേക്ക് മാറും. കടുത്ത കുടിയേറ്റ വിരുദ്ധ നയങ്ങളുടെ ശില്പിയായ സ്റ്റീഫൻ മില്ലറുടെ വരവോടെ ഡെമോക്രാറ്റുകൾ ഭൂരിപക്ഷം നേടിയ കോൺഗ്രസുമായി വൈറ്റ് ഹൗസ് വരും ദിവസങ്ങളിൽ കടുത്ത രാഷ്ട്രീയ പോരാട്ടത്തിന് മുതിരുമെന്നാണ് സൂചന.
