ഗൂഗിൾ സിഇഒ സുന്ദർ പിച്ചൈയെ അമേരിക്കൻ പ്രസിഡന്റ് ഡോണൾഡ് ട്രംപ് “മോൺസ്റ്റർ” എന്ന് വിശേഷിപ്പിക്കുന്നതിന്റെ വീഡിയോ സമൂഹമാധ്യമങ്ങളിൽ വൈറൽ. ട്രംപിന്റെ പരാമർശത്തോടുള്ള ഇന്ത്യൻ വംശജനായ സുന്ദർ പിച്ചൈയുടെ പ്രതികരണവും വീഡിയോയിലുണ്ട്. റിപ്പോർട്ടർമാരുമായുള്ള സംഭാഷണത്തിനിടെയാണ് ട്രംപ് സുന്ദർ പിച്ചൈയെ പ്രശംസിച്ചത്.
“സുന്ദർ, നിങ്ങൾക്ക് എന്തെങ്കിലും പറയാനുണ്ടോ?” എന്ന് ട്രംപ് ചോദിക്കുന്നതോടെയാണ് വീഡിയോ ആരംഭിക്കുന്നത്.“ആദ്യം തന്നെ നന്ദി…” എന്ന് പിച്ചൈ പറഞ്ഞുതുടങ്ങിയപ്പോൾ ട്രംപ് ഇടപെട്ടു. “ഈ മനുഷ്യൻ ഒരു മോൺസ്റ്ററാണ്, പക്ഷേ ആരും അദ്ദേഹത്തെ അറിയുന്നില്ല. എന്തൊരു മികച്ച ജീവിതം! മോൺസ്റ്ററായിരിക്കുകയും ഇതൊന്നും നേരിടേണ്ടിവരാതിരിക്കുകയും ചെയ്യുക. നിങ്ങൾ അറിയേണ്ട ഒരേയൊരു കാര്യം—സുന്ദർ! അദ്ദേഹത്തിന്റെ പേര് സുന്ദറെന്നാണ്,” ട്രംപ് പറഞ്ഞു.
ഇതിന് പിന്നാലെ പിച്ചൈ, “ഞാൻ ഒരു മോൺസ്റ്ററാണെന്നതിനേക്കാൾ മികച്ചൊരു വിശേഷണം ആയിരിക്കുമെന്ന് പ്രതീക്ഷിക്കുന്നു!” എന്ന് മറുപടി നൽകി. ഇതോടെ സമീപത്തുണ്ടായിരുന്നവർ ചിരിച്ചു.ട്രംപിന്റെ പരാമർശത്തെക്കുറിച്ച് സമൂഹമാധ്യമങ്ങളിൽ വ്യത്യസ്ത പ്രതികരണങ്ങളും ഉണ്ടായി. “ട്രംപിന്റെ മറ്റൊരു പരോക്ഷ പ്രശംസ,” ഒരാൾ കുറിച്ചു. “സുന്ദർ ആകെ നാണിച്ചുപോയി,” മറ്റൊരാൾ പ്രതികരിച്ചു.“എക്സിൽ മാത്രം 11.7 ദശലക്ഷം ഫോളോവേഴ്സുണ്ട്. എന്നിട്ടും ആരും അദ്ദേഹത്തെ അറിയില്ലെന്നാണ് പറയുന്നത്…” എന്നായിരുന്നു മറ്റൊരു പ്രതികരണം. “അതെ, അക്ഷരാർഥത്തിൽ ആരും അറിയുന്നില്ല… ആൽഫബെറ്റിന്റെ സിഇഒയെയാണ്,” എന്ന് മറ്റൊരാളും കുറിച്ചു.
വൈറ്റ് ഹൗസിൽ ടെക് കമ്പനികളുടെ മേധാവികളുമായി പ്രസിഡന്റ് നടത്തിയ കൂടിക്കാഴ്ചയ്ക്ക് പിന്നാലെയായിരുന്നു ഈ സംഭാഷണം. എഐയുടെ സ്വമേധയാ പാലിക്കേണ്ട മാനദണ്ഡങ്ങൾ സംബന്ധിച്ചായിരുന്നു യോഗം. ആന്ത്രോപിക്കിന്റെ ഡാരിയോ അമോഡെയ്, ഗൂഗിളിന്റെ സുന്ദർ പിച്ചൈ, ഓപ്പൺഎഐയുടെ ഗ്രെഗ് ബ്രോക്മാൻ, എൻവിഡിയയുടെ ജെൻസൻ ഹുവാങ്, മെറ്റയുടെ മാർക്ക് സക്കർബർഗ് എന്നിവരും യോഗത്തിൽ പങ്കെടുത്തിരുന്നു.
‘This guy is a monster and nobody knows him’: Sundar Pichai reacts to Donald Trump’s unusual compliment
