പാരീസ്: അമേരിക്കയും ഇറാനും തമ്മിലുള്ള താൽക്കാലിക സമാധാന കരാറിന്റെ അന്തിമ വ്യവസ്ഥകൾ രൂപീകരിക്കാൻ അറുപത് ദിവസത്തെ ചർച്ചകൾക്ക് ഇരുരാജ്യങ്ങളും തയ്യാറെടുക്കുന്നതിനിടെ, ആവശ്യമെങ്കിൽ ഇറാനെതിരെ വീണ്ടും സൈനിക നടപടി സ്വീകരിക്കാൻ മടിക്കില്ലെന്ന കർശന മുന്നറിയിപ്പുമായി യു.എസ് പ്രസിഡന്റ് ഡോണൾഡ് ട്രംപ്. ജി-7 ഉച്ചകോടിയുടെ ഭാഗമായി ഇന്ത്യൻ പ്രധാനമന്ത്രി നരേന്ദ്ര മോദിയുമായി നടത്തിയ ഉഭയകക്ഷി കൂടിക്കാഴ്ചയ്ക്കിടെയാണ് ട്രംപ് നിലപാട് വ്യക്തമാക്കിയത്. നിലവിൽ തയ്യാറാക്കിയിരിക്കുന്നത് വളരെ വിശദമായ ഒരു ധാരണാപത്രമാണെന്നും അത് കൃത്യമായ ഒരു കരാറായി മാറുമെന്നാണ് താൻ കരുതുന്നതെന്നും അദ്ദേഹം പറഞ്ഞു.
എന്നാൽ ഇറാൻ ഇതിനോട് സഹകരിച്ചില്ലെങ്കിൽ ചർച്ചകൾ വീണ്ടും ആദ്യ ഘട്ടം മുതൽ തുടങ്ങേണ്ടി വരുമെന്നും അതിൽ അമേരിക്കയ്ക്ക് ഒന്നും നഷ്ടപ്പെടാനില്ലെന്നും ട്രംപ് കൂട്ടിച്ചേർത്തു. ഇറാൻ കരാറിലെ വ്യവസ്ഥകൾ പാലിച്ചില്ലെങ്കിൽ അവരുടെ കേന്ദ്രങ്ങളിൽ വീണ്ടും ബോംബവർഷം നടത്താൻ അമേരിക്ക ഒട്ടും മടിക്കില്ലെന്ന് കഴിഞ്ഞ ദിവസം ട്രംപ് കടുത്ത ഭാഷയിൽ മുന്നറിയിപ്പ് നൽകിയിരുന്നു. കഴിഞ്ഞ നാൽപ്പത്തിയേഴ് വർഷമായി ഇറാൻ അന്താരാഷ്ട്ര തലത്തിൽ മോശമായാണ് പെരുമാറുന്നതെന്നും അദ്ദേഹം ആരോപിച്ചു. എങ്കിലും, അമേരിക്കയിൽ വരാനിരിക്കുന്ന ഇടക്കാല തിരഞ്ഞെടുപ്പും രാജ്യത്ത് ഇന്ധനവില ഗാലന് നാല് ഡോളറിന് മുകളിൽ തുടരുന്നതും കണക്കിലെടുത്ത് ഈ യുദ്ധപ്രതിസന്ധി എത്രയും വേഗം പരിഹരിക്കാനാണ് ട്രംപ് ആഗ്രഹിക്കുന്നത്.
ഇറാൻ ഇപ്പോൾ ഒരു കരാറിലെത്താൻ പൂർണ്ണ സജ്ജരാണെന്നും സാധാരണ ജീവിതത്തിലേക്ക് മടങ്ങാൻ അവർ ആഗ്രഹിക്കുന്നുണ്ടെന്നും ട്രംപ് നിരീക്ഷിച്ചു. തന്റെ ബിസിനസ്സ്-രാഷ്ട്രീയ ജീവിതത്തിലുടനീളം മികച്ചൊരു ‘കരാർ നിർമ്മാതാവ്’ എന്ന് സ്വയം വിശേഷിപ്പിക്കാറുള്ള ട്രംപിനോട്, വെള്ളിയാഴ്ച സ്വിറ്റ്സർലൻഡിൽ വെച്ച് ഇരുരാജ്യങ്ങളും തമ്മിലുള്ള ഈ താൽക്കാലിക കരാർ ഒപ്പുവെക്കുമെന്ന് ഉറപ്പുണ്ടോ എന്ന് മാധ്യമപ്രവർത്തകർ ചോദിച്ചു. ഇത്തരം വലിയ കരാറുകളുടെ കാര്യത്തിൽ മുൻകൂട്ടി ഒന്നും പ്രവചിക്കാനാകില്ലെന്നും എന്നാൽ വളരെ പെട്ടെന്ന് തന്നെ ഇതിന്റെ ഫലം ലോകത്തിന് മുന്നിലെത്തുമെന്നും അദ്ദേഹം മറുപടി നൽകി. എന്തായാലും കരാർ ഒപ്പുവെക്കാനാണ് ഇറാന് താല്പര്യമെന്നും അതിനായുള്ള ചർച്ചകൾ പുരോഗമിക്കുകയാണെന്നും ട്രംപ് വ്യക്തമാക്കി.
