വാഷിംഗ്ടൺ: മുൻകൂട്ടി നിശ്ചയിച്ചിരുന്ന വാരാന്ത്യ പരിപാടികൾ റദ്ദാക്കി യുഎസ് പ്രസിഡന്റ് ഡോണൾഡ് ട്രംപ് വാഷിംഗ്ടണിൽ തുടരുന്നു. ട്രംപിന്റെ മൂത്ത മകൻ ഡോൺ ജൂനിയറിന്റെ രണ്ടാം വിവാഹം ബഹാമാസിൽ നടക്കാനിരിക്കെയാണ്, കുടുംബ ചടങ്ങുകളിൽ പോലും പങ്കെടുക്കാതെ പ്രസിഡന്റ് തലസ്ഥാനത്ത് തുടരാൻ തീരുമാനിച്ചത്. ഇറാന് മേൽ വ്യക്തമായ മേൽക്കൈ നേടുന്നതിനും യുഎസിന് അനുകൂലമായ നിബന്ധനകളിൽ ചർച്ചകൾക്ക് അവരെ നിർബന്ധിതരാക്കുന്നതിനുമുള്ള ശക്തമായൊരു രാഷ്ട്രീയ സന്ദേശമായാണ് നയതന്ത്ര വിദഗ്ധർ ഈ അപ്രതീക്ഷിത നീക്കത്തെ വിലയിരുത്തുന്നത്. സാധാരണയായി ഒരു പ്രസിഡന്റ് നഗരത്തിൽ തന്നെ തുടരുകയും വലിയ രീതിയിലുള്ള പ്രഖ്യാപനങ്ങൾ നടത്തുകയും ചെയ്യുന്നത് അണിയറയിൽ എന്തോ പ്രധാനപ്പെട്ട നീക്കങ്ങൾ നടക്കുന്നു എന്നതിന്റെ സൂചനയായാണ് കണക്കാക്കപ്പെടുന്നത്.
ഇറാനുമായുള്ള ചർച്ചകളിൽ ചില സുപ്രധാന വിവരങ്ങൾ ഉടൻ പുറത്തുവന്നേക്കുമെന്ന് യുഎസ് സ്റ്റേറ്റ് സെക്രട്ടറി മാർക്കോ റൂബിയോ വ്യക്തമാക്കിയിട്ടുണ്ട്. ഇന്ന് തന്നെയോ അല്ലെങ്കിൽ നാളെയോ ചില നിർണായക വാർത്തകൾ ഉണ്ടായേക്കാമെന്നാണ് അദ്ദേഹം സൂചിപ്പിച്ചത്. എങ്കിലും, ഇരു രാജ്യങ്ങളും തമ്മിലുള്ള ചർച്ചകൾ നിലവിൽ തടസ്സപ്പെട്ടു നിൽക്കുന്ന കൃത്യമായ കാരണങ്ങൾ എന്തൊക്കെയാണെന്ന് വെളിപ്പെടുത്താൻ അദ്ദേഹം തയ്യാറായിട്ടില്ല.
അതേസമയം, ഇറാനെ പരസ്യമായി വെല്ലുവിളിച്ചുകൊണ്ട് ഡോണൾഡ് ട്രംപ് സോഷ്യൽ മീഡിയയിലൂടെ വീണ്ടും രംഗത്തെത്തിയിട്ടുണ്ട്. ഇറാന്റെ അതിർത്തികളെ അമേരിക്കൻ പതാക കൊണ്ട് മൂടുന്ന രീതിയിലുള്ള മിഡിൽ ഈസ്റ്റിന്റെ ഭൂപടം പങ്കുവെച്ചാണ് ട്രംപ് നിലപാട് വ്യക്തമാക്കിയത്. ഇതിന് തൊട്ടുപിന്നാലെ, ഡെന്മാർക്കിന്റെ അധീനതയിലുള്ള ഗ്രീൻലാൻഡിന് മുകളിൽ തന്റെ മുഖം നിൽക്കുന്ന തരത്തിലുള്ള ഒരു എഐ ചിത്രവും ‘ഹലോ ഗ്രീൻലാൻഡ്’ എന്ന അടിക്കുറിപ്പോടെ ട്രംപ് പോസ്റ്റ് ചെയ്തിട്ടുണ്ട്. വരും മണിക്കൂറുകളിൽ സോഷ്യൽ മീഡിയയിലൂടെ പ്രസിഡന്റിൽ നിന്ന് കൂടുതൽ പ്രകോപനപരമായ പ്രസ്താവനകളും നിർണായക പ്രഖ്യാപനങ്ങളും ഉണ്ടായേക്കുമെന്നാണ് രാജ്യാന്തര മാധ്യമങ്ങൾ പ്രതീക്ഷിക്കുന്നത്.
