വാഷിംഗ്ടൺ: അമേരിക്കയും ഇറാനും തമ്മിലുള്ള യുദ്ധം അവസാനിപ്പിക്കാൻ ചർച്ചയ്ക്ക് തയ്യാറാണെങ്കിൽ ഇറാൻ ഭരണകൂടത്തിന് തന്നെ നേരിട്ട് ബന്ധപ്പെടാമെന്ന് യുഎസ് പ്രസിഡന്റ് ഡോണൾഡ് ട്രംപ്. സമാധാന ചർച്ചകൾക്കായി ഇറാൻ മുൻകൈ എടുക്കണമെന്നും അതിനായി സുരക്ഷിതമായ ആശയവിനിമയ സംവിധാനങ്ങൾ സജ്ജമാണെന്നും അദ്ദേഹം വ്യക്തമാക്കി. ഫോക്സ് ന്യൂസിന്റെ ‘ദ സൺഡേ ബ്രീഫിംഗ്’ എന്ന പരിപാടിയിൽ നൽകിയ പ്രത്യേക അഭിമുഖത്തിലാണ് ട്രംപ് തന്റെ നിലപാട് വ്യക്തമാക്കിയത്.
“അവർക്ക് സംസാരിക്കണമെന്നുണ്ടെങ്കിൽ ഞങ്ങളുടെ അടുത്തേക്ക് വരാം, അല്ലെങ്കിൽ ഫോൺ ചെയ്യാം. സുരക്ഷിതമായ ടെലിഫോൺ ലൈനുകൾ ഞങ്ങളുടെ പക്കലുണ്ട്,” എന്ന് ട്രംപ് പറഞ്ഞു. ഇറാനുമായുള്ള യുദ്ധം വളരെ പെട്ടെന്നുതന്നെ അവസാനിക്കുമെന്നും ഈ പോരാട്ടത്തിൽ അമേരിക്ക വിജയിയാകുമെന്നും താൻ ഉറച്ചു വിശ്വസിക്കുന്നതായി അദ്ദേഹം കൂട്ടിച്ചേർത്തു. നിലവിൽ ഇറാനിൽ തങ്ങൾ ചർച്ച നടത്തുന്നവരിൽ ചിലർ വളരെ വിവേകമുള്ളവരാണെന്നും എന്നാൽ മറ്റുചിലർ അങ്ങനെയല്ലെന്നും ട്രംപ് നിരീക്ഷിച്ചു.
ഇക്കാര്യത്തിൽ ഇറാൻ ബുദ്ധിപരമായ തീരുമാനമെടുക്കുമെന്ന് താൻ പ്രതീക്ഷിക്കുന്നതായും പ്രസിഡന്റ് പറഞ്ഞു. സൈനിക നീക്കങ്ങൾക്കിടയിലും നയതന്ത്ര ചർച്ചകൾക്കുള്ള സാധ്യതകൾ അമേരിക്ക തള്ളിക്കളയുന്നില്ലെന്ന വ്യക്തമായ സൂചനയാണ് ട്രംപിന്റെ വാക്കുകൾ നൽകുന്നത്. യുദ്ധം അവസാനിപ്പിക്കാനുള്ള പന്ത് ഇപ്പോൾ ഇറാന്റെ കോർട്ടിലാണെന്നും അവർ സഹകരിക്കാൻ തയ്യാറായാൽ സമാധാനത്തിനുള്ള വഴി തെളിയുമെന്നുമാണ് വൈറ്റ് ഹൗസിന്റെ നിലപാട്. വരും ദിവസങ്ങളിൽ ഇറാന്റെ ഭാഗത്തുനിന്നുണ്ടാകുന്ന പ്രതികരണം ആഗോള രാഷ്ട്രീയത്തിൽ അതീവ നിർണ്ണായകമാകും.——-അക്രമിക്ക് ക്രിസ്ത്യൻ വിരുദ്ധത; വിദ്വേഷം നിറഞ്ഞ ‘മാനിഫെസ്റ്റോ’യുമായി വൈറ്റ് ഹൗസ് വെടിവെപ്പ് പ്രതി!വാഷിംഗ്ടൺ ഡി.സി: വൈറ്റ് ഹൗസ് കറസ്പോണ്ടന്റ്സ് ഡിന്നറിനിടെ വെടിയുതിർത്ത അക്രമിക്ക് ക്രിസ്ത്യൻ മതവിഭാഗത്തോട് കടുത്ത വിദ്വേഷമുണ്ടായിരുന്നുവെന്ന് പ്രസിഡന്റ് ഡൊണാൾഡ് ട്രംപ്. ഫോക്സ് ന്യൂസിന് നൽകിയ അഭിമുഖത്തിലാണ് പ്രതിയുടെ ‘മാനിഫെസ്റ്റോ’യെക്കുറിച്ചുള്ള ഞെട്ടിപ്പിക്കുന്ന വിവരങ്ങൾ ട്രംപ് വെളിപ്പെടുത്തിയത്. പ്രതി അതീവ മാനസിക സംഘർഷം അനുഭവിച്ചിരുന്ന വ്യക്തിയായിരുന്നുവെന്നും ഇയാളുടെ ഹൃദയത്തിൽ വിദ്വേഷം നിറഞ്ഞുനിന്നിരുന്നുവെന്നും ട്രംപ് പറഞ്ഞു.പ്രതിയുടെ എഴുത്തുകളിൽ ക്രിസ്ത്യൻ വിരുദ്ധത പ്രകടമാണെന്നും അദ്ദേഹത്തിന്റെ സഹോദരനോ സഹോദരിയോ ഇയാളുടെ പെരുമാറ്റത്തെക്കുറിച്ച് നേരത്തെ തന്നെ സുരക്ഷാ ഏജൻസികൾക്ക് പരാതി നൽകിയിരുന്നുവെന്നും പ്രസിഡന്റ് ചൂണ്ടിക്കാട്ടി. “അയാൾക്ക് ക്രിസ്ത്യാനികളോട് വലിയ വിദ്വേഷമായിരുന്നു. അവന്റെ കുടുംബാംഗങ്ങൾ പോലും ഇക്കാര്യത്തിൽ ആശങ്കാകുലരായിരുന്നു. നിയമപാലകരോട് അവർ പരാതിപ്പെടുകയും ചെയ്തിരുന്നു. തികച്ചും പ്രശ്നക്കാരനായ ഒരാളായിരുന്നു അവൻ,” ട്രംപ് അഭിമുഖത്തിൽ പറഞ്ഞു.ആക്ടിങ് അറ്റോർണി ജനറൽ ടോഡ് ബ്ലാഞ്ചും എൻ.ബി.സിയുടെ ‘മീറ്റ് ദ പ്രസ്’ പരിപാടിയിൽ പ്രതിയുടെ പക്കൽ നിന്ന് ചില രേഖകൾ കണ്ടെടുത്ത കാര്യം സ്ഥിരീകരിച്ചിട്ടുണ്ട്. ട്രംപ് ഭരണകൂടത്തിലെ ഉദ്യോഗസ്ഥരെയാണ് അക്രമി ലക്ഷ്യമിട്ടതെന്ന് നേരത്തെ റിപ്പോർട്ടുകൾ വന്നിരുന്നെങ്കിലും, അന്വേഷണം പ്രാഥമിക ഘട്ടത്തിലാണെന്ന് അദ്ദേഹം വ്യക്തമാക്കി. മാനിഫെസ്റ്റോയിൽ മതപരമായ വിദ്വേഷം പ്രകടമാണെന്നും ഇത് സംബന്ധിച്ച കൂടുതൽ വിവരങ്ങൾ അന്വേഷണ ഏജൻസികൾക്ക് ലഭിച്ചുവരികയാണെന്നും ട്രംപ് കൂട്ടിച്ചേർത്തു. പ്രതിയുടെ വിദ്വേഷം നിറഞ്ഞ ഈ മാനിഫെസ്റ്റോ പുറത്തുവന്നതോടെ സംഭവത്തിന് പിന്നിലെ മതപരമായ മാനങ്ങൾ കൂടി സുരക്ഷാ ഏജൻസികൾ പരിശോധിച്ചുവരികയാണ്.
