വാഷിംഗ്ടൺ: ഹോർമുസ് കടലിടുക്ക് തുറക്കുന്നതിന് മുൻപ് കൂടുതൽ ഉപാധികൾ മുന്നോട്ടുവെച്ച ഇറാനോട് സൈനിക ആക്രമണ ഭീഷണികൾ മുഴക്കുന്നതിന് പകരം സാമ്പത്തികമായി ഒറ്റപ്പെടുത്താനുള്ള നീക്കവുമായി യുഎസ് പ്രസിഡന്റ് ഡോണൾഡ് ട്രംപ്. “ഞങ്ങൾ ഇത് വളരെ ‘ലോ-കീ’ ആയിട്ടാണ് കൈകാര്യം ചെയ്യുന്നത്,” ആക്സിയോസിന് നൽകിയ അഭിമുഖത്തിൽ ട്രംപ് വ്യക്തമാക്കി. “ഞങ്ങൾ അവരുമായി പകുതി അളവിൽ മാത്രമാണ് ചർച്ചകൾ നടത്തുന്നത്. കടുത്ത പണപ്പെരുപ്പവും പണമില്ലാത്ത അവസ്ഥയും മൂലം വലയുന്ന ഇറാന്റെ സ്ഥിതി ഞങ്ങൾ നിരീക്ഷിച്ചുവരികയാണ്.”
ഇറാനുമായുള്ള വിഷയം കൈകാര്യം ചെയ്യുന്നതിൽ ട്രംപ് സാധാരണയായി സ്വീകരിക്കുന്ന ശൈലിയിൽ നിന്നുള്ള വലിയൊരു മാറ്റമാണിത്. അന്തിമ കരാർ ഉടൻ ഉണ്ടാകുമെന്ന് പ്രഖ്യാപിക്കുക, അനുസരിച്ചില്ലെങ്കിൽ ഇല്ലാതാക്കുമെന്ന് ഭീഷണിപ്പെടുത്തുക, അവസാന നിമിഷം ആക്രമണങ്ങൾ വേണ്ടെന്നുവെക്കുക, പിന്നീട് വീണ്ടും ഇത് തന്നെ ആവർത്തിക്കുക എന്നതായിരുന്നു ട്രംപിന്റെ ഇതുവരെയുള്ള രീതി.
എന്നാൽ ഒരു യുദ്ധ പശ്ചാത്തലത്തെ “ലോ-കീ” ചെയ്യുക എന്ന് ട്രംപ് വിശേഷിപ്പിച്ചത് കൗതുകമുണർത്തുന്ന ഒന്നാണ്. വിശേഷണമായി ഉപയോഗിക്കാറുള്ള ഈ വാക്കിനെ ട്രംപ് ഒരു ക്രിയയായി ഉപയോഗിക്കുന്നത് ഇതാദ്യമല്ല. ഏപ്രിൽ ആദ്യം തെക്കൻ ലെബനനിൽ ഇസ്രായേൽ നടത്തുന്ന ബോംബാക്രമണം ഇറാനുമായുള്ള ചർച്ചകളെ ബാധിച്ചേക്കുമെന്ന ഘട്ടത്തിൽ, ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹുവുമായുള്ള ഫോൺ സംഭാഷണത്തെ വിവരിക്കാനും ട്രംപ് ഈ വാക്ക് ഉപയോഗിച്ചിരുന്നു. “ഞാൻ ബിബിയുമായി സംസാരിച്ചു, അദ്ദേഹം കാര്യങ്ങൾ കുറച്ചുകൂടി ‘ലോ-കീ’ ആക്കി കൈകാര്യം ചെയ്യും. നമ്മൾ കൂടുതൽ ശാന്തമായ നിലപാട് സ്വീകരിക്കണമെന്നാണ് ഞാൻ കരുതുന്നത്,” അന്ന് എൻ.ബി.സി ന്യൂസിനോട് ട്രംപ് പറഞ്ഞു.
