ഇറാനെ ഒരു കരാറിലേക്ക് എത്തിക്കുന്നതിനായി പുതിയ സൈനിക ആക്രമണങ്ങൾക്ക് പകരം സാമ്പത്തിക സമ്മർദമാണ് അമേരിക്ക ആശ്രയിക്കുന്നതെന്ന് യുഎസ് പ്രസിഡന്റ് ഡൊണാൾഡ് ട്രംപ് പറഞ്ഞു. ഞങ്ങൾ ഇപ്പോൾ കാര്യങ്ങൾ കുറച്ച് ശാന്തമായാണ് മുന്നോട്ടുകൊണ്ടുപോകുന്നത് എന്ന് ഞായറാഴ്ച ആക്സിയോസിന് നൽകിയ അഭിമുഖത്തിൽ ട്രംപ് പറഞ്ഞു. മാസങ്ങളായി തുടരുന്ന സംഘർഷത്തിന് പിന്നാലെ കൂടുതൽ ജാഗ്രതയോടെയുള്ള സമീപനമാണ് അമേരിക്ക സ്വീകരിക്കുന്നതെന്നും അദ്ദേഹം വ്യക്തമാക്കി.
യുദ്ധം ഇറാന്റെ സമ്പദ്വ്യവസ്ഥയിൽ ഉണ്ടാക്കിയ ആഘാതം നിരീക്ഷിച്ചുകൊണ്ട് ഇറാനുമായി അമേരിക്ക ഭാഗികമായി മാത്രമാണ് ചർച്ച നടത്തുന്നതെന്നും ട്രംപ് പറഞ്ഞു. ഉയർന്ന പണപ്പെരുപ്പവും സ്വന്തം സൈനികർക്ക് ശമ്പളം നൽകുന്നതിലെ ബുദ്ധിമുട്ടും ചൂണ്ടിക്കാട്ടി ഇറാന്റെ സാമ്പത്തിക സ്ഥിതി വളരെ മോശമാണെന്ന് ട്രംപ് അഭിപ്രായപ്പെട്ടു. ഏപ്രിൽ മുതൽ തുടരുന്ന യുഎസ് നാവിക ഉപരോധം ഈ സമ്മർദം കൂടുതൽ ശക്തമാക്കിയെന്നും അദ്ദേഹം അവകാശപ്പെട്ടു.
അതേസമയം, ബാരലിന് 75 ഡോളറിന് മുകളിലായി നിൽക്കുന്ന എണ്ണവില കുറഞ്ഞത് അമേരിക്കൻ ഉപഭോക്താക്കൾക്കുള്ള സാമ്പത്തിക ആഘാതം കുറച്ചതായും ട്രംപ് പറഞ്ഞു. കാര്യങ്ങൾ ശരിയാകും. എല്ലായ്പ്പോഴും ശരിയാകാറുണ്ട്. ഇത് ഒരു ചെസ് കളി പോലെയാണെന്നും ട്രംപ് വ്യക്തമാക്കി. ഹോർമുസ് കടലിടുക്ക് കപ്പൽ ഗതാഗതത്തിനായി വീണ്ടും തുറക്കുന്നതുമായി ബന്ധപ്പെട്ട് ഒമാൻ മധ്യസ്ഥതയിൽ നടക്കുന്ന ചർച്ചകൾ നിർണായക ഘട്ടത്തിലേക്ക് നീങ്ങുന്നതായാണ് റിപ്പോർട്ടുകൾ.
ചർച്ചകൾ അവസാന ഘട്ടത്തിലെത്തിയെന്നും കടലിടുക്കിലൂടെ പുതിയ കപ്പൽപാത സ്ഥാപിക്കുന്നതിനുള്ള കോർഡിനേറ്റുകൾ സംബന്ധിച്ച് ഇരുപക്ഷവും ധാരണയിലെത്തുന്നതിന് അടുത്തെത്തിയെന്നും ഇറാൻ വിദേശകാര്യ മന്ത്രാലയം ഈ മാസം വ്യക്തമാക്കിയിരുന്നു. അമേരിക്ക തങ്ങളുടെ പെരുമാറ്റം തിരുത്തുന്നത് വരെ ഹോർമുസ് കടലിടുക്ക് പൂർണമായി തുറക്കില്ലെന്ന് ടെഹ്റാൻ വ്യക്തമാക്കിയിട്ടുണ്ട്. നാവിക ഉപരോധം പിൻവലിക്കുക, സൈനിക നടപടികൾ അവസാനിപ്പിക്കുക, യുദ്ധത്തിൽ ഉണ്ടായ നാശനഷ്ടങ്ങൾക്ക് നഷ്ടപരിഹാരം നൽകുക എന്നിവയാണ് ഇറാന്റെ പ്രധാന ആവശ്യങ്ങൾ.
ഹോർമുസ് കടലിടുക്കിന്റെ നിയന്ത്രണം സംബന്ധിച്ച തർക്കത്തെ തുടർന്ന് ജൂണിൽ ഉണ്ടായ വെടിനിർത്തൽ ആഴ്ചകൾക്കകം തകർന്നു. തുടർന്ന് വീണ്ടും പോരാട്ടം ആരംഭിച്ചു. അതിനുശേഷം കുവൈത്ത്, ബഹ്റൈൻ, ജോർദാൻ എന്നിവിടങ്ങളിലെ യുഎസ് സൈനിക താവളങ്ങൾക്കെതിരെ ഇറാൻ ഇടയ്ക്കിടെ ആക്രമണം തുടരുകയാണ്. അതേസമയം, ഇറാനുമായി സഖ്യമുള്ള യെമനിലെ ഹൂതികൾ കഴിഞ്ഞ മാസം സൗദി അറേബ്യക്കെതിരെ പ്രത്യേക നാവിക ഉപരോധം പ്രഖ്യാപിച്ചിരുന്നു.
Trump signals shift to economic pressure on Iran over new military strikes
