വാഷിങ്ടൺ: യുഎസ് കുടിയേറ്റ, വിസ നിയമങ്ങളിൽ സെപ്റ്റംബർ മുതൽ നിർണായക മാറ്റങ്ങൾ പ്രാബല്യത്തിൽ വരും. വിദ്യാർഥികളുടെ വിസാ കാലാവധി, ഗ്രീൻ കാർഡ് അപേക്ഷകളിലെ സാമ്പത്തിക പരിശോധന, കുടിയേറ്റ വിസകളുടെ നടപടിക്രമങ്ങൾ എന്നിവയിലാണ് പ്രധാന മാറ്റങ്ങൾ.
എഫ്-1, ജെ-1, ഐ വിസകളിലുള്ളവർക്ക് നിലവിലെ അനിശ്ചിതമായ ‘ഡ്യൂറേഷൻ ഓഫ് സ്റ്റാറ്റസ്’ സംവിധാനം ഒഴിവാക്കി നിശ്ചിത കാലാവധി നിശ്ചയിക്കാനാണ് ആഭ്യന്തര സുരക്ഷാ വകുപ്പ് (DHS) തീരുമാനിച്ചത്. എഫ്-1 വിദ്യാർഥികൾക്ക് പഠന കാലാവധി അല്ലെങ്കിൽ പരമാവധി നാല് വർഷം—ഇവയിൽ കുറവുള്ള കാലയളവിലായിരിക്കും പ്രവേശനാനുമതി ലഭിക്കുക. നാല് വർഷത്തിലധികം ദൈർഘ്യമുള്ള കോഴ്സുകൾക്ക് പിന്നീട് കാലാവധി നീട്ടാൻ അപേക്ഷിക്കാം.
പുതിയ നിയമം ബാധിക്കാതിരിക്കാൻ യുഎസിന് പുറത്തുള്ള അന്താരാഷ്ട്ര വിദ്യാർഥികൾ സെപ്റ്റംബർ 15ന് മുമ്പ് തിരിച്ചെത്തണമെന്ന് ചില സർവകലാശാലകൾ നിർദേശിച്ചിട്ടുണ്ട്. നിയമത്തിനെതിരെ കോടതിയിൽ ഹർജിയും നൽകിയിട്ടുണ്ട്. സെപ്റ്റംബർ 3നാണ് ആദ്യ വാദം.ഗ്രീൻ കാർഡ് അപേക്ഷകളിലും പുതിയ മാറ്റമുണ്ട്. അപേക്ഷകർക്ക് മതിയായ സാമ്പത്തിക ശേഷിയില്ലെന്നും സർക്കാർ സഹായത്തെ പ്രധാനമായും ആശ്രയിക്കേണ്ടിവരുമെന്നും ഉദ്യോഗസ്ഥർ വിലയിരുത്തിയാൽ സ്ഥിരതാമസാനുമതി നിഷേധിക്കുകയോ ‘പബ്ലിക് ചാർജ് ബോണ്ട്’ അടയ്ക്കാൻ ആവശ്യപ്പെടുകയോ ചെയ്യാം.
പണസഹായം, ഭവനസഹായം, ഭക്ഷ്യ കൂപ്പണുകൾ, കോളജ് സാമ്പത്തിക സഹായം തുടങ്ങിയ സർക്കാർ ആനുകൂല്യങ്ങൾ അപേക്ഷകർ സ്വീകരിച്ചിട്ടുണ്ടോയെന്നും പരിശോധിക്കും. സെപ്റ്റംബർ 18 മുതൽ ലഭിക്കുന്ന ഇത്തരം ആനുകൂല്യങ്ങൾ കൂടുതൽ വിപുലമായി പരിഗണിക്കുമെന്നും DHS വ്യക്തമാക്കി.
അതേസമയം, 2026 സാമ്പത്തിക വർഷം സെപ്റ്റംബർ 30ന് അവസാനിക്കുന്നതിനാൽ ചില ഗ്രീൻ കാർഡ് വിഭാഗങ്ങളിൽ ലഭ്യത കുറയാനും സാധ്യതയുണ്ട്. പ്രത്യേകിച്ച് EB-1 (ഇന്ത്യ), EB-2 (ലോകവ്യാപക/ഇന്ത്യ), EB-5 Unreserved വിഭാഗങ്ങളിൽ വാർഷിക പരിധി എത്തുകയാണെങ്കിൽ വിസ ലഭ്യത 2026 ഒക്ടോബർ 1ന് പുതിയ സാമ്പത്തിക വർഷം ആരംഭിക്കുന്നതുവരെ പിന്നോട്ടുപോകുകയോ താൽക്കാലികമായി ലഭ്യമല്ലാതാകുകയോ ചെയ്യാം.
DV-2026 ഡൈവേഴ്സിറ്റി വിസ തിരഞ്ഞെടുക്കപ്പെട്ടവരുടെ വിസ അവകാശവും സെപ്റ്റംബർ 30ന് അവസാനിക്കും. ഇതിനിടെ, 2026 ജനുവരി 21ന് നിരവധി രാജ്യങ്ങളിലെ കുടിയേറ്റ വിസ നടപടികൾ യുഎസ് സ്റ്റേറ്റ് ഡിപ്പാർട്ട്മെന്റ് താൽക്കാലികമായി നിർത്തിവെച്ചിരുന്നു. അഫ്ഗാനിസ്ഥാൻ, പാകിസ്ഥാൻ, ഇറാൻ, ഇറാഖ്, ബംഗ്ലാദേശ്, നൈജീരിയ, റഷ്യ, സിറിയ, യെമൻ തുടങ്ങിയ രാജ്യങ്ങൾ ഉൾപ്പെടെ 75 രാജ്യങ്ങളാണ് പട്ടികയിലുണ്ടായിരുന്നത്.
എന്നാൽ കോടതി ഉത്തരവിനെ തുടർന്ന് ഓഗസ്റ്റ് 21 മുതൽ ഈ വിലക്ക് പ്രാബല്യത്തിലില്ല. ഓഗസ്റ്റിൽ വിവിധ രാജ്യങ്ങളിലെ യുഎസ് എംബസികളിൽ ഉദ്യോഗസ്ഥരുടെ ആഭ്യന്തര പരിശീലനം നടക്കുന്നതിനാൽ വിസ അഭിമുഖങ്ങൾ നിർത്തിവെച്ചിരുന്നു. അതിനാൽ വിലക്ക് നീക്കിയതിന്റെ പ്രായോഗിക നടപടികൾ സെപ്റ്റംബർ മുതൽ പ്രാബല്യത്തിൽ വരുമെന്നാണ് റിപ്പോർട്ട്.
Two major changes to US immigration and visa policy go into effect in September 2026, alongside standard end-of-fiscal-year shifts in green card availability.
